گلگت بلتستان دی خوش قسمتی

بندیاں وانگوں کائنات دی ہر زندہ شے نوں دیکھ بھال’ آرائش تے نکھار دی خواہش ہوندی اے۔ قدرت دے سنبھالن دا اپنا نظام وی ہمیشہ متحرک رہندا اے پر انساناں دے اختیار تے ذمہ داری دا تقاضا اے کہ اوہ آل دوالے کھلرے جہان وچ کھلریاں نعمتاں توں فائدہ چکن تے انساناں دی مداخلت نال ہون والی توڑ پھوڑ دی مرمت کرکے اوہناں دی اصل خوبصورتی بحال رکھن۔ گلگت بلتستان بڑے سوہنے علاقے دا ناں اے۔ سادگی’ حسن تے خیر دی جھلک صرف قدرتی نظاریاں وچ نہیں سگوں اوتھوں دے باشندیاں دی فطرت تے مزاج وچ وی شامل اے۔ ان گنت خوبصورتیاں’ صلاحیتاں تے عالمی ریکارڈ دے حامل مقامات دی سرزمین نوں کئی چیلنجاں دا سامنا رہیا اے۔ دشوار گزار راہواں تے موسم دی شدت نے تعلیم’ کھیڈ تے ثقافتی سرگرمیاں نوں متاثر کیتی رکھیا۔ دھرتی تے دلاں دی پکار تے بڑے متحرک تے درد دل رکھن والے محی الدین احمد وانی نوں اوتھے چیف سیکرٹری تعینات کیتا گیا تے علاقے دی قسمت جاگ اٹھی۔ سکردو تے گلگت جان دا اتفاق ہو چکیا اے ایس لئی اوتھوں دے لوکاں دی خوبصورت فطرت تے اوہناں نوں درپیش مسئلیاں بارے واقف آں۔ ایہ لوک اپنائیت دا پیکر نیں تے میرا ایہناں نال اک محبت تے احترام دا رشتہ اے ہمیشہ ایہناں لئی دعاگو رہنی آں۔
اج کل سوشل میڈیا تے جی بی دے وکھووکھ لوکاں تے محکمیاں ولوں شیئر کیتیاں گئیاں وکھووکھ اقدامات دیاں فوٹواں ویکھ کے دل خوش ہوندا اے۔ تعلیم دی ترجیح’ تعلیمی اصلاحات لئی فنڈ نوں تن گنا ودھان توں ظاہر ہوندی اے۔ پچھلے ورھے دے تن سو ملین دے مقابلے وچ ہن تک 922 ملین جاری کیتے جا چکے نیں۔ پرائمری طلبہ دی صحت و بہبود لئی روزانہ دی بنیاد تے کھانا دین دے نال نال سکول وچ بی ایم آئی تے اکھاں دی بینائی دے ٹیسٹ دی سہولت وی اے جہدے نال طالب علماں دے اندراج دی شرح وچ ڈھیر وادھا ہویا۔ 19 ویں صدی دے ماحول وچ 21 ویں صدی دے طلباء لئی ماحولیاتی نظام نوں وڈے پیمانے تے بہتر کیتا گیا اے تے اوہناں نوں ساریاں بنیادی سہولتاں دتیاں گئیاں نیں۔ عمارتاں دی کمی پاروں کھلے اسمان تھلے تعلیم حاصل کرن والے طلباء نوں موسم دی شدت توں بچان والے بنے بنائے خیمہ سکول متعارف کرائے گئے۔ ابتدائی طور تے 10 سکولاں وچ ایہ سہولت دتی گئی جہدے وچ مسلسل وادھا کیتا جا رہیا اے۔ صرف چار مہینے وچ گلگت بلتستان وچ تن سو توں ودھ کمپیوٹرلیبز’ لائبریریاں تے مصنوعی ذہانی دے کیمپ لائے گئے۔ بجلی دی کمی پاروں دو سو کمپیوٹر لیبز نوں شمسی توانائی توں مستفید کیتا جا رہیا اے۔ تقریباً 40 سکولاں وچ بلینڈ ڈلرننگ سمارٹ کلاساں قائم کیتیاں گئیاں نیں۔ ٹیکنالوجی’ انجینئرنگ تے کمپیوٹر دے مضموناں دی بہتر تدریس لئی 200 ٹیک فیلوز دی خدمات حاصل کیتیاں گئیاں نیں۔ ہائر سکینڈری تے کالج دے طلبا وچ صلاحیت پیدا کرن لئی جدید ٹیکنالوجی دا استعمال سلاہن جوگ اے تاں جے اوہ ملک دیاں اعلیٰ یونیورسٹیاں وچ داخلے دے اہل ہو سکن۔ عورتاں نوں محفوظ آمدورفت دین لئی حکومت خصوصی پنک بس سروس دا پربندھ کر رہی اے۔ معیاری کیریئر کونسلنگ لئی موبائل ایپ دی سہولت وی دتی گئی اے۔
گلگت وچ این سی اے کیمپس دے قیام لئی 35 کنال اراضی دی منظوری دتی گئی اے تے ایہنوں اک ورھے وچ تعمیر کیتا جاوے گا۔ گلگت بلتستان دی تریخ وچ پہلی واری NUST تے NCA دا انٹری ٹیسٹ تے منتخب طلبا دے انٹرویو لئی مقامی طور تے سہولت دتی گئی۔ چنگی کارکردگی وکھان والے ٹاپ 5 دی فیکلٹی سکولاں نوں اوہناں دی بنیادی تنخواہ دا 3گنا تے اگلے پنج نوں 2 گنا دتا جاوے گا۔ سرکاری سکولاں وچ استاداں دی کمی نوں پورا کرن لئی حال ای وچ 700 استاداں نوں بھرتی کیتا گیا اے۔ فیڈرل پبلک سروس کمیشن دے امتحان راہیں ایہناں استاداں نوں منتخب کیتا گیا۔ استاداں دی پیشہ ورانہ تربیت لئی آغاخان یونیورسٹی پروفیشنل ڈویلپمنٹ سنٹر دی معاونت حاصل کیتی گئی اے۔ جی بی کیریئر فیسٹ 2022 دی شاندار تقریب وچ سائنس’ ٹیکنالوجی’ موسیقی تے دوجے فنون دے شعبیاں وچ سکالرشپ دے بارے بریفنگ دتی گئی۔ ابتدائی طور تے خطے دے دس سکولاں نوں ہائی ٹیک سکھن دیاں تھاواں دتیاں گئیاں نیں۔ گلگت تے سکردو وچ ٹیکنالوجی پارک کھول کے وڈا قدم اٹھایا گیا اے۔ نوجواناں وچ آئی ٹی تے فری لانسنگ نوں فروغ دین لئی آئی ٹی پروفیشنلز دی خدمات حاصل کیتیاں گئیاں۔ کئی ورھیاں توں طبی ماہرین دی کمی نوں پورا کرن لئی شفا انٹرنیشنل توں 66 طبی ماہرین نوں بھرتی کیتا گیا اے۔ گلگت بلتستان وچ ذہنی صحت’ خاص کر خودکشی دے واقعات اک وڈا مسئلہ رہیا اے جہدے تے قابو پان لئی آغاخان یونیورسٹی دے ماہرین دماغی صحت لئی اک جامع پروگرام تے کم کر رہے نیں۔ اعلیٰ تعلیم یافتہ ماہرنفسیات دی خدمات حاصل کیتیاں نیں۔ 10 تے 5 بیڈ وارڈ وی بنائے گئے نیں۔
سمارٹ فون تے مبنی سیاحتی ایپلی کیشن اک قابل قدر اقدام اے۔ ایہ پروگرام پرکشش تھاواں’ واقعات’ ہوٹل دی بکنگ دے حوالے نال سیاحواں دی سہولت دا کارن بنے گا تے مقامی کاروبار تے ثقافت دے فروغ دا راہ ہموار ہووے گا۔ گلگت بلتستان سپورٹس 2022 وچ علاقے دیاں کڑیاں نے کرکٹ’ ہاکی’ باکسنگ تے ٹیبل ٹینس سنے وکھووکھ کھیڈاں وچ حصہ لیا۔ پیسان’ نگر وچ دنیا دے سب توں اچے قدرتی کرکٹ گرائونڈ وچ کرکٹ فیسٹیول دا پربندھ مثالی کارنامہ سی۔ ایہ کرکٹ گرائونڈ خطے لئی آمدنی دا ذریعہ تے دنیا بھر دے سیاحواں لئی کشش دا کارن بن سکدا اے۔ جدوں تسیں حالات نوں بدلن دا عزم کر لوو تے قدرت وسیلے بناندی اے’ رستے ہموار ہوندے جاندے نیں۔ دِلاں چوں نکلن والیاں دعاواں چراغاں وانگوں انھیرے راہ روشن کرن لگدیاں نیں۔ گلگت بلتستان حکومت نے پاکستان تے دنیا وچ خطے دے قیمتی پتھر روشناس کران لئی چنارباغ وچ جیم اسٹون مارکیٹ قائم کیتی اے۔ ایہناں سارے پربندھاں نال صوبے وچ ترقی دے نویں راہ کھلن گے لوکاں دی زندگی سوکھی ہووے گی’ عورتاں نوں روزگار ملے گا’ طلبا نوں تعلیم دے چنگے موقع ملن گے۔ یقینا گلگت بلتستان دی ترقی تے خشحالی ملک دے دوجے صوبیاں لئی اک مثال ثابت ہووے گی۔٭