مردہ بدم زندہ شدم

شکیل امجد صادق

اک بینک ڈکیتی دوران ڈکیت نے چیک چیک کے ساریاں نوں کہیا کوئی وی نہ ہلے‘ سارے چپ چاپ زمین تے لیٹ جان‘ رقم لوکاں دی اے تے جان تہاڈی اپنی اے۔ سارے چپ چاپ زمین تے لیٹ گئے۔ کوئی اپنی تھاں توں نہیں ہلیا۔ ایہنوں کہندے نیں مائنڈ چینج کانسیپٹ‘ ڈکیتی دے بعد گھر واپس آئے تے ایم بی اے پاس نوجوان ڈکیت نے پرائمری پاس بڈھے ڈکیت نوں کہیا چلو رقم گننے آں۔ بڈھے ڈکیت نے کہیا توں پاگل ہو گیا ایں اینے زیادہ نوٹ کون گنے‘ رات نوں خبراں وچ سن لینا کہ اسیں کناں مال لٹ کے لیائے آں۔ ایہنوں کہندے نیں تجربہ جہڑا کہ اج کل ڈگریاں توں ودھ اہمیت رکھدا اے۔
دوجے پاسے جدوں ڈاکو بینک چوں چلے گئے تے منیجر نے سپروائزر نوں کہیا کہ پولیس نوں فون کرو۔ سپروائزر نے جواب دتا رک جائو سر! پہلے بینک چوں اسیں دوویں اپنے واسطے دس لکھ ڈالر کڈھ لینے آں تے ہاں اوہ چالھی لکھ ڈالر دا گھپلا جو اسیں ایہناں دیہاڑیاں وچ کیتا اے اوہ وی ڈاکوئواں تے پا دینے آں کہ اوہ لٹ کے لے گئے۔ ایہنوں کہندے نیں وقت دے نال ایڈجسٹ کرنا تے مشکل حالات نوں اپنے فائدے دے مطابق استعمال کرنا۔ منیجر ہس کے بولیا ہر مہینے اک ڈکیتی ہونی چاہیدی اے۔ ایہنوں کہندے نیں بوریت ختم کرنا‘ کیوں جے ذاتی مفاد تے خوشی جاب توں ودھ اہم ہوندے نیں۔
اگلے دن اخبارات تے ٹی وی تے خبراں سن کہ ڈاکو بینک چوں سو ملین ڈالر لٹ کے فرار۔ ڈاکوئواں نے بار بار رقم گنی پر اوہ پنجاہ ملین ڈالر توں ودھ نہ نکلی۔ بڈھا ڈاکو غصے وچ آ گیا تے چیخیا اسیں اسلحہ اٹھایا‘ اپنیاں جاناں رسک تے لائیاں تے پنجاہ ملین ڈالر لٹ سکے‘ جد کہ بینک منیجر نے بیٹھے بیٹھے چند انگلیاں ہلا کے پنجاہ ملین ڈالر لٹ لئے۔ ایہدے توں پتہ لگدا اے کہ تعلیم کنی ضروری اے۔ سانوں چور نہیں پڑھے لکھے ہونا چاہیدا سی۔ ایسے لئی کہندے نیں علم دی قیمت سونے دے برابر ہوندی اے۔ ایہناں سیاستداناں نے وی ایس ملک نوں تے غریب لوکاں نوں وی انج ای سمجھ رکھیا اے۔ کڑی تے تیز تلوار دی دھار ورگیاں شرطاں تے قرضہ لین آپ کھان‘ جوائیاں نوں کھلان‘ پُتراں نوں کھلان‘ سمدھیاں نوں کھلان ‘عزیزاں‘ رشتے داراں نوں کھلان‘ اپنے وزیراں تے نوازشات دے بدل برسان تے تھوڑا جیہا بچ جاوے تے اوہنوں کدھرے وی لا کے اپنے ناں دا چرچا کر لین تے نال دعا وی کر لین۔
ہن آنے آں مہنگائی دے خوفناک اثرات تے‘ تے دوستو مہنگائی دے اثرات مزدوراں‘ لاوارث استاداں تے بے ڈھنگے ملازماں نوں سولی تے چڑھا دینے آں۔ واضح رہوے کہ بے ڈھنگے ملازمین اوہ نیں جہناں دے محکمیاں وچ رشوت نوں عمل دخل نہیں ہوندا تے اوہ خودساختہ مسکینی تے عاجزی دی چادر اوڑھ کے حیاتی گزارن نوں ترجیح دیندے نیں۔ پولیس تے منگائی دا اثر نہیں ہوندا کیوں جے سپاہی توں لے کے آئی جی تک حصہ برابر تے بقدر جثہ ملدا اے تے خوب ملدا اے سگوں ایناں مل جاندا اے کہ باقی نسل وی مستفید ہو جاندی اے۔ فوج دے تے خیر اپنے ای کھاتے نیں۔ سپاہی وچارے کسمپرسی دی حالت وچ تے جرنیلا ںنوں پلاٹ تے باہر جزیرے خریدن دی اجازت نہیں لینی پیندی۔ بیوروکریسی دی تے اپنی بادشاہت اے تے بادشاہت وچ ہرکارے توں لے کے بادشاہ دے وارے نیارے ہوندے نیں تے افسرشاہی دا تاج وی ہمیشہ سر تے سجیا رہندا اے۔ واپڈا دی تے پنجے گھیو وچ تے سر کڑاہی وچ ہوندا اے۔ اک چوری تے دوجی سینہ زوری والی مثال ایہناں تے صادق آندی اے۔ اک لائن مین توں لے کے چیف تک پیسہ وی عام سگوں سرعام ملدا اے تے بجلی رج کے چوری وی کیتی جاندی اے۔ ایس توں علاوہ گوانڈھی توں اگلے دس گھراں تک گوانڈھیاں دے حقوق بحق شرح ادا کیتے جاندے نیں۔ ڈسٹرکٹ اکائونٹس دا اپنا اکلوتا تے صاف ستھرا آئین اے کہ بل دا دس فیصد سانوں نذر دے طور تے عنایت کرو تے ایس جائز کم نوں ہور شفافیت دا درجہ ساڈے توں دلوائو۔
ہن آنے آں ہسپتال ول… میڈیکل افسر دا بندہ پھڑو اوہنوں چار آنے لائو تے جعلی میڈیکل بل نوں اصلی کرا لوو تے دام کھرے کر لوو۔ سیکرٹری تعلیم دے دفتر جائو اڑھائی توں تن لکھ مُک مکا کرو اپنی مرضی دے کالج تے سکول وچ تبادلہ کرائو۔ ایہ کم پچھلے اٹھ مہینے توں ایس تواتر تے پابندی نال ہویا اے کہ کالجاں دے کالج خالی وی ہوئے تے بھرے وی۔ ایہدے وچ مردوزن دی تخصیص تک نہیں سی پر کسے شی میل دی ٹرانسفر سامنے نہیں آئی جے ایہ سلسلے ایسے کامیابی نال چلدا رہیا تے عنقریب ایہ واقعہ وی رونما ہون دا پورا امکان اے۔ میں گزارش کردا جاواں کہ ٹرانسفر دے واقعات عثمان بزدار تے کہنہ مشق سیاستدان تے وزیراعلیٰ چوہدری پرویزالٰہی دی نک دے تھلے ہوندے رہے نیں۔
کسے نے بچھوئواں دے وڈے بچھو توں پچھیا کہ تسیں سارے پھردے رہندے او۔ جنہوں دل کرے ڈنگ مار دیندے او انج تہاڈے قبیلے دا سردار کون اے؟ تے اوس بڈھے بچھو نے کہیا کہ تسیں جس بچھو دی پوشل تے ہتھ لائو گے اوہو سردار ہووے گا۔ ایہو حال سارے اداریاں دا اے۔ تسیں جہدی پوشل تے ہتھ لائو گے اوہ تہانوں کم دا ریٹ دسے گا تے اپنے پیسے کھرے کرے گا تے شکرالحمدللہ تے اللہ اکبر کبیرہ وی کہے گا تے اکثر اوقات تے ہتھ وچ تسبیح وی ہووے گی۔ ایس لئی مہنگائی دا اثر کجھ گنتی دے لوکاں اُتے اے تے اوہ عنقریب بھکھ نال مر جان گے۔ رشوت خور‘ بے ایمان‘ ملاوٹ کار‘ منافق ‘غیرذمہ دار‘ اخلاق توں عاری تے مذہب دا لبادہ اوڑھن والے معاشرے تے مہنگائی اثر نہیں کردی۔ اجہے معاشرے اپنی آخرت دے نال نال اپنی نسلاں وی تباہ کر لیندے نیں تے تریخ وچ ایہناں دی حیثیت اک مسخ شدہ قوم دے طور تے سمجھی جاندی اے۔ کاش اسیں ایہناں سارے کماں نوں انجام دین توں پہلاں کجھ وی علم حاصل کیتا ہوندا۔ اپنی خودی نوں وی برقرار رکھیا ہوندا‘ اپنے وقار دی پچھان کیتی ہوندی۔٭