اک نشے دی پڑیا
اوہ تاش دے پتیاں اتے جواری بن کے بادشاہ‘ ملکہ دی بازی تے
جت لیندا اے مگر اپنی قابلیت جوئے وچ ہار جاندا اے
خصوصی رپورٹ
قتل و غارت نے خوف و ہراس دی فضا گرم کر رکھی اے۔ انسان نہ اپنے گھر دی چار دیواری وچ محفوظ اے نہ چار دیواری دے باہر۔ تنگ گلیاں‘ فٹ پاتھ‘ کھلے رستے‘ چوراہے تے چوک کہڑی جگہ محفوظ اے۔ زندگی انسان دا امتحان لیندی اے۔ جہڑا انسان اپنے سفنیاںدی تعبیر لبھن‘ اپنی ساری صلاحیتاں نوں بروئے کار لیان لئی گھروں نکلدا اے طبقاتی تقسیم ‘ فرقے بازیاں تے غیر منصفانہ رویے اوہنوں کسے گندے نالے دی نکڑے نشہ کرن والے مایوس انسان وچ بدل دیندے نیں۔ اوہ کوڑے داناں وچ سٹے جان والے باسی کھانیاں وانگوں ایس دنیا دے قابل تے کیہ اپنے قابل وی نہیں رہندا۔ اوہ تاش دے پتیاں اتے جواری بن کے بادشاہ‘ ملکہ دی بازی تے جت لیندا اے مگر اپنی قابلیت جوئے وچ ہار جاندا اے۔ اک نشے دی پڑیا دو ہیروئن دے سگریٹاں تے دیسی شراب دی بوتل لئی اوہ اپنی عزت گروی رکھن وچ شرم محسوس نہیں کردا تے معاشرے وچ اپنا وقار گوا دیندا اے۔ کردار انسان دی پیدائش دے نال جنم نہیں لیندا بلکہ اک معصوم مسکراہٹ‘ زمانے دے دل چیرن والے ہاسے پاروں اپنی معصومیت گوا دیندا اے۔ ذمہ دار کوئی وی ہووے مگر اک انسان دا نام دنیا توں چلا جاندا اے۔
راقمہ نے بہت سارے ایسے خانداناں وچ انتہائی ذہن فطین لوکاں نوں ذہنی مریض بندے ویکھیا اے۔ تحقیق مگروں معاملات سامنے آندے رہے۔ اوہناں وچ والدین دی ناچاقیاں‘اوہناں وچ صبرتے برداشت دی کمی‘ باہر دے لوکاں تے دوجے رشتہ داراں دی بلاوجہ مداخلت۔ ایہہ کہن نوں یا سمجھن نوں شاید لوکاں نوں معمولی گل لگے لیکن یقین جانو ایہہ گلاں معمولی نہیں نیں۔ ایہہ اک انسان دی زندگی ای نہیں مکمل خاندان نوں تباہ کر دیندیاں نیں۔
انج کرن والے تماشائیاں وچ سب توں اگے تالیاں ماردے نیں مگر زبان توں اظہار ہمدردی کردے نظر آندے نیں۔ انسان معاشرتی جانور اے اوہنوں ہر حال وچ معاشرے نال رابطہ تے میل جول ودھانا ہوندا اے لیکن اوہدے لئی جدوں تک اوہ اک خاندان سنبھالن دی صلاحیت نہ رکھ سکے اپنے بال‘ بیوی تے والدین دے علاوہ دوجے رشتہ دی اہمیت تے خاص مقام نوں نہ سمجھ سکے اوہ اک معاشرے دا مفید فرد کیویں بن سکدا اے۔ ایسے لئی تے ہر رشتے دا مقام اسلام نے وی کھول کھول کے دس دتا اے تاں جے اوہناں دے حقوق دی ادائیگی وچ کوتاہی دی بنا تے مسئلے پیدا نہ ہون۔ قلم دوات تے کاغذ ادیب دے بہترین ہتھیار‘ اوزار تے دل نال جڑے ہوندے نیں۔ ایس طرحاں خاندان دا ہر فرد ایس خاندان دے ذمہ دار دا قلم دوات کاغذ ہوندا اے۔اوہ اپنی جذباتی وابستگی‘ محبت دی گہرائی اپنے کردار دے اعلیٰ ظرف ہون دا ثبوت اوہناں دی زندگیاں کامیاب بنا کے دیندا اے۔
