سیاست تے محبت
سعد اللہ شاہ
یہ نہیں ہے تو پھر اس چیز میں لذت کیا ہے
ہے محبت تو محبت میں ندامت کیا ہے
خوب کہتا ہے نہیں کچھ بھی بگاڑا اس نے
ہم کبھی بیٹھ کے سوچیں گے سلامت کیا ہے
اج میں محبت دے حوالے نال گل کرنی اے پر پہلے کجھ سیاست ہو جاوے کہ کجھ تفنن طبع لئی وی تے ہونا چاہیدا اے تسیں یقین کرو ایہ لطیفیاں دی دنیا اے۔ اینے تضادات تے منافقت اے کہ بس چپ ای بھلی‘ بس اوہی کہ پڑھدا جا شرماندا جا کہ اوہناں نے تے نہیں شرمانا۔ مریم نواز فرماندیاں نیں کہ عدلیہ اج وی عمران نوں کھلی چھٹی دے رہی اے۔ دوجا ارشاد ایہ فرمایا کہ مہنگائی توں چھیتی ریلیف دا کوئی امکان نہیں جی اوہ ٹھیک کہندیاں نیں اوہ جھوٹ کیویں بولن گئیاں۔ غالب دا مصرع چمک اٹھیا۔ شرم تم کو مگر نہیں آتی۔
کوئی محترمہ توں پچھے کہ کدی عدلیہ تہاڈی وی ہوندی سی تہاڈی مرضی تے وی فیصلے کردے سن۔ پر منصف تہاڈے نال وی کھڑے سن جے تہاڈے خلاف آئے تے تسیں سپریم کورٹ تے حملہ وی کروا دیندے سی۔ دوجی گل مہنگائی دی کہ جے ایہدے گھٹ ہون دا امکان نہیں تے فیر تسیں کیہ کرن آئے سی کیہ تسیں صرف اپنے کیس معاف کروان آئے سی؟ تہاڈے کول اک ای موضوع اے۔ اوہ نیں عمران خان تے اک ای ٹارگٹ اے عمران خان دی نااہلی تے گرفتاری جو تسیں نہیں کر سکدے اپنیاں فضول گلاں نال لوکاں دا وقت ضائع کرنا چھڈ دیو۔ دوجے پاسے ساڈے خان صاحب نیں کہ اوہ وی بچیاں وانگوں ہوا وچ رنگین بلبلے چھڈدے رہندے نیں۔ چلو تسیں ایہنوں خان صاحب دی ادا کہہ لوو‘ انداز سمجھ لوو یاں اسلوب سیاست فی زمانہ تے ایہو چل رہیا اے کسے دی گل کدھر جوڑ دیو کدھروں کٹ کے چلا دیو سگوں کسے دے ناں وی لا دیو تے سب چلے گا۔ خان صاحب قمرجاوید باجوہ نوں معاف کرن لئی تیار نہیں تے اوہناں نوں سپرکنگ کہہ کے طنز کر رہے نیں پر اوہو اوہناں دی نک دا وال سن یاں گل ایہدے الٹ سی بہرحال اوہناں نے قوم نوں تیار رہن دا کہیا اے قوم یقینا سوچے گی کہ ہن اوہناں دے نال کیہ ہون جا رہیا اے۔ ہن آنے آں محبت ول کہ میں وعدہ کیتا سی ایہ محبت بڑی عجیب چیز اے۔ ایہنوں ویکھیا نہیں محسوس کیتا جا سکدا اے۔ ایہ محبت وی عجب شے اے کہ جدوں بازی تے آندی اے تے سب کجھ کھوہ لیندی اے یاں سب کجھ ہار دیندی اے محبت مار دیندی اے۔
میں محبت کو زندگی سمجھا
اس محبت نے مار ڈالا مجھے
کدی انج وی ہوندا اے کہ بندہ کہن تے مجبور ہو جاندا اے کہ مجھ کو میری ہی اداسی سے نکالے کوئی میں محبت ہوں محبت کو بچا لے کوئی۔سوال ایہ اٹھایا گیا سی کہ محبت ہے کیہ‘ میرے ذہن وچ فوراً شیفتہ دا شعر آ گیا۔ شاید اسی کا نام محبت ہے شیفتہ۔ اک آگ سی ہے سینے کے اندر لگی ہوئی۔ اصل وچ ساڈے محترم حمید حسین صاحب نے محبت دی گل کیتی تے فیر ایہدے پہلو اجاگر کیتے تے ایس لفظ نوں حقیقت نال آشنا کیتا ایہ گل وی ہوئی کہ محبت وچ شدت دا ناں عشق اے تے محبت وچ عقیدت دا پہلو غالب آوے تے لفظ مودت وی استعمال ہوندا اے۔ ایہ انساناں نوں آپس وچ جوڑدی اے۔ جگر نے وی تے کہیا سی۔ اس کا جو کام ہے وہ اہل سیاست جانیں۔میرا پیغام محبت ہے جہاں تک پہنچے۔ محبت مزاج طبیعت یاں میلان ہی تے اے۔ ایہدے پاروں کوئی تہانوں کشش کردا اے تسیں اوہدے ول مائل ہو کے آسودگی محسوس کردے او ایسے لئی تے ایہ احساس دا ناں اے۔ ایہدی صورت گری تے شعری ذوق دی گل اے پر ایہنوں کسے شکل وچ وکھایا نہیں جا سکدا۔ ساڈے دوست غلام محمد نے کیہا سی غم کی تشریح بہت مشکل تھی۔ اپنی تصویر دکھا دی میں نے۔ مزاج تے طبیعت دے میلان دی گل ہوئی تے غالب سامنے آن کھڑے ہوئے۔
جانتا ہوں ثواب طاعت و زھد
پر طبیعت ادھر نہیں آتی
تسیں وی ویکھیا ہووے گا کہ کتاب تے لکھیا ہوندا اے محبت دیاں نظماں‘ بہرحال جو گل حمیدحسین نے کہی سی اوہ حقیقت ول جاندی سی۔ مجاز دی گل اپنی تھاں اے لوک مجاز وچ وی حقیقت لبھدے رہندے نیں۔ ایہ جو محبت اے ایہ انسان دے عمل توں نظر آندی اے ایہ ڈھل کے کردار وی بن جاندی اے انسان دے رویے توں ظاہر ہوندی اے ایہ بڑی بے ساختہ اے ایہدے لئی سوچنا نہیں پیندا ادب دے تقاضے وی ایہ جان دی اے ایہ کدی اویس قرنی وچ نظر آندی اے تے کدی کسے ہور پروانے وچ۔ میں گل نوں بالکل مذہبی نہیں بنانا چاہندا کہ تسیں گل نوں وعظ سمجھو گے پر ایس سچی محبت دی مثالاں اوتھے ملدیاں نیں کہ نفس گم کردہ۔ مینوں امید اے کہ میرے قارئین نوں چنگا لگا ہووے گا کہ میں سیاست دی ڈگر وچ سارا کالم نہیں لکھ دتا محبت تے شاید سیاست وچ وی اے پر ساری دی ساری اپنے مفادات دے نال۔ سگوں اوتھے تے محبت دی اداکاری کرنی پیندی اے شاید ایہدا تعلق اوہناں دے عہدے نال وی اے تے دہن نال وی کہ ایہ شیروشکر وی محسوس ہوندی اے۔ گل میں ایتھے آ کے ختم کراں گا کہ ایس محبت دی انتہا ایہہ وے کہ انسان اپنے آپ نوں کسے لئی منہا کر دیوے تے ایہو اصل ایمان اے اوہ جو کہیا گیا کہ اوہی مسلمان اے جو رسول اکرمؐ ہوراں نوں کائنات دی ہر شے توں پیارا سمجھے حالاں کہ اپنی جان توں وی ودھ اوہدے نال ای اللہ وی محبت کرے گا۔
