بدقسمتی نال ساڈے لئی انصاف دے دروازے بند نیں: گوہر
190 ملین پاؤنڈ کیس دی جس دن سماعت ہوئی، عمران تے بشریٰ بری ہو جان گے: کھوسہ
توشہ خانہ، سائفر تے عدت کیسز وانگوں ایہ کیس وی اُڈّ جائے گا: سلمان صفدر
اسلام آباد وچ میڈیا نال گل بات
چیئرمین پی ٹی آئی بیرسٹر گوہر علی خان نے آکھیا اے کہ اسیں انصاف لئی ہر دروازہ کھڑکا رہے آں، پر بدقسمتی نال انصاف دے دروازے ساڈے لئی بند نیں۔ جدوں انصاف دے دروازے بند ہو جان تے انصاف ختم ہو جاندا اے۔ اسلام آباد ہائیکورٹ دے باہر میڈیا نال گل بات کردیاں اوہناں آکھیا کہ جس معاشرے وچ انصاف نہ ہووے، اوہ معاشرہ قائم نہیں رہ سکدا۔
اوہناں آکھیا کہ اسیں بہت کچھ برداشت کیتا اے، ساڈے نال ہر فورم اُتے ناانصافی ہوئی اے۔ الیکشن کمیشن توں لے کے ہائیکورٹ تے سپریم کورٹ تک سانوں انصاف نہیں ملیا۔ ہُن آئینی عدالت نے وی ایسا حکم جاری کیتا اے، جس دی وجہ توں ایمرجنسی تے گورنر راج دے خلاف ساڈیاں درخواستاں دی سماعت وچ مشکلات پیدا ہو رہیاں نیں۔
تھری ایم پی او دے تحت گرفتار کارکنان دی رہائی، وزیراعلیٰ خیبر پختونخوا تے سپیکر دی بازیابی نال متعلق مقدمے وی متاثر ہو رہے نیں۔ اوہناں آکھیا کہ ہُن عدالتاں دی آئینی تے قانونی ذمہ داری اے کہ اوہ انصاف فراہم کرن۔
بیرسٹر گوہر نے اسلام آباد ہائیکورٹ دے حکم نوں خوش آئند قرار دیندیاں امید ظاہر کیتی کہ عدالتی حکم اُتے عمل درآمد یقینی بنایا جائے گا۔ اوہناں آکھیا کہ عمران خان نال آخری ملاقات نوں اک سال توں ودھ وقت گزر چکیا اے، جے ملاقاتاں بحال رہندیاں تاں اج حالات اینے خراب نہ ہُندے۔
اوہناں آکھیا کہ بانی پی ٹی آئی دیاں بھیناں نوں اک گھنٹے لئی وی جیل وچ نہیں ہونا چاہیدا، اوہ غیر سیاسی نیں، انہاں نوں رہا کیتا جائے۔
پی ٹی آئی رہنما سردار لطیف کھوسہ نے اسلام آباد ہائیکورٹ دے باہر میڈیا نال گل بات کردیاں آکھیا کہ ساڈا ریکارڈ بالکل واضح اے۔ جس دن عدالت وچ ایہ کیس سُنیا گیا، عمران خان تے بشریٰ بی بی دی بریت یقینی اے۔ کیس وچ کوئی قانونی ثبوت موجود نہیں، 190 ملین پاؤنڈ کیس نال بشریٰ بی بی دا کوئی تعلق ہی نہیں بندا۔
بانی پی ٹی آئی دے وکیل بیرسٹر سلمان صفدر نے گل بات کردیاں آکھیا کہ بانی پی ٹی آئی نے مینوں دسیا سی کہ یکم نومبر نوں وی میرا بلڈ پریشر 192 سی۔ اوہناں آکھیا کہ عمران خان اپنی اہلیہ دی نظر متاثر ہون دی وجہ توں بہت پریشان سن، ایس وجہ توں وی انہاں دا بلڈ پریشر ودھ رہیا اے۔
عمران خان نے مینوں آکھیا کہ میری اہلیہ دے علاج لئی کوشش کیتی جائے۔ بانی پی ٹی آئی تے بشریٰ بی بی، دوناں دی حالت ہسپتال منتقل کرن والی اے۔
بیرسٹر سلمان صفدر نے آکھیا کہ جس طرح توشہ خانہ کیس، سائفر کیس تے عدت کیس عوام دے سامنے ردی دی ٹوکری وچ چلے گئے، ایہ کیس وی اُڈّ جائے گا۔ اوہناں آکھیا کہ میں تے سردار لطیف کھوسہ پروفیشنل وکیل آں، اسیں بیانِ حلفی دے مطابق ملاقات توں بعد کوئی واویلا نہیں کراں گے۔
