فی ایکڑ کنک دی پیداوار وچ اضافہ غذائی تحفظ نوں مضبوط بنائے گا: رانا تنویر
اسلام آباد (نامہ نگار) وفاقی وزیر قومی غذائی تحفظ تے تحقیق رانا تنویر حسین نے فی ایکڑ 70 من کڻک دی شاندار پیداوار حاصل کرن والے پاکستانی کساناں دی تعریف کردیاں ایہنوں ملک دے زرعی شعبے دی اک قابلِ ذکر کامیابی قرار دتا اے۔
فصلّاں دی پیداوار وچ بہتری معیاری بیجاں، کھاداں دے متوازن استعمال تے جدید زرعی طریقے اپنان دے مثبت نتیجیاں دی عکاسی کردی اے۔ فی ایکڑ پیداوار وچ اضافہ نہ صرف قومی غذائی تحفظ نوں مضبوط بنائے گا بلکہ کڻک دی برآمدات تے قیمتی زرمبادلہ حاصل کرن دے نویں موقعے وی پیدا کرے گا۔
انہاں خیالات دا اظہار فاطمہ فرٹیلائزر دے زیرِ اہتمام کساناں دی شاندار کارکردگی نوں سراہن تے انہاں دیاں کامیابیاں دی قدر افزائی لئی منعقدہ تقریب ’’سرسبز دی جیت‘‘ نال خطاب کردیاں کیتا۔
انہاں آکھیا کہ زراعت وچ نجی شعبے دی سرمایہ کاری دی حقیقی کامیابی دا پیمانہ زرعی پیداوار وچ بہتری تے کساناں دی آمدن وچ اضافہ ہونا چاہیدا اے۔
اس توں علاوہ وفاقی وزیر رانا تنویر حسین نے لاہور چیمبر آف کامرس اینڈ انڈسٹری (ایل سی سی آئی) دے صدر نال ملاقات وی کیتی۔ ملاقات وچ پاکستان دیاں زرعی برآمدات وچ اضافے، سرمایہ کاری نوں فروغ دین، زرعی مصنوعات وچ ویلیو ایڈیشن تے عالمی منڈیاں تک رسائی وچ رکاوٹ بنن والے ضابطہ جاتی تے تکنیکی مسئلیاں دور کرن لئی وزارت تے نجی شعبے دے درمیان تعاون مضبوط بناؤن اُتے تبادلہ خیال کیتا گیا۔
