نفرت دی سیاست

احمدوقاص ریاض

ملک دے ممتاز صنعتکاراں تے کاروباری شخصیات دے نال ہون والیاں سجریاں ملاقاتاں وچ اوہناں نوں کاروباری سرگرمیاں وچ تعطل تے ملکی معیشت دی ماڑتا تے کافی پریشان تے فکرمند پایا۔ زرمبادلہ دے گھٹ ہوندے ذخائر‘ ڈالر دی بے لگامی‘ لیٹر آف کریڈٹ دی بندش‘ خام مال دی امپورٹ وچ رکاوٹ‘ افراط زر وچ وادھے تے لوکاں دی قوت خرید وچ کمی اوہناں لئی بڑی پریشانی دا کارن سی۔ بجلی‘ گیس تے تیل دیاں قیمتاں وچ حالیہ وادھے‘ شیواں تے سروسز تے ہور ٹیکس تے سبسڈی دے خاتمے نال نہ صرف کاروباری بندے سگوں عوام وی متاثر ہون گے۔ انج دے ماڑے حالات وچ ساریاں دیاں نظراں آئی ایم ایف دے بیل آئوٹ پیکیج تے دوست ملکاں ولوں متوقع مالی امداد یاں ہور قرضیاں دے حصول تے ٹکیاں ہوئیاں نیں۔ ملک دے دوجے طبقیاں وانگوں کاروباری حلقے وی تقسیم دا شکار نیں۔ کوئی موجودہ حکومت دی پالیسیاں نوں تنقید دا نشانہ بنا رہیا اے تے کجھ لوک سابق حکومتاں تے الزام دھر رہے نیں۔ حکومت تے اپوزیشن جماعتاں دی حصول اقتدار لئی محاذ ارائی نال لوکاں تے کاروباری طبقہ اکوجیہا متاثر ہو رہیا اے۔ اپوزیشن وچ بیٹھی وڈی سیاسی جماعت تحریک انصاف موجودہ غیریقینی صورتحال تے معاشی تنزلی دا ذمہ دار پی ڈی ایم جماعتاں دے حکومتی اتحاد نوں قرار دے رہی اے تے کسے طور وی حکمران اتحاد دے نال بیٹھن نوں تیار نہیں۔
اقتدار توں علیحدگی دے بعد تحریک انصاف نوں ملن والی غیرمتوقع عوامی حمایت جہدی وڈی وجہ مظلومیت دا بیانیہ تے سوشل میڈیا تے متحرک پی ٹی آئی دے نوجوان کارکن سن‘ ہن ایس گل تے یقین رکھدی اے کہ اپنے پاوربیس نوں مضبوط تے مربوط رکھن لئی محاذ ارائی دی سیاست تے حکومتی اتحاد تے قومی اداریاں تے مسلسل تنقید ضروری اے تے اوہناں دی ایہ حکمت عملی کسے حد تک کامیاب ہوندی نظر آ رہی اے۔ تحریک انصاف دی حکومت دے خاتمے دی وجوہات کجھ وی ہون حکمران اتحاد دی وڈی سیاسی جماعت مسلم لیگ ن نے ہچکچاندے ہوئے اقتداروچ آنا قبول کیتا جہدا اوہنوں فائدہ گھٹ تے نقصان زیادہ ہویا۔ اقتدار وچ آن دے بعد مسلم لیگ ن دے قائدین دے خلاف بنائے گئے مقدمے ختم ہو گئے۔ اتحادی جماعتاں دے ممبران اسمبلی دی چوکھی گنتی نوں وزیر و مشیر بنا دتا گیا تے ترقیاتی سکیماں دی مد وچ اوہناں نوں کروڑاں روپیے دے فنڈز جاری ہو گئے۔ دوجے پاسے تحریک انصاف دے سربراہ عمران خان تے پارٹی دے ارکان خلاف کیس بنا دتے گئے تے اوہناں نوں اوسے طرح عدالتاں وچ دھرویا جا رہیا اے جیویں مسلم لیگ ن تے پیپلزپارٹی دے لوکاں تے عرصہ حیات تنگ کر دتا گیا سی۔
