نام نہاد دانشور

کیہ پدی کیہ پدی دا شوربہ! ایہ نام نہاد دانشور اپنی دانشوری سانبھ کے رکھن۔ جہناں دیاں شکلاں نوں ویکھ ویکھ کے اکھاں تھک گئیاں نیں۔ ایہ چہرے شام ہندیاں ای چینلاں تے آ ٹپکدے نیں تے اپنے افلاطونی خیالات نال ایس الم نصیب قوم نوں بہرہ ور کردے نیں۔ اج پچھتر ورھے بعد ایہ قوم نوں دس رہے نیں کہ پاکستان کیوں بنایا گیا سی۔ مقصد وجود دی ایس بحث وچ اوہ بھل جاندے نیں کہ قائداعظم اوہناں توں زیادہ عقل تے فہم دے مالک سن۔ قائداعظم دے کردار تے عظمت دی گرد نوں وی ایہ دانش فروش نہیں اپڑ سکدے۔ ایہ کیویں ممکن اے کہ جہڑی گل اوہناں نوں اج سمجھ آ رہی اے پون صدی پہلاں قائد نوں سمجھ نہ آئی جو بھنور وچ پھسی بیڑی نوں اپنے حوصلے تے فراست نال کھچ کے کنڈھے لیائے سن۔ پاکستان دا مقصد وجود کیہ سی؟ ساڈے اینکراں نوں غیرجانبداری ثابت کرن لئی رنگ برنگے دانشور مل گئے نیں جو اپنے نظریے تے خبث باطن نوں فرمان قائد دا لبادہ پوا کے پیش کردے نیں۔
سدھی جہی گل ایہہ وے کہ جے پاکستان نوں اک سیکولر سٹیٹ بنانا سی تے متحدہ ہندوستان وچ کیہ برائی سی؟ جتھے ہندو‘ سکھ‘ مسلمان‘ عیسائی‘ بودھ حالاں کہ سٹھ توں ودھ قوماں اکٹھیاں رہندیاں سن۔ ایس توں بہتر سیکولر ملک کیہ ہوندا؟ ایہدے وچ کوئی شک نہیں کہ اج دا پاکستان بانیان پاکستان دے خواباں دے مطابق نہیں پر ایہدے وچ وی کوئی کلام نہیں کہ نام نہاد دانشور ایہدی منزل کھوٹی نہیں کر سکدے۔ کوئی اللہ دا بندہ اٹھے تے ایہناں اگے درخواست کرے کہ اوہ کسے اجہے ملک وچ منتقل ہو جان جتھے اوہ اپنے شوق کھل کے پورے کر سکن۔ ایہ اسلامی جمہوریہ پاکستان اے۔ دنیا وچ درجناں لادین ملک اجہے نیں جتھے ایہ دانشور اپنی مرضی نال رہ سکدے نیں۔ انسان نوں اللہ نے آزاد پیدا کیتا اے اوہ اپنی ایس آزادی توں فائدہ چکن ڈیڑھ فیصد توں وی گھٹ اقلیت اک بھاری اکثریت نوں غلام بنا کے اغیار دی جھولی وچ پانا چاہندی اے۔ کیہ پدی کیہ پدی دا شوربا۔ صدی دے رجل عظیم نے کہیا سی انسان دی سب توں وڈی ذلت ایہہ وے کہ اوہ باطل نوں طاقتور ویکھ کے اوہدی غلامی قبول کرن تے تیار ہو جاوے۔ پون صدی دے بعد وی ایہ قوم اغیار دی غلامی قبول کرن تے اسلام دا پلا چھڈن تے تیار نہیں پر ایہ دانشور کہندے نیں کہ امریکہ نوں خدا من لوو سیکولرازم اپنا لوو دنیا وچ اپنا امیج بہتر کر لوو۔
