قیصر محمود گورائیہ۔۔۔۔پنجابی رہتل دا نمائندہ شاعر

ایہہ اک طے شدہ حقیقت اے کہ شاعری آفاقی ہووے’ زمینی ہووے’ علاقائی
ہووے’ قومی ہووے’ بین الاقوامی ہووے جہڑی اپنی رہتل’ اپنے وسیب نال جنی جڑی ہووے گی اوہ اوہنی ای ارفع و اعلیٰ قرار پاندی اے تے جے شاعر ایس رہتل دا خود وی اک کردار رہیا ہووے یعنی اوہ شنید دے بجائے دیدن والے منصب اتے فائز رہیا ہووے تے تخلیقی نتائج سونے اتے سہاگہ دا مقام حاصل کر لیندے نیں۔
قیصر محمود گورائیہ دے ”لُوں لُوں رچیاں پیڑاں” توں پہلاں وی پنجابی دیاں چار کتاباں ”جد وچھڑے ساں” رتاں پرت پئیاں’ دو چڑیاں بولدیاں تے ”نیوندرا”منظر عام اتے آ کے داد و تحسین وصول چکیاں نیں لیکن ”لوں لوں رچیاں پیڑاں” میں موصوف نے اپنے ولوں ”اسی دی دہائی دے پنجاب دی اٹھ پہر” دے زیر عنوان اظہار کردیاں
ایس امر دا شدت نال احساس دوایا اے کہ نہ صرف پنجاب دی رہتل ایہدے لوں لوں وچ رچی وسی اے بلکہ قیصر محمود گورائیہ ایس تناظر وچ زمین دی پاتال تک اتریا ہویا اے۔ ایہو وجہ ا ے کہ جدوں ایہناں اٹھ پہراں دی تفصیل بیان کردا اے تے اوہدے تے تصنع یا اوپرے پن دا شبہ تک نہیں ہوندا۔
ایہدے برعکس اوہنوں پڑھدے ہوئے ایہہ
احساس زور پھڑ جاندا اے کہ الفاظ’ الفاظ نہیں رہے بلکہ آئنہ خانہ دی صورت وچ ڈَھل گئے نیں چنانچہ کتاب پڑھدے ہوئے تصویری منظر اکھاں دے سامنے گھم گھم جاندے نیں لیکن شرط ایہہ اے کہ کتاب دے مطالعہ توں پہلاں ”اسی دی دہائی دے پنجاب دے اٹھ پہر” دا پڑھنا ضروری اے۔ ایہو رویہ اسی کتاب دی ماسٹر دی (Master Key) اے۔