عمران خان نے اقتدار توں بے دخلی دے بعد بیرونی تے ملکی سازشاں دا ذکر کیتا تے رجیم چینج اپریشن دا ذمہ دار امریکہ نوں قرار دتا کیوں جے اوہناں نوں پتہ سی یاں دسیا گیا سی کہ ایس بیانیے نوں عوامی پذیرائی مل سکدی اے۔ ایس توں علاوہ اوہناں نے ملکی سلامتی دے اداریاں نوں وی تنقید دا نشانہ بنایا تے اوہناں نوں سیاست وچ دخل اندازی دا ذمہ دار قرار دتا۔ بعد وچ عمران خان نے امریکی مداخلت دے بیان نوں واپس لیندے ہوئے سابق عسکری قیادت نوں اقتدار توں اپنی محرومی دا ذمہ دار قرار دتا۔ اجہے حالات وچ کجھ ملک دشمن عناصر کجھ بیرونی ملکاں دے آلہ کار بن کے اپنے وطن دی محافظ فوج دے خلاف بے بنیاد پراپیگنڈا کرن وچ مصروف نیں۔ ملکی سرحداں دی حفاظت ہووے یاں دہشت گردی خلاف جنگ ساڈی فوج نے اپنے افسراں تے جواناں دے لہو نال ایس پاک دھرتی دی حفاظت کیتی اے۔ ماضی وچ یقینا کجھ افسراں توں غلطیاں ہوئیاں ہون گئیاں اوہ وی ایسے معاشرے دا حصہ نیں پر اوہناں کجھ بندیاں دی وجہ نال پورے ادارے تے الزام مڑھنا ٹھیک نہیں۔ پوری دنیا دے ملکاں دیاں فوجاں تے دفاعی اداریاں توں غلطیاں ہو جاندیاں نیں تے کجھ فیصلے وی غلط ثابت ہوندے نیں تے اوتھوں دے خفیہ ادارے وی نیشنل سکیورٹی دے ناں تے اپنے شہریاں تے غیرملکیاں دی کڑی نگرانی کردے نیں پر ساریاں آزادیاں دے باوجود اوہناں ترقی یافتہ ملکاں دے آزاد شہریاں نوں اجازت نہیں کہ اوہ اپنی فوج یاں قومی سلامتی دے اداریاں تے تنقید کر سکن۔
نظم و ضبط دی پابند پاکستان دی فوج دا شمار دنیا دی بہترین فوجاں وچ ہوندا اے جو نویں عسکری قیادت دے زیرسایہ ملکی سلامتی تے تحفظ لئی ہر قسم دی قربانی دین لئی تیار نیں۔ ملک دے ہر چھوٹے وڈے شہر‘ پنڈ تے گوٹھ وچ پاک فوج دے شہیداں دے ناں سڑکاں تے چوکاں تے لگے نیں تے اوہناں شہیداں دے بڈھے والدین‘ بیواواں تے نکے بچے فخر کردے نیں کہ اوہناں دے پیارے ایس دھرتی دی حفاظت کردے ہوئے شہید ہو گئے۔ اج وی فوجی بھرتی دے مرکز دے باہر لگیاں لمیاں قطاراں ایس گل دا ثبوت نیں کہ ملک د ے نوجواناں وچ وطن نال محبت تے اوہدی حفاظت لئی جان دی قربانی دین دا جذبہ گھٹ نہیں ہویا۔ ایس ویلے ملک جہڑیاں اوکڑاں دا شکار اے ضرورت ایس گل دی اے کہ ساریاں سیاسی جماعتاں آپس دیاں لڑائیاں بھل کے ملک نوں معاشی گرداب چوں کڈھن لئی مل بیٹھ کے کوئی لائحہ عمل تشکیل دین تے سارے سٹیک ہولڈرز وی بلاتفریق ساریاں سیاسی قوتاں نوں اکٹھا کرن۔ ایہناں کٹھن حالات وچ کجھ عرصے لئی ساریاں سیاسی جماعتاں دے ایماندار‘ قابل تے سوجھ بوجھ رکھن والے بندیاں تے مشتمل اک قومی حکومت قائم کر دتی جاوے تے معاشی اوکڑاں گھٹ سکدیاں نیں تے ایس طرح شاید آپسی نفرتاں وی گھٹ ہو جان۔٭