عورت دی تعلیم اک خاندان دی تعلیم اے

ملک دی ترقی تے خوشحالی دا انحصار زنانیاں دے تعلیم یافتہ تے باشعور ہون اتے ہے

خصوصی رپورٹ

کسے وی معاشرے وچ زنانیاں بنیادی حیثیت رکھدیاں نیں۔ ملک دی ترقی تے خوشحالی دا انحصار زنانیاں دے تعلیم یافتہ تے باشعور ہون اتے ہے۔ معاشرے وچ جہنی توجہ تے اہمیت منڈیاں دی تعلیم نوں دتی جاندی اے کڑیاں دی تعلیم دا پربندھ وی اوسے طرح کیتا جانا چاہیدا اے۔ علم حاصل کرن بارے دین اسلام وچ بہت زیادہ تلقین کیتی گئی۔ ایسے سلسلے وچ ساڈے پیارے نبیؐ دی اک حدیث مبارکہ اے کہ علم حاصل کرنا ہر مسلمان مردتے عورت اتے فرض اے۔ ایس حدیث پاک توں اسیں ایس گل دا بخوبی اندازہ لاسکنے آں کہ رسول اکرمؐ نے مرداں دے نال نال زنانیاں دے علم حاصل کرن نوں وی فرض قرار دتا اے۔ اکثر ایہہ آکھیا جاندا اے کہ ماں دی گود بچے دی پہلی درسگاہ ہوندی اے۔ بچے دی شروع دی نشوونما تے تربیت ماں ای کردی اے۔ اوہو چنگے بھیڑے دا فرق دسدی اے۔ وڈے چھوٹے دی تمیز تے ادب کرنا سکھاندی اے۔ا ک مشہور قول اے کہ مرد دی تعلیم اک فرد دی تعلیم اے جد کہ عورت دی تعلیم اک خاندان دی تعلیم اے۔ گویا اک مہذب معاشرے دا حصول تعلیم یافتہ تے باشعور ماں دے ذریعے ای ممکن بنایا جا سکدا اے۔ زنانیاں لئی تعلیم دا حصول ایس لئی وی ضروری اے کیوں جے تعلیم زنانیاں نوں پراعتماد تے خودمختار بناندی اے۔ جے
زنانیاں نوں اپنی مالی ضروریات نوں پورا کرن لئی باہر کم کرنا پوے تے تعلیم یافتہ ہون کارن اوہ کسے چنگی جگہ نوکری کر ے چنگے طریقے نال اپنی تے گھر والیاں دی مالی طور تے مدد کر سکدیاں نیں۔
جتھوں تک زنانیاں دے پراعتماد ہون دی گل اے تے تعلیم دے ذریعے ای اوہناں نوں ایہہ سکھن نوں ملدا اے کہ معاشرے وچ رہ کے کہڑے موقعے اتے کیویں بغیر کسے خوف تے ڈر دے گل کرنی اے تے اپنا نقطہ نظر رکھنا اے۔ تعلیم یافتہ زنانیاں اپنے حقوق توں بخوبی واقف ہوندیاں نیں۔ اپنے حقوق نال آگہی ہون دی وجہ نال زنانیاں ایس قابل ہو جاندیاں نیں کہ کسے قسم دا مسئلہ یا پریشانی درپیش ہووے تے اوہ اپنے حقوق نوں جاندے ہوئے صحیح تے غلط دی پہچان رکھدے ہوئے درست فیصلہ لے سکدیاں نیں تے جے کوئی ناانصافی کیتی جا رہی ہووے تے اوہدے خلاف وی تعلیم یافتہ زنانیاں اپنے حقوق دے مطابق اپنا مدعا بیان کرن دی قابلیت حاصل کر لیندیاں نیں۔ فنی‘ تکنیکی تے دوجے شعبیاں وانگوں نظر دوڑائی جاوے تے اوہدے وچ زنانیاں دا کم تے اوہناں دی محنت صاف وکھائی دیندی اے۔ اج کل دے دور وچ شاید ای کوئی ایسا شعبہ ہووے جہدے وچ زنانیاں دی نمائندگی نہ ہووے۔ ڈاکٹر ہووے یا انجینئر‘ استاد ہووے یا پائلٹ ہر جگہ زنانیاں مرداں دے موہنڈھے نال موہنڈھا رلا کے کم کردی نظر آندیاں نیں تے جے اوہناں سارے کماں نوں خوش اسلوبی نال انجام دین دی گل کیتی جاوے تے زنانیاں فیر ای اپنے فرائض بہتر طریقے نال انجام دے سکن گئیاں۔ جدوں اوہ تعلیم یافتہ تے باشعور ہون گئیاں۔ جے ملکی ترقی‘ خوشحالی تے استحکام دی گل کیتی جاوے تے اوہدے وچ وی زنانیاں دا کردار بہت اہم اے۔ اک آن لائن ویب سائٹ دے مطابق دنیا دی آبادی دا 49.58فیصد حصہ زنانیاں اتے مشتمل اے۔ ایس توں بخوبی اندازہ لگایا جا سکدا اے کہ زنانیاں دا تعلیم یافتہ ہونا کہنا ضروری اے لیکن افسوس دی گل ایہہ ہے کہ یونیسیف آن لائن ویب سائٹ دے مطابق دنیا بھر وچ تقریباً129ملین کڑیاں اج وی سکول نہیں جاندیاں نیں۔ ایس ڈیٹا توں ایہہ گل واضح اے کہ دنیا بھر وچ زنانیاں دی تعلیم ول توجہ دین دی لوڑ اے۔ پاکستان وچ شرح خواندگی نوں زیربحث لیایا جاوے تے اک آن لائن ویب سائٹ ilm.com.pk دی رپورٹ دے اعدادوشمار دے مطابق مرداں دی شرح خواندگی 70فیصد تے زنانیاں دی خواندگی دی شرح 48فیصد اے جد کہ پاکستان آبادی دا تقریباً ادھا حصہ زنانیاں اتے مشتمل اے۔ ایس اعدادوشمار نوں مدنظر رکھدے ہوئے ایہہ گل قابل غور اے کہ پاکستان جیسے ترقی پذیر ملک وچ زنانیاں دی تعلیم ول خصوصی توجہ دین دی لوڑ اے تاں جے ملک و قوم نوں ترقی دی راہ اتے گامزن کرن وچ مدد فراہم کیتی جا سکے۔ ایس ضمن وچ متعلقہ حکام نوں چاہیدا کہ پاکستان دے جہناں علاقیاں وچ بچیاں لئے سکول‘ کالج تے یونیورسٹی دی سہولت موجود نہیں اے۔
اوتھے جدید تعلیمی اداریاں دا قیام عمل وچ لیایا جاوے تے کڑیاں نوں جدید تعلیم نال روشناس کروایا جاوے۔ اج وی ساڈے ملک وچ بہت سارے دیہی علاقے ایسے نیں جتھے کڑیاں دا باہر نکلنا معیوب سمجھیا جاندا اے۔ اوتھے تے کڑیاں دے تعلیم حاصل کرن دا سوال وی پیدا نہیں ہوندا۔
ایہناں علاقیاں دی بچیاںنوں تعلیم دے زیور نال آراستہ کرن لئی حکومت نوں چاہیدا اے کہ ا یسی ٹیماں تشکیل دتیاں جان جہڑی ایس طرح دے علاقیاں وچ جا کے اوتھے دے لوکاں نوں کڑیاں دی تعلیم دی افادیت توں آگاہ کرن تاں جے ودھ توں ودھ کڑیاں تعلیم دے میدان وچ اپنا لوہا منوا سکن تے ملکی ترقی وچ اپنا حصہ پا سکن۔ جے آسے پاسے نظر دوڑائی جاوے تے ایس گل دا چنگے طریقے نال اندازہ لایا جا سکدا اے کہ فنی تے تکنیکی کم اج کل دے دور دی اہم ضرورت نیں ایس لئی زنانیاں دے فنی تے تکنیکی تعلیم دا وی مناسب طریقے نال پربندھ کیتا جاوے تاں جے زنانیاں ایس جدید تعلیم توں محروم نہ رہ جان۔ پیشہ وارانہ کماں دے نال نال گھر نوں اک منظم طریقے نال چلان وچ وی زنانیاں دی تعلیم و تربیت دا بہت زیادہ عمل دخل اے۔ خاندان دے افراد نال حسن سلوکی نال پیش آنا ہووے یا مہینہ بھر لئی خرچ دا بجٹ بنانا ہووے‘ بچیاں دی تربیت دا معاملہ ہووے یا گھریلو ملازماں نال چنگا رویہ رکھنا ہووے‘ ایہہ سب چیزاں چنگی تعلیم و تربیت دے ذریعے ای بہتر طریقے نال سکھیاں جا سکدیاں نیں۔
گویا مندرجہ بالا سارے نکات نوں مدنظر رکھدے ہوئے ایہہ گل تے واضح ہو گئی اے کہ شعبہ ہائے زندگی دے کسے وی میدان وچ زنانیاں دی نمائندگی دے بغیر ترقی دا حصول ممکن نہیں تے ایہہ ترقی فیر ای کیتی جا سکدی اے جدوں زنانیاں باشعور تے تعلیم یافتہ ہون۔ امید اے کہ آن والے کجھ سالاں وچ زنانیاں دی تعلیم و تربیت دے اعلیٰ توں اعلیٰ انتظامات کیتے جان گے تے تعلیم نسواں دی شرح دا گراف کافی حد تک ودھ جاوے گا۔