پاکستان کویتی افواج نوں تربیت، سرحدی انتظام تے دفاعی شعبیاں وچ مدد دیوے گا، نویں معاہدے اُتے دستخط
خواجہ آصف نال کویتی ہم منصب شیخ عبداللہ علی دی وزارتِ دفاع وچ ملاقات، باہمی سلامتی تے خطے وچ امن و استحکام لئی شراکت داری ہور مضبوط کرن دے عزم دا اعادہ
شیخ عبداللہ علی دی قیادت وچ کویتی وفد دا جی ایچ کیو دا وی دورہ، فیلڈ مارشل سید عاصم منیر نال ملاقات، باہمی دلچسپی دے امور، علاقائی سلامتی تے دوطرفہ دفاعی تعاون اُتے گفتگو: آئی ایس پی آر
راولپنڈی: پاکستان تے کویت وچ دفاعی تعاون نوں ہور مضبوط بناؤن لئی نواں معاہدہ طے پا گیا اے۔ پروٹوکول ایگریمنٹ 2026 دے تحت پاکستان کویتی مسلح افواج نوں تربیت، سرحدی انتظام تے دفاعی شعبیاں وچ معاونت فراہم کرے گا۔
تفصیلات مطابق وزارتِ دفاع راولپنڈی وچ وزیرِ دفاع خواجہ آصف نال کویتی ہم منصب شیخ عبداللہ علی عبداللہ السلیم الصباح دی قیادت وچ اعلیٰ سطحی وفد نے ملاقات کیتی۔ ملاقات وچ باہمی دلچسپی دے امور اُتے تبادلۂ خیال ہویا، جدویں کہ دوطرفہ دفاعی تعلقات، سکیورٹی تعاون تے دفاعی روابط نوں ہور مضبوط بناؤن اُتے توجہ دِتی گئی۔
اس موقع اُتے پاکستان تے کویت وچ پروٹوکول معاہدہ 2026 اُتے دستخط وی کیتے گئے۔ معاہدے دے تحت 2023 وچ دونوں ملکاں وچ طے پائے دفاعی تعاون دے معاہدے دے تحت قائم فوجی تعاون دے فریم ورک نوں ہور وسعت دِتی جاوے گی۔
نویں معاہدے دے تحت پاک افواج کویتی مسلح افواج نوں مختلف شعبیاں وچ معاونت فراہم کرن گیاں، جنہاں وچ فوجی تربیت، استعدادِ کار وچ اضافہ، سرحدی انتظام تے دفاعی تعاون دے ہور شعبے شامل نیں۔
وزارتِ دفاع دے مطابق دونوں پاسیاں ولوں باہمی سلامتی تے خطے وچ امن و استحکام لئی شراکت داری نوں ہور مضبوط کرن دے عزم دا اعادہ کیتا گیا۔
دریں اثنا پاک فوج دے شعبۂ تعلقاتِ عامہ آئی ایس پی آر دے مطابق کویت دے وزیرِ دفاع شیخ عبداللہ علی عبداللہ السلیم الصباح دی قیادت وچ اعلیٰ سطحی وفد نے جی ایچ کیو دا وی دورہ کیتا، جتھے فیلڈ مارشل سید عاصم منیر نال ملاقات ہوئی۔
وفد وچ کویت دیاں مسلح افواج دے چیف آف جنرل سٹاف لیفٹیننٹ جنرل خالد درج سعد الشریعان وی شامل سن۔
ملاقات وچ باہمی دلچسپی دے امور، علاقائی سلامتی تے دوطرفہ دفاعی تعاون اُتے تفصیلی گفتگو ہوئی۔ دونوں پاسیاں ولوں ادارہ جاتی روابط نوں ہور مضبوط بناؤن تے دفاعی تعاون نوں وسعت دین دے عزم دا وی اعادہ کیتا گیا۔
آئی ایس پی آر دے مطابق کویتی وفد نے علاقائی امن تے استحکام لئی پاکستان دیاں مسلح افواج دی پیشہ ورانہ مہارت، آپریشنل صلاحیتاں تے خدمات نوں سراہیا۔
ملاقات وچ پاکستان تے کویت دے تاریخی تے برادرانہ تعلقات نوں مضبوط دفاعی شراکت داری وچ تبدیل کرن دے عزم دی تجدید وی کیتی گئی۔ دونوں پاسیاں نے اس گل اُتے زور دتا کہ دفاعی تعاون علاقائی سلامتی تے استحکام دے فروغ وچ اہم کردار ادا کر سکدا اے۔