بہت گھٹ ہوندا اے کہ اپنے فرائض دی مکمل ادائیگی تھوڑے جلال تے بوہتے جلال دے نال کرن والے خانداناں وچ کوئی فرد معاشرے دا ناکارہ حصہ بندا ہووے۔ ایہناں خانداناں توں بنن والے افراد سیاست‘ بزنس‘ تعلیم تے مختلف شعبیاں وچ جاندے نیں۔ چنگی تربیت اوہناں نوں وطن دی خدمت کرن وچ مدد دیندی اے۔ساڈے معاشرتی طور تے بہت مضبوط تے طاقتور انسان کس طرحاں دے حالات توں گزر رہے ہون اوہ اپنے کسے ساتھی نوں کدی نقصان نہیں پہچاندے۔ ایسے افراد وطن دی طاقت بندے نیں نہ اوہناں دے ہتھ وچ کشکول ہوندا اے نہ اوہناں دی زبان اتے شکوہ۔ نہ اوہناں دی نظر وچ لالچ نہ سینے وچ کینہ ایسے افراد ساڈے وطن دی لوڑ نیں۔ اوہناں نوں بنان لئی معاشرہ دی مدد نہیں اک خاندانی نظام دی مدد دی لوڑ اے کیوں جے اک انسان نوں مکمل تے بھرواں کردار دا حامل کر کے خاندان ای معاشرے دے حوالے کردا اے۔ جے اوہ ایہہ ذمہ داری اک فرد دے بچپن توں نہیں نبھاندا تے فیر معاشرہ گلی کوچے وچ کھڑے اپنی زندگی نوں ضائع کرن والے جواناں ‘ گلیاں وچ بیٹھ کے تاش کھیڈن یا چھتاں اتے گڈی دے پیچ لڑان والیاں تے اپنی صلاحیتاں نوں شعبدہ بازیاں دی نذر کرن لئی اوہناں نوں گلیاں دا پتھر بنا دیندا اے تے کیوں اسیں اینے قیمتی خزانیاں نوں بے سبب چلا کے راکھ کر دئیے۔
سانوں ایہناں معصوم بالاں توں اپنی زندگی نوں خوبصورت بنانا ای اے کیوں نہ اوہناں دے معصومیت دے دور وچ ای اوہناں دی زندگیاں نوں محبت‘ اعتماد‘ خلوص تے دوستی دے نال پروان چڑھان دا فیصلہ کر لیے۔ ہسنا اسیں وی اے تے جینا اسیں وی اے مگر اپنی اولاداں دے نال تے فیر اک ویلے مگروں اوہناں ذاتی وطن دا حق وی شروع ہو جاندا اے۔ اوہنوں ادا کرن لئی جے اسیں اوہناں دی تربیت وچ اپنا ایمانداری دا خون پسینہ شامل کر دیواں گے تاں ای اوہ وطن لئی کرپٹ سیاستدان نہیں بنن گے۔ ایہہ کاروبار وچ ریاکاری نہیں کرن گے۔ تعلیم نوں علم دے معیار اتے لیا کے اپنے کردار دا حصہ بنان گے تے شعور و آگاہی دی جیویں خود منزلاں طے کیتیاں ہون گئیاں انج ای امانت تے ایمانداری دے نال اوہناں نوں اگے لے کے چلن گے۔
گہری انھیری گھاٹیاں یا یخ بستہ بلند و بالا چوٹیاں اتے وطن عزیز دی خدمت اوہو افراد کر سکدے نیں جہناں دے والدین تے استاداں نے اوہناں دی تربیت اتے جان ماری ہووے۔ ورنہ ساڈے معاشرے دے بے شمار جوان بچے تے بچیاں نہ صرف اپنی زندگیاں برباد کردے نظر آ رہے نیں بلکہ خاندان دے نال نال ملک دی بدنامی دا کارن وی بن رہے نیں۔ ایس نوجوان نسل توں مایوس نہیں ہونا چاہیدا اے۔ اوہناں نوں جدوں کدی ساڈی محبت ‘دوستی تے اعتماد ملے گا ایہہ کردار دی ڈگری ہوئی سطح توں وی باہر نکل کے اٹھ کھڑے ہون گے۔ ایہہ ثابت کروان لئی کہ اوہ کسی توں گھٹ نہیں۔ ساڈا ودھیا ہویا دوستی دا ہتھ اپنے نکام بچیاں ول اوہ مضبوط سہارا بن سکدا اے کہ اوہ بچہ وطن دا چمکدا ہویا ستارا بن سکدا اے۔
