ملک دیوالیہ ہون نال ختم نہیں ہوندے

اقتدارجاوید

پچھلے دیہاڑے سابق صدر آصف علی زرداری نے آکھیااے کہ ’’ملک دیوالیہ ہون نال ختم نہیں ہوندے‘‘ ایہ ساڈے ورگیاں دی مساعی جمیلہ نال ختم ہوندا اے جے دیوالیہ ہون نال ملک نے ختم ہونا ہوندا تے ایہ وچارہ کدوں دا ختم ہو چکیا ہوندا۔ پچھلے پندراں ورھیاں توں اسیں ای تے سندھ وچ حکومت کر رہے آں اوتھے ساریاں نوں پتہ اے کہ عوام ای دیوالیہ ہوئی اے۔ عوام دا دیوالیہ ہونا ہور گل اے تے ملک دا دیوالیہ ہونا وکھری گل اے۔ ایہناں دوہاں نوں آپس وچ رلان ملان دی کوشش نہیں کرنی چاہیدی۔ انج وی چن چڑھدا اے ساریاں نوں نظر آندا اے۔ ملک دیوالیہ ہووے گا تے ساریاں نوں نظر آ جاوے گا۔ بیکار اندازے لان دی اُکا کوئی لوڑ نہیں۔ ساریاں نوں پتہ اے کہ جدوں 71ء وچ پاکستان دو ٹوٹے ہویا سی اودوں اوہدی مالی حالت بڑی چنگی سی۔ ملک دیوالیہ نہ ہون دے باوجود وی دو ٹوٹے ہو گیا۔ شاعر نے کہیا سی:
پاپوش میں لگائی کرن آفتاب کی
جو بات کی خداکی قسم لاجواب کی
ایہ ٹھیک اے کہ عوام دیوالیہ ہو گئی اے تے دو نوالیاں لئی ترس گئی اے پر ملک دے حالات اجہے نہیں۔ دوجا کجھ آئی ایم ایف نے وی فضول رولا پایا اے۔ سنیا اے کہ عالمی مالیاتی فنڈ دی سربراہ دا اک بیان وائرل اے جہدے وچ اوہ کہہ رہیاں نیں کہ ملک نوں دیوالیہ پن توں بچانا اے تے امیراں تے ٹیکس لانا ہووے گا۔ ایس سربراہ نوں بھلا کیہ علم کہ اجہے اقدامات نال ای ملک تباہ ہوندے نیں۔ اسیں ملک دی سربراہی وی کیتی اے تے سربراہی توں وکھ ہون دے باوجود فضل ربی دی کمی نہیں رہی۔ ایس لئی قوم نوں پریشان ہون دی لوڑ نہیں پر ملک نوں پریشان ہون دی اُکا کوئی لوڑ نہیں۔ سابق صدر آصف علی زرداری نے الیکشن دی تیاریاں دے حوالے نال پنجاب دا دور شروع کر دتا۔ کیوں جے اوہ چاہندے نیں کہ پی پی پی نوں پنجاب وچ جو اک دو سیٹاں ملن دا امکان باقی اے اوہ وی ختم ہویا تے ایہ روز روز پنجاب وچ اوہناں دی مقبولیت تے غیرمقبولیت دی بحث دا موضوع ہووے۔ خبر اے پہلے اوہ نجی طیارے تے ملتان اپڑے اوتھوں اوہناں نے وہاڑی جانا سی ملتان توں وہاڑی تک اوہ حکومت سندھ دے ہیلی کاپٹر تے گئے۔ نجی جہاز دا مزا وی بڑا سی پر جو سندھ حکومت دے ہیلی کاپٹر دے جھوٹے سن اوہ تے گویا وڑائچ طیارے دے سن۔ ایس موقعے تے یوسف رضا گیلانی نے دوجے لوکاں دے نال سابق صدر دا استقبال کیتا۔ آپ یوسف رضا گیلانی تے اوہناں دے خاندان نے وی اپنے زمانے وچ ایس وڑائچ طیارے دے خوب مزے اڑائے سن۔
سابق صدر نے آکھیا کہ پیپلزپارٹی اگلا الیکشن پی ڈی ایم پلیٹ فارم توں نہیں‘ تیر دے نشان تے لڑے گی۔ بھاویں پی ڈی ایم دے پلیٹ فارم توں لڑن دا وی نتیجہ اوہو نکلنا اے جو تیر دے نشان تے لڑ کے نکلنا اے۔ جدوں ہارنا ای اے تے فکر کیسی؟ انج وی الیکشن لڑنا اک سائنس اے جو اسیں نہ صرف آپ سگوں اپنی سیکنڈ کلاس لیڈرشپ نوں وی یاد کرا دتی اے۔ کراچی دے بلدیاتی الیکشن ایہدی واضح تے خوبصورت مثال نیں۔ عزیزی شرجیل میمن‘ سعیدغنی تے ن اصرشاہ ہن ایس کم وچ مکمل مہارت حاصل کر چکے نیں۔ حافظ نعیم الرحمن نوں ہن وی کہنا واں کہ کراچی دی میئرشپ بھُل جائو کیو ںجے اجے تے الیکشن کمیشن تے ضروری کماں وچ مصروف اے ایس لئی چھوٹے بھائی لالہ سراج الحق تے حافظ نعیم الرحمن سمجھ لوو کہ:
رہروِ راہِ محبت کا خدا حافظ ہے
اس میں دو چار بہت سخت مقام آتے ہیں
اوہناں آکھیا کہ جام پور وچ عمران خاں اپنی مقبولیت دی وجہ نال نہیں جیندے۔ سگوں ساڈی غیرمقبولیت دی وجہ نال سیٹ کڈھن وچ کامیاب ہوئے نیں۔ نہ اسیں غیرمقبول ہوندے نہ اوہ سیٹ جت سکدے تے ایہدے تے سانوں کجھ دکھ وی نہیں کہ اسیں مقبول آں کہ غیرمقبول۔ اپنا توا گرم اے جہدا چلھا ٹھنڈا اے اوہ جانے تے مقبولیت جانے‘ اوہناں آکھیا اوہ سانوں دلدل وچ پھسا گیا اے بھاویں اصل وچ تے ایس ملک نوں اسیں پھسایا اے اوہدی چھوٹی جہی مثال نال گل چٹے دن وانگوں واضح ہو جاوے گی اسیں اپنی حکومت وچ ایران نال گیس پائپ لاین وِچھان دا معاہدہ کیتا سی۔ اوہ ساڈے دوجے وعدیاں وانگوں وفا نہیں ہویا۔ ہن یقین اے کہ پیاری قوم نوں اٹھاراں ارب ڈالر ہرجانہ لگن والا اے۔ اک ارب ڈالر منگدے منگدے اٹھاراں ارب ڈالر دینے پے گئے تے لگ پتہ جاوے گا۔ اصل وچ تے ایہنوں پھسانا کہندے نیں۔ اوہناں آکھیا کہ ’’غریب دی آواز اللہ سنے گا‘‘ ہن ساریاں نوں تے پتہ اے کہ پی پی پی نے ایہدی گل نہ سنن دی قسم کھادی ہوئی اے۔ ہن تہاڈے توں کیہ پردہ پی پی پی نے اپنی رضاعی بھین ن لیگ نوں وی عرصہ ہویا ایہ گر سکھا دتا سی ہن رہ گئے ڈیرے والے بھائی اوہناں نوں تے آپ اج کل اللہ نہیں سن رہیا۔ دوجے پاسے عزیزی مفکر رضا ربانی دے چشم کشا خط دے پچھے ساڈے توں علاوہ ہور کون سکدا اے۔ ایس خط وچ جہڑے نکات سمجھا دتے نیں اوہدے نتیجے وچ اگلی واری حکومت دا بھار چکن دی ہمت ساڈے توں سوا ہور کون کرے گا۔ اک گیلپ سروے دا وی بڑا رولا پیا ہویا اے۔ لوکاں دا خیال اے کہ ایس نام نہاد سجرے گیلپ سروے نے تے لنکا ای ڈھا دتی تے مینوں سب توں ودھ نیگیٹو ریٹنگ دتی گئی۔ ایس طرح دے سروے دے بعد کیہ اوہ سمجھدے نیں کہ اسیں بدل جاواں گے اوہ کیہ مرزا نوشہ کہہ گیا اے:
گر کیا ناصح نے ہم کو قید اچھا یوں سہی
یہ جنون ِ عشق کے انداز چھٹ جاویں گے کیا