گورنر خیبر پختونخوا نوں ہور اختیار دین دا فیصلہ آرڈیننس صدر نوں بھجوا دتا گیا
وزیراعظم دی ایڈوائس اُتے صدرِ مملکت ولوں جلد آرڈیننس جاری کیتا جائے گا، مجوزہ اقدام دے پیشِ نظر قومی اسمبلی دا اجلاس دوبارہ شیڈول کر دتا گیا: ذرائع۔
اسلام آباد
خیبر پختونخوا وچ امن و امان دی صورتحال دے تناظر وچ وفاقی حکومت نے گورنر فیصل کریم کنڈی دے اختیارات وچ اