ربّوں روٹی تھوڑی نہیں

اللہ پاک نے تے انسان دے سِر تے اشرف المخلوقات دا تاج سجا کے،لکھاں کروڑاں صلاحیتاں تے خوبیاں دے کے دنیا اتے گھل دِتا پر اگوں انساناں دے ای بھیڑے تے جانوراں ورگے کرتوتاں ایس عظیم تے اللہ پاک دے بنائے شاہکار انسان نوں ذلیل کرکے رکھ دِتا اے۔اج اسیں اپنے ملک پاکستان تک ای رہ کے ویکھئے سوچئیے تے گل کھل کے سامنے آجاندی اے۔خدا پاک دی ذات نے جیکر انسان نوں دنیا اتے گھلیا اے تے اوہدے لئی ان گِنت نعمتاں وی بنائیاں نیں۔پر کچھ انساناں دے اندر دی منافقت،کمینگی تے فرعونیت نے ایہ نعمتاں انساناں لئی تنگ تے ناممکن جہیاں کرکے رکھ دِتیاں نیں۔جسراں کہ ساڈے اِک مِتر اچے سچے شاعر جناب عصمت اللہ سیکھو آکھدے نیں کہ
ربوں روٹی تھوڑی نہیں
بندے صحیح ورتان تے سہی
ساڈا ملک پاکستان قدرتی وسائل نال بھریا ہویا اے،پر ساڈے حکمران ہمیشہ دِل دے کھوٹے تے نیت دے کوڑھے نیں۔رب دے دِتے ایہناں وسائلاں نوں ٹِھیک طرحاں ملک تے قوم لئی ایہناں نوں ورت نہیں رہے۔بلکہ بدنیتی تے منافقت توں فیدا چکدے ہوئے بھاری کمیشن کھان لئی ایہناں وسائلاں نوں بعض ویلے”چوراں دے کپڑے تے ڈانگاں دے گز”دی طرحاں دوجے ملکاں نوں سستے ویچ کے اپنے ملک اندر بھکھ تے تنگی پیدا کردیندے نیں۔بجلی تے گیس دی کمتی نے عوام نوں پریشان کرکے رکھ دتا اے۔دنیا بھر دے دوجے کئی ملکاں اندر حکمران ملک تے قوم دی ترقی لئی کِیہ کچھ پاپڑ ویلدے تے جتن کردے نیں،پر ساڈے ملک اندر حکمران اپنے مطلب کڈھن تے فیدے چکن لئی عوام نوں ورتدے نیں۔ ایتھے سیا ست داناں دا ایہ حال اے کہ کتی چور رلے ہوئے تے عوام ”رلے” ہوئے نیں۔ ایتھے سیاستدان سیاسی ہار جِت لئی عوام نوں لڈو دِیاں گوٹِیاں تے تاش دے پتیاں دی طرحاں ورتدے نیں۔بجلی دے ڈیماں تے گیس دے کھوہواں تے پائپاں اگوں جیکر بیوروکریسی تے سیاستداناں دی منافقت تے بدنیتی دیاں رکاوٹاں ہٹا دِتیاں جان تے بجلی تے گیس ساتھوں مک نہیں سکدی۔گل اوہو ای عصمت اللہ سیکھو والی کہ”ربوں روٹی تھوڑی نہیں”بندے ای کمینے،کھچاں تے چولاں ٹکر گئے نیں۔دنیا بھر دے دوجے کئی ملکاں تے سماجاں اندر ملکی قانون تے انسانی فیدے لئی بنائے گئے سماجی اصولاں نوں مذہب جہیا مقام دتا جاندا اے،کیونکہ اوہدے نال عوام دے سکھ سہولتاں تے موجاں جڑیاں ہندیاں نیں۔تے ایسے ای گلوں اوہ قوماں دِنوں دِن ترقی کردیاں جارہیاں نیں۔عوام نوں عزت والا اچا مقام دِتا جاندااے۔ہر قانون عوام دی سہولت لئی بنایا تے اوس تے عمل کروایا جاندا اے۔ پر ایتھے بنائے گئے قانون اندر من مرضی دِیاں شرطاں تے ضابطے شامل کرکے قانون نوں عوام لئی پیچیدہ تے گنجھلدار بنا دتا جاندا اے۔ہر قانون اندر سیاست واڑ دِتی گئی اے۔عوام نوں سیاسی لیڈراں دا متھاج بنا کے رکھیا جاندا اے،تاں جے لوک مجبور ہوکے ایم پی اے،ایم این اے تے گلی محلے دے چوہدریاں اگے جھکدے رہن تے سیاست دا دِیوا جگدا رہوے۔جہدے وچ عوام دیاں مجبوریاں دا تیل بلدا اے۔تے ایس دِیوے دی لاٹ اندر مجبور تے بھکھ مارے لوکاں دی “بھکھ” جابر حکمران اگے کسے ماڑے دے کمبن وانگ کمبدی رہندی اے۔ایتھے اپنے اپنے فیدیاں لئی سیاسی دھڑیاں دی جنگ چتے پہر چِھڑی رہندی اے پر عوام وچارے اِک دوجے سیاسی دھڑے دا مونہہ تکدے رہندے نیں،کہ ساڈا دکھڑا کون سنے گا۔اِک دھڑے توں مایوس ہندے نیں تے دوجے دے بوہے جا کنڈی کھڑکاوندے نیں۔جِسراں کہ انور اداس آکھدے نیں۔
بڑا سنیا اے اوہدے عدل دا چرچا زمانے تے
چلو زنجیر اوہدی وی ہلا کے ویکھ لینے آں
پر عوام نوں کِدیوں وی کدی وی خیر نہیں پئی،جیہڑے وی بوہے یاں دربار دی زنجیر ہلاندے نیں،اوہ زنجیر عوام دے گلاں تے پیراں لئی بیڑیاں بن جاندی اے۔ملک پاکستان قدرتی وسیلیاں تے نعمتاں نال بھریا ہویا اے پر ایہ سارے وسائل منافق، لالچی،ڈِھڈ دے غلام تے تاجر حکمراناں دی مٹھ وچ نیں۔ایسے لئی حضرت مولا علی کرم اللہ وجہ نے فرمایا سی تاجر حکمران نہیں ہونا
چاہیدا۔کہ رعایا دی بھکھ،دکھ تے مجبوری اتے وی تجارت تے سودے بازی کیتی جاوے۔عوام جے اج وی اپنے اندروں اکلے اکلے فیدے چکن دی گھٹیا سوچ دی بجائے”ایکتا” تے قومی سطح دی سوچ رکھ کے سچ نوں سچ تے جھوٹھ نوں جھوٹھ من کے اپنے ووٹ دا فیصلہ کرن تے ملک اندر”تند نہیں تانی وِگڑی ہوئی”دے گندے تے مطلبی جہئے نظام دا اپا مکا ہوسکدا اے۔دعوے نال کہیا جاسکدا اے کہ ایسراں کرکے صدیاں دا وِگڑیا نظام کجھ سالاں وچ ٹھیک ہوسکدا اے۔جے نہیں تے فیر قیامت تیک وی ٹھیک نہیں ہوسکے گا۔اسیں اپنے اپنے نِکے نِکے فیدے لئی ظالم تے منافق لیڈراں نوں”دیوتا”من کے اوہناں نوں کامیاب کروا کے پورے نظام دا بیڑا غرق کردینے آں۔چنگی طرحاں ایہ جان دے ہوئے وی کہ ایس پارٹی یاں ایس لیڈر وچوں ملک دشمنی دی چھاہن تے بو آرہی اے۔پر اسیں وقتی طور تے اپنا نک گھٹ کے پورے ملک تے عوام دا گل گھٹ دینے آں۔پر اپنی گندی تے مطلبی جہئی سوچ توں باز نہیں آوندے۔٭