ماں بولی دیہاڑ
ڈاکٹر فوزیہ حنیف
28فروری 2023ء منگل دے دیہاڑ گورنمنٹ اسلامیہ گریجوایٹ کالج ریلوے روڈ لاہور وچ پرنسپل پروفیسر ڈاکٹر عباد نیبل شاد ہوراں دی آگوائی ہیٹھ شعبہ پنجابی ولوں ’’ماں بولی دیہاڑ‘‘منایا گیا۔ میزبانی دے فرائض شعبہ پنجابی دیاں چیئر پرسن ڈاکٹر فوزیہ حنیف نے سرانجام دِتے۔ایس تقریب دے اُچیچے پروہنے پنجابی دی تحریک دے سرگرم آگو مان جوگ الیاس گھُمن صاحب‘مدثر اقبال بٹ (بھُلیکھا اخبار دے ایڈیٹر)‘سلیم احسن صاحب ڈپٹی ڈائریکٹر کانفیڈنشیل (ڈی پی آئی آفس) سن۔تقریب دا باقاعدہ آغاز تلاوت کلام پاک تے نعت رسول مقبول ﷺ توں کیتا گیا۔ مان جوگ الیاس گھُمن تے آدر سنمان مدثر اقبال بٹ ہوراں پرنسپل پروفیسر ڈاکٹر عباد نبیل شادہوراں دی دستار بندی کیتی ۔ ایسوسی ایٹ ڈگری پروگرام دوجے ورھے دے پنجابی پڑھیار محمد فیضان نے ’’پنجابی سماج تے ماں بولی‘‘ جد کہ محمد سفیان نے ’’پنجابی وچ مُڈھلی تعلیم دی اہمیت‘‘ بارے تقریراں کیتیاں۔
بی ایس انگریزی دے پڑھیا ر محمد زین اختر ہوراں خواجہ غلام فرید دا صوفیانہ کلام گا یا ۔ ندیم اقبال باہو ہوراں حضرت سلطان باہوؒ دا کلام پڑھیا۔ معروف گائیک عنایت عابد ہوراں میاں محمد بخش ؒ تے شاہ حسین دا کلام گا یا تے سُنن ہاراں کولوں بھرپور داد وصول کیتی ۔
اُچیچے پروہنے الیاس گھُمن ہوراں پنجابی زبان نال صدیاں توں ہوندے ہوئے دھرو نوںمُکائون تے ایس نوں ایہدا حق دین اُتے زور دِتا تے اوہناں دی ہلہ شیری نال گورنمنٹ اسلامیہ گریجوایٹ کالج ریلوے روڈ لاہور دے حبیبہ ہال وچ ماںبولی پنجابی دی محبت بارے پڑھیاراں نے نعرے لائے۔
پنجابی نال محبت رکھن والے مدثر اقبال بٹ ہوراں پنجابی نوں پرائمری سطح اُتے رائج کرن دی گل کیتی۔پروفیسر زبیر احمد ہوراں پنجابی دے پچھوکڑ بارے گل کردیاں آکھیا ۔ پنجابی سبھ توں چوکھی امیرتا رکھن والی بولی اے۔ جنہوں سکولاں اندر اُستاد بولن نئیں دیندے۔
بابافریدؒ توں لے کے خواجہ غلام فرید ؒ تیک اٹھ سو ورہیاں اُتے پھیلی ہوئی ایس دی تاریخ اے۔ ایہ صوفیاں تے درویشاں دی بولی اے جنہاں رب نال محبت تے اخلاقی قدراں بارے لوکاں نوں جانو کروایا۔ ایہو جیہی زبان گنواراں تے جاہلاں دی زبان کیویں ہو سکدی اے۔
پنجابی نال پیار رکھن والے پروفیسر حسیم جاوید بٹ(شعبہ انگریزی) نے ماں بولی بارے اپنے وچار سانجھے کردیاں ہوئیاں آکھیا سانوں اپنے گھراں اندر ماں بولی بولنی چاہیدی اے کیوں جے خاندان معاشرے دی پہلی اکائی نیں جے کر گھراں توں ماں پیو اپنے بالاں نال پنجابی وچ گل کرن گے تاں آخیر پورے پنجاب اندر ماں بولی نال پیار ودھے گا۔
پروفیسر ڈاکٹر محمود اعوان(صدرِشعبہ انگریزی) پنجابی نال گوڑھی محبت رکھن پاروں ماں بولی نال ہون والے دھرو نوں بیان کیتا تے ’’ماں بولی دیہاڑ‘‘ منائون دے بنیادی کارن بارے چانن پایا۔
اوہناں دآکھنا سی کہ پنجابی نوں بُرا بھلا آکھ کے ساڈی نوجوان نسل نوں ایس توں دور کیتا گیا۔ جد کہ ماں بولی پنجابی اپنے اندر بوہت امیرتا تے سُہپن رکھدی اے ۔
ایس دی لفظالی اندر ڈھیر معنی ملدے نیں تے ایہہ دوجیاں زباناں دے مقابلے اُتے کھلون والی زبان اے۔ ایس لئی پنجابی نوں اوس دا حق دینا چاہیدا اے۔ اجوکے سمے گھروکی پدھر اُتے ایس نوں بولن دی لوڑ اے ۔ گورنمنٹ اسلامیہ گریجوایٹ کالج ریلوے روڈ لاہور دے ایف اے ‘ایسوسی ایٹ ڈگری (پنجابی پڑھیاراں)بی ایس انگریزی تے بی ایس سیاسیات دے پڑھیاراں نے شاہ حسین دی کافی ’’مائے نی میں کنہوں آکھاں ‘‘ اُتے پرفارمنس پیش کر کے اجوکے سمے اندر ودھدے ہوئے سماجی تے معاشی مسئلیاں نوں اُگھیڑیا۔ اوہناں اخلاقی گراوٹ تے نشے جیہی ودھدی ہوئی لعنت ورگے مسئلیاں دے اُپا ول لوکاں دا دھیان دوایا۔
مان جوگ الیاس گھمن صاحب نے پڑھیاراں دی بہترین کارکردگی اُتے اوہناں نوں پٹکے دِتے ۔ اوہناںشعبہ پنجابی دیاں چئیرپرسن ڈاکٹر فوزیہ حنیف ہوراں دی حوصلہ افزائی لئی چادر وی پیش کیتی ۔ آخیر اُتے پرنسپل گورنمنٹ اسلامیہ کالج ریلوے روڈ لاہور پروفیسر ڈاکٹر عباد نبیل شاد ہوراں ماں بولی دیہاڑ بارے گل کیتی تے آئون والے اُچیچے پروہنیاں ‘اُستاداں تے پڑھیاراں دا شکریہ ادا کیا۔
