وطن پکار رہیا اے

مظہر برلاس

آئی ایم ایف نال حکومتی مذاکرات جاری نیں ایہناں مذاکرات وچ ایہ طے کیتا جا رہیا اے کہ پاکستانی لوکاں دیاں زندگیاں وچ ہور اوکڑاں کیویں لیاندیاں جا سکدیاں نیں۔ ایس گورکھ دھندے تک اپڑن وچ 34 ورھے لگے نیں‘ آئی ایم ایف ایہناں 34 ورھیاں وچ حکومتاں دے نال رَل کے اوکڑاں وچ وادھا کردا رہیا اے تے ہن حالات ایتھوں تک اپڑ گئے نیں کہ پاکستان اپنی بدترین معاشی صورتحال وچ پھسیا اے ایس صورتحال وچ کجھ وی ہو سکدا اے۔ آئی ایم ایف دے نال ایہناں 34 ورھیاں وچ صرف چا رورھے اجہے سن جدوں اسیں آئی ایم ایف تو ںدور رہے۔ ایہ چار ورھے اوہ سن جدوں ایتھے پرویزمشرف مرحوم دی حکومت سی۔ مشرف تے تنقید کرن والیاں نوں سوچنا چاہیدا اے کہ جس بندے تے اوہ دن رات تنقید کردے نیں اوہدے دور وچ ڈالر صرف سٹھ روپیے دا سی اوہدے دور وچ ای اوہ چار ورھے آئے جدوں اسیں آئی ایم ایف دے شکنجے چوں آزاد سی۔
موجودہ حکمران آئی ایم ایف دے نال رَل کے عوامی زندگی تے شکنجہ کسن دی تیاری کر رہے نیں۔ آن والے دیہاڑیاں وچ پٹرول ہور مہنگا ہو جاوے گا بجلی وی مہنگی کر دتی جاوے گی تے ایہناں دو چیزاں دے مہنگا ہون دے بعد زندگی دیاں باقی ساریاں لوڑ دیاں شیواں وی مہنگیاں ہو جان گئیاں۔ مہنگائی اینی ہو جاوے گی کہ لوکاں تے عرصہ حیات تنگ ہو جاوے گا لوکاں دی قوت برداشت جواب دے جاوے گی۔ ڈر اے کہ آن والے دیہاڑیاں وچ مظاہرے ہون گے تے ایہناں مظاہریاں توں ہنگامے پھٹ پین گے جو معاشی صورتحال اج اے اوہ اک ورھے پہلاں نہیں سی۔ اک ورھے پہلاں لوک روٹی نوں نہیں سن ترس رہے تے اینے بھیڑے معاشی حالات دا شکار نہیں سن جو بھیانک صورتحال اج اے اوہ اک ورھے پہلاں تے بالکل وی نہیں سی‘ بیروزگاری وی اجہی نہیں سی‘ کاروبار وی ایس طرح بند نہیں سن فیکٹریاں وی انج بند نہیں سن۔ پچھلے یاراں مہینیاں وچ کیہ توں کیہ ہو گیا‘ ساڈا زرمبادلہ کناں تھلے آ گیا‘ کجھ لوک ہن وی جھوٹ بول رہے نیں کیوں جے اوہ لوکاں نوں انھیرے وچ رکھنا چاہندے نیں میری اوہناں اگے درخواست اے کہ گھٹ توں گھٹ لوکاں دے سامنے سچی تصویر تے رکھو کہ تہاڈی دن رات دیاں کاوشاں نال ملک مشکل ترین دور وچ داخل ہو رہیا اے۔ میں کسے پچھلے کالم وچ لکھیا سی کہ میرے نزدیک اپنے وطن چوں پیسہ چوری کر کے لے جانا غداری دے مترادف اے جو لوک وی ایس ملک چوں پیسہ چوری کرکے لے گئے اوہ ایس پیارے پاکستان دے دوست تے بالکل وی نہیں ہو سکدے۔ساڈے پیارے وطن نوں وی کیسے حکمران ملے نیں کہ اوہ ایس پیاری دھرتی توں پیسہ چوری کرکے باہر لے جاندے نیں تے نال ای اوورسیز پاکستانیاں اگے اپیل کردے نیں کہ اپنے پاکستان دا خیال کرو‘ ایتھے رقم گھلو‘ شاید اجہے کسے موقعے لئی غالب نے کہیا سی کہ:
اس سادگی پہ کون نہ مر جائے اے خدا
میری اجہے سارے لوکاں اگے درخواست اے کہ اوورسیز پاکستانیاں اگے اپیل کرن دی تھاں اوہ دولت ملک وچ لے آئو جو تسیں لٹ کے لے گئے سی۔ اوہ سارے لوک جو ایتھوں لٹ مار کرکے دولت باہرلے ملک لے گئے سن اوہ جے اپنی دولت پاکستان واپس لے آن تے ساڈے حالات بالکل بدل سکدے نیں اسیں معاشی ابتری چوں باہر نکل سکنے آں دولت باہر لے جان والیاں وچ بھاویں اکثریت سیاستداناں دی پر ایہناں وچ سول و عسکری بیوروکریسی دے لوک وی شامل نیں کجھ کاروباری بندے وی اجہے نیں جو ایتھوں لٹ مار کر کے اپنی دولت بیرون ملک لے گئے۔ ایہناں لوکاں نوں جے اپنے وطن نال پیار اے تے فیر ایہ لوک اپنی دولت ملک وچ واپس لے آن کیوں جے ایس ویلے وطن دی ایہو پکار اے۔
موجودہ وگڑدی ہوئی معاشی صورتحال وچ ساڈے معاشرتی حالات وی ناقابل بیان حد تک خراب ہو چکے نیں۔ اخلاقیات دا جنازہ نکل چکیا اے معاشرے وچ چوریاں تے ڈاکے عام ہو چکے نیں۔ اغوا برائے تاوان تے بھتے دے واقعات ودھ گئے نیں۔ جرائم دی شرح بہت حد تک ودھ گئی اے ایہ جرائم یقینا معیشت دی کوکھ چوں نکلے نیں ایس لئی ضرورت ایس گل دی اے کہ سانوں معاشی حالات ٹھیک کرنے چاہیدے نیں۔ لوکاں نوں دھوکھے وچ نہ رکھو لوکاں لئی تسیں کجھ نہیں کر سکدے تے فیر وی لوکاں نال سچ تے بول دیو‘ دس یاراں مہینیاں توں تماشا لگا ہویا اے بقول افتخار عارف
بکھر جائیں گے ہم کیا جب تماشا ختم ہو گا
مرے معبود آخر کب تماشا ختم ہو گا
چراغِ حجرہ درویش کی بجھتی ہوئی لو
ہوا سے کہہ گئی ہے اب تماشا ختم ہو گا
کہانی آپ الجھی ہے کہ الجھائی گئی ہے
یہ عقدہ تب کھلے گا جب تماشا ختم ہو گا