قائداعظم نے 30اکتوبر 1947ء نوں پنجاب یونیورسٹی سٹیڈیم وچ لوکاں نال خطاب کردے ہوئے فرمایا سی۔ اسیں اپنی منزل مقصود آزادی پا لئی اے تے اک خودمختار دنیا دی پنجویں وڈی مملکت پاکستان قائم ہو چکی اے۔ ایس برصغیر وچ رونما ہون والے حالیہ اندوہناک واقعات توں ایہ بالکل واضح ہو جاندی اے کہ کوئی قوم ابتلا تے ایثار دے بناں آزادی حاصل نہیں کر سکدی۔ اسیں بے مثال اوکڑاں تے ماڑی حالت وچ گھرے ہوئے آں۔ اسیں ڈر تے اذیت دے تاریک دیہاڑیاں وچوں ہو کے گزرے آں پر پورے وثوق نال کہہ سکنا واں کہ حوصلے‘ خوداعتمادی تے اللہ دی تائید نال کامیابی ساڈے قدم چمے گی۔ کجھ لوک ایہ سوچدے نیں کہ تن جون دا منصوبہ قبول کرنا مسلم لیگ دی اک غلطی سی۔ میں اوہناں نوں دس دینا چاہنا واں کہ کسے ہور متبادل صورت وچ نتیجے تے عواقب اینے تباہ کن ہوندے کہ اوہناں دا تصور وی نہیں کیتا جا سکدا۔ اپنے ولوں اسیں ایس منصوبے نوں کھلے دل تے نیک نیتی نال عملی جامہ پہنانا شروع کر دتا۔ زمانہ تے تریخ ایہدی گواہی دین گے۔
اسیں اک بڑی گہری تے خوب سوچی سمجھی سازش دا شکار ہوئے جہدا ارتکاب کردے ہوئے دیانتداری‘ شجاعت تے وقار دے بنیادی اصولاں دا وی مطلق لحاظ نہیں کیتا گیا۔ اسیں ایس تائید ایزدی لئی سراپا شکر گزار آں کہ اوہنے طاغوتی قوتاں دا مقابلہ کرن لئی سانوں ہمت‘ حوصلہ تے ایمان دی قوت عطا کیتی۔ ہن میں تہاڈے توں صرف ایناں چاہنا واں کہ ہر بندے تک میرا ایہ پیغام اپڑا دیو کہ اوہ ایہ عہد کرے کہ پاکستان نوں اسلام دا قلعہ بنان تے ایہنوں دنیا دی اوہناں عظیم ترین قوماں دی صف وچ شامل کرن لئی لوڑ موجب اپنا سب کجھ قربان کر دین تے تیار ہووے گا جہناں دا نصب العین اندرون ملک وی تے بیرون ملک وی امن رہندا اے۔ ایہدے نال نال اپنا حوصلہ اچا رکھو۔ موت توں نہ ڈرو‘ ساڈا مذہب سانوں سکھاندا اے کہ سانوں ہمیشہ موت دا استقبال کرن لئی تیار رہنا چاہیدا اے۔ سانوں پاکستان تے اسلام دا وقار بچان لئی اوہدا مردانہ وار سامنا کرناچاہیدا اے۔ صحیح مقصد دے حصول دی خاطر اک مسلمان لئی جام شہادت نوش کرن توں بہتر ہور کوئی راہ نجات نہیں۔ میں ایہ گل ایس ملک دے ہر شہری خاص کر اپنے نوجواناں دے ذہن نشین کر دینا چاہنا واں کہ اوہ دوجیاں دی رہنمائی کرن لئی لگن‘ حوصلے تے استقلال دے صحیح جذبے دا اظہار کرو تے اگوں آن والیاں تے نویں نسلاں لئی اعلیٰ و ارفع مثال قائم کر دیو۔
یاد رکھو! قنون دا نفاذ تے امن دی بحالی ترقی دے لوازمات وچوں نیں۔ اسلامی اصولاں دی روشن وچ ایہ ہر مسلمان دا فرض عین اے کہ اوہ اپنے گوانڈھیاں دی حفاظت کرے تے بلالحاظ ذات پات تے عقیدہ اقلیتاں نوں تحفظ دیوے۔ ہندوستان وچ مسلم اقلیتاں دے نال جو سلوک روا رکھیا جا رہیا اے۔ ایہدے باوجود سانوں ایس گل نوں اپنی عزت و وقار سمجھنا چاہیدا اے کہ اسیں ایس احساس تحفظ پیدا کریئے اپنا فرض ادا کریئے تے اللہ تے بھروسہ کریئے۔٭