فرد معاشرہ تے خاطرداری

یہ جو پرشکستہ ہے فاختہ،
یہ جو زخم زخم گلاب ہے
یہ ہے داستاں میرے عہد کی
جہاں ظلمتوں کا نصاب ہے
میری جان ہونٹ تو کھول تو
کبھی اپنے حق میں بھی بول تو
یہ عجیب ہے تری خامشی ہے
یہ سوال ہے کہ جواب ہے
موجودہ حشرسامانیاں وچ کسے نوں کجھ نہیں سجھدا۔ اک بے حسی ورگی کیفیت اے۔ انج لگدا اے کہ جیویں لوکاں وچ بولن دی ہمت نہیں رہی۔ ساڈے دوست ملک سعید بڑے فکرمند سن اوہناں دا کہنا سی کہ ڈبدی ہوئی معیشت دی وجہ نال کیہ ہوئی جا رہیا اے۔ اوہناں دی گل سوفیصد ٹھیک اے کہ پتہ نہیں لوک کس گل دا انتظار کر رہے نیں۔ ساڈیاں کرتوتاں پاروں اللہ تعالیٰ وی متوجہ نہیں ہویا۔ تسیں اک لمحے لئی حالات دی غیرسنجیدگی تے بے معنویت دا اندازہ لائو کہ شہبازشریف فرما رہے نیں کہ اوہ مہنگائی تے چھیتی قابو پا لین گے تے دوجا ایہ کہ جدوں وی الیکشن ہووے گا ن لیگ ای جتے گی۔ ایہدے وچ لامحدود گنجائش اے۔ تسیں مہنگائی تے کنٹرول دی بعد وچ گل کرو۔ انتخاب کران توں تے تہاڈی جان اندی اے جو گڈیا سی اوہ کٹنا وی تے تسیں آپ ای اے۔
سب ڈرامے ہو رہے نیں۔ پتہ لگا کہ مریم نواز دے استقبال دیاں تیاریاں ہو رہیاں نیں تے ایہدے لئی باقاعدہ ٹیماں تشکیل دتیاں جا رہیاں نیں۔ بندہ پچھے کہ اوہ کہڑا کارنامہ سرانجام دے کے آ رہیاں نیں۔ انج ای مینوں جاویدہاشمی یاد آ گئے کہ جدوں نوازشریف اوہناں تے پارٹی دی ذمہ داری پا گئے سن تے سیدزادہ ساریاں اوکڑاں برداشت کردے ہوئے جیل وچ رہیا تے جدوں ایہ باغی رہا ہویا تے ن لیگ دے کرتا دھرتا نے اوہناں دے استقبال لئی وی کمیٹیاں تشکیل دتیاں سن تے ایہ وی کہیا گیا سی کہ بس ذرا حساب کتاب نال ای اوہناں نوں جیل باہر لیاندا جاوے۔ حاشیہ بردار تے درباری وچارے ہور کرن وی کیہ کہ ایہناں خاندان دی آل اولاد دیاں بلاواں لینا اوہناں تے فرض اے تے ایہ فرض کفایہ وی نہیں۔ اک درس دی محفل وچ ملکی سیاست تے بڑی چنتا دا اظہار ہو رہیا سی تے ہر پاسیوں صرف اک گل تے ساریاں نوں متفق پایا کہ لے دے کے اک کراچی اے جتھے لوکاں نے اپنے حق وچ آواز بلند کیتی اے تے جماعت اسلامی دا پلیٹ فارم استعمال کیتا اے۔ پیپلزپارٹی دی حکومت دے خلاف ورھیاں دی اک نفرت لوکاں دے دلاں وچ موجود اے تے ایہ لوک عوام نوں بائی پاس کردے نظر آ رہے نیں ایہو تے ایہناں دا ماٹو اے کہ جمہوریت سب توں وڈا انتقام اے۔ ایہ ایہناں دی جمہوریت اے۔اتفاق نال میں حافظ نعیم الرحمن دی پوری تقریر سنی۔ اوہناں دا کہنا سی کہ اوہ تے اللہ دی رضا لئی تے لوکاں دی خدمت لئی باہر نکلے نیں۔ مظلوم لوکاں نوں اوہناں دا حق دوان گے۔ اوہ کرپشن کرکے مال بنان نہیں آئے۔ اوہ خلق خدا نوں سہولت دین نکلے نیں۔ اوہناں دے کسے ساتھی تے اک وی کرپشن وغیرہ دا الزام نہیں۔
ہن ذرا گل بندے تے شعور دی ہو جاوے کہ ایہدے تے حمید حسین نے بھرویں گل بات کیتی کہ فرد بڑا اہم اے سگوں ایہو اصل اکائی اے۔ ایہو کردارسازی کہ بندے نوں تراش کے ہیرا بنایا جاوے۔ جے بندا ای مایوس ہو کے یاں دلبرداشتہ ہو کے بہہ جاوے گا تے تبدیلی یاں بہتری کیویں آوے گی۔ ساڈے ایتھے افراط و تفریط اے۔ اصل وچ فرد ای اجتماعی سطح تے جا کے اثرانداز ہوندا اے۔ جیویں فرد تیار کیتا جاوے انج ای معاشرہ نصیب ہووے گا پر عین اوس ویلے اجتماع نوں وی اُکا نظرانداز نہیں کر سکدے۔ دوویں لازم و ملزوم نیں۔ افراد تے نظم دے مصرعیاں وانگوں ہونے چاہیدے نیں جو نظم نوں مربوط کرن تے اوہدا حصہ بنن۔ اقبال نے کیہ خوبصورت مثال وکھائی:
فرد قائم ربط ملت سے ہے تنہا کچھ نہیں
موج ہے دریا میں اور بیرون دریا کچھ نہیں
امربالمعروف دے نال نہی عن المنکر وی لازم اے۔ فرد جے دوجے فرد دا خیال کردا اے تے ایہ خوبصورت معاشرہ اے تے خوبصورت معاشرہ فرد دے حقوق اوہنوں دیندا اے۔ اکلا فرد کجھ نہیں۔ مصیبت ایہو اے کہ معاشرہ ایس ویلے فرد فرد اے۔ اصل وچ مادہ پرستی اینی اے کہ سارے اپنے اپنے مفادات دے غلام نیں۔ اوہ کوئی وی ہووے اپنی ذات وچ قید اے۔ بس مینوں میرے حقوق مل جان سگوں دوجیاں دے وی۔ اپنی ذات نوں مرکز من کے دائرے کھچے جا رہے نیں جے میں آں تے ٹھیک نہیں تے سب کجھ جہنم وچ جاندا اے تے جاوے۔ دوجے لفظاں وچ ایہ بے عقل اپنے آپ نوں ضروری سمجھدے نیں حالاں کہ قبرستان ضروری لوکاں نال بھرے پئے نیں۔ رہی تکلیف اوہ نعرہ پرویزمشرف نے لایا سی کہ سب توں پہلاں پاکستان‘ بظاہر چنگا لگن والا نعرہ ملت اسلامیہ تے نظریہ دے خلاف سی۔ ایسے طرح فرد دی آزادی وچ لفظ آزادی تے آندا اے پر ایہ تے فرد نوں اکلا کرن دی سازش اے۔ ایتھوں شخصیت پرستی وی جنم لیندی اے۔
ملت کے ساتھ رابطہ استوار رکھ
پیوستہ رہ شجر سے امید بہار رکھ
ایس گل وچ اک چیز جہڑی لازم اے اہ خاطرداری تے انکساری اے۔ اپنے آپ نوں مفید بنان دی تے دوجیاں نوں آرام دین دی اے۔ ایسے طرح اپنے آپ نوں معاشرے دے نال جوڑ کے اپنا فرض نبھایا جا سکدا اے لاتعلقی تے سوکھی اے۔ دوجیاں دے کم آنا اصل زندگی اے۔ ایہ رویہ سب توں خطرناک اے کہ کوئی سوچ کے ہن کجھ نہیں ہو سکدا۔ اپنے دائرہ کار وچ تے انسان اثرپذیر ہو سکدا اے تے ایہو صحت مند رویہ اے تے ایہ معاملہ چنتاجوگ اے کہ جہاں کتے کھلے ہوں اور پتھر بندھے ہوئے۔ ایہ گل اوہی کہ نیکی کر دریا میں ڈال تے ایہدے لئی دریا دل ہونا وی تے ضروری اے۔حالی دا خوبصورت شعر:
ہم نے ہر ادنی کو اعلی کر دیا
خاکساری اپنی کام آئی بہت