کچے ذہن پکیاں گلاں

پھول خوشبو کے نشے ہی میں بکھر جاتے ہیں
لوگ پہچان بناتے ہوئے مر جاتے ہیں
جن کی آنکھوں میں ہوں آنسو انہیں زندہ سمجھو
پانی مرتا ہے تو دریا بھی اتر جاتے ہیں
دنیا دا چلن کجھ انج ای اے۔ قدم قدم تے مشاہدہ ہوندا اے تے تجربہ وی’ پر انسان مچھی وانگوں پتھر چٹ کے ای واپس آندا اے۔ کہندے نیں خواب تے فیر اوہ اے جو تہانوں سون نہ دیوے تسیں اپنی کوشش نال اوس خواب نوں تعبیر نال آشنا کر دیو۔ اج دا نوجوان تذبذب دا شکار اے اوہنوں اکھ کھولدے ای منافقت دا سامنا کرنا پیا جدوں منزل دی سمت نمائی نہ ہووے تے فیر مس گائیڈڈ میزائل وانگوں نوجوان خطرناک ہو سکدا اے اسیں اپنی سمجھ دے مطابق اوہنوں سمجھان دی کوشش کر رہے آں۔ میرے بیٹے وانگوں اکثر لوکاں دے بچے اوہناں اگے سوال ضرور کردے نیں کہ ابو ایہ نوازشریف باہر کیوں بیٹھے ہوئے نیں اوہ باہر بیٹھے اپنی پارٹی دے لوکاں نوں ریموٹ کنٹرول نال ہدایتاں کیوں دیندے نیں اوہ اپنی ای حکومت وچ اپنے وطن واپس کیوں نہیں آندے مریم وی اوتھوں دیاں ہو کے رہ گئیاں نیں۔ کچے ذہن بڑیاں پکیاں گلاں کرن لگ پئے نیں اسیں اوہناں نوں کیہ جواب دیئے کہ اوہ ایہ وی پچھن لگدے نیں کہ ایہ لوک اکثر عیداں وی برطانیہ وچ کردے نیں’ کاروبار وی باہر’ علاج وی باہر تے آخر ایتھے صرف کمان آندے ای نیں۔ ایہ بڑی گہری گل اے کہ باہر دا کاروبار وی اوہناں دے ایتھے اقتدار تے مدار کردا اے۔ اسیں لکھ اوہناں نوں سمجھان دی کوشش کریئے کہ عدالتاں تے ہے نیں تے اکثر جج وی اوہناں دے نوازے ہوئے نیں اوہ ایہ گل وی کردے نیں کہ لیڈر تے ہمیشہ قنون تے آئین دی جنگ لڑدا اے۔ ایہ لیڈر نہیں سرمایہ دار نیں تے ڈرائنگ روم دے لوک نیں ایہناں دی زندگی وچ اوہ بانکپن نہیں مینوں ایتھے مولانا مودودی یاد آ گئے کہ جدوں اوہناں دے جلسے تے حملہ ہویا تے جانثار آل دوالے آ کے کہن لگے مولانا تسیں تھلے بہہ جائو۔ اوہ کہن لگے میں بہہ گیا تے کھڑا کون رہوے گا۔
موت نوں سامنے ویکھ کے وی مولانا عبدالستار خاں نے معافی نہیں منگی یعنی اپیل نہیں کیتی حالاں کہ بھٹو دا معاملہ وی سامنے دا اے اوہ نہیں جھکیا۔ طفیلی لوک پاکستان دے وسیلے کھا گئے تے مسئلے در مسئلے پیدا کر کے گئے ایہ جونکاں نیں جو چمڑیاں ہوئیاں نیں ایہ فاسد لہودی تھاں سارا لہو ای پی گئیاں نیں ایہ آپ یعنی تعلم خود ای نہیں لٹدے سگوں پوری پتی اُتے وی گھلدے نیں۔ ایہناں دے نال اوہ صحافی تے دانشور وی نیں جو اوس ویلے چیخ اٹھے سن جدوں عمران خان دے دور وچ اوہناں دیاں منتھلیاں بند ہوئیاں۔ اک نے تے صاف کہہ دتا کہ ساڈی کن پٹی تے ریوالور رکھ کے کسے دی امیج میکنگ کروائی گئی۔ میرا خیال اے کہ ہن امیج دوبارہ خراب کرن دے وی اوہ پیسے پھڑ بیٹھے نیں۔ جتھوں تک میں سمجھنا واں ایتھے کسے نوں چلن ای نہیں دتا جاندا ہن سب کجھ واضح اے کہ الیکشن ویلے دی ضرورت اے پر ایہ بعداز خرابی بسیار ہووے گا محسوس وی ہوندا اے کہ انتخابات اگلے چار پنج مہینے تے نہیں ہون والے بھاویں آئین دی روح نال تے 90 دن وچ پنجاب تے کے پی وچ ضمنی الیکشن ہونے چاہیدے نیں پر آئین نوں تے اوہو سمجھدا اے جو ایہدے تے یقین رکھدا اے کہ آئین تے طاقتور دی اکھ وکھاندا اے تاں ای تے کسے نے مشہور کر دتا کہ قنون انھا ہوند ااے حالاں کہ ایہ تے محاورہ اے کہ قنون ساریاں لئی اکوجیہا ہوندا اے پر جائیے تے کتھے جائیے کجھ دے قنون اپنے ہوندے نیں اوہو جو جارج آرویل نے کہیا اوہ سب جانور برابر ہوندے نیں تے کجھ زیادہ ای برابر ہوندے نیں تسیں اپنی زبان وچ کہہ لوو کہ مجھاں مجھاں دیاں بھیناں ہوندیاں نیں بیوروکریسی دا وی ایہو ڈسپلن اے۔ اپنی اپنی ذمہ داریاں توں سارے ماورا نیں ایہ کسے اہم سرکاری بندے نے کہیا سی کہ جے اوہ پیسے پھڑ لوے تے پوری دیانتداری نال کم کروا دیندا اے گل فیر اوتھے آندی اے اج دا نوجوان غصے نال بھریا بیٹھا اے مکمل بیروزگاری کسے وی ادارے وچ کوئی وی کم بناں رشوت تے سفارش دے نہیں ہوندا سگوں سفارشاں وی وکدیاں نیں۔
حل نکالا ہے یہ اداسی کا
اب مکمل اداس رہتا ہوں
صدر عارف علوی نے چنگی گل کیتی اے کہ سارے سٹیک ہولڈر بہہ کے انتخابات تے گل کرن پر نظر آ رہیا اے کہ پی ڈی ایم انتخاب نوں موخر کرن دے موڈ وچ اے کہ اوہناں دے ہتھ وچ کجھ نہیں۔ اوہ کس منہ نال اپنے ووٹراں دے کول جان گے جیویں جیویں ویلا لنگھ رہیا اے اوہناں لئی مشکل ہوندا جا رہیا اے تے قومی نقصان وی ہو رہیا اے مہنگائی تے بے چینی تے عمران نوں لے ڈبی سی آن والیاں نے آ کے نال لوکاں نوں وی ڈوب دتا۔ لوک تے ایہ سمجھے سن کہ ایہ اوہناں دا ہتھ پھڑن آئے نیں۔ کہہ رہے نیں کہ نوازشریف اک مہینے وچ آ رہے نیں پر دل نہیں مندا اوہناں دا آنا لازم وی ایس لئی اے کہ ہن حد ہو چکی اے ن لیگ دا ووٹر بری طرح بے دل ہویا اے ایہ وی کہیا جا رہیا اے کہ ن لیگ تے پیپلزپارٹی رَل کے الیکشن لڑن گے موجودہ صورتحال وچ ایہ فیر وی ہر جان گے۔ پیپلزپارٹی پنجاب وچ نہ ہون دے برابر اے تے اوہ سندھ حکومت نوں ہتھوں نہیں جان دیوے گی تسیں حکومتی خوف دا اندازہ ایہدے توں ای لا سکدے او کہ قومی اسمبلی آن دا ڈراوا دے کے عمران نے اوہناں دیاں نیندراں اڑا دتیاں تے ایسے ڈر وچ پی ٹی آئی دے استعفے منظور کر لئے گئے کنہوں نہیں پتہ کہ ہن تک جناب سپیکر قنونی تے آئینی گلاں کر رہے سن۔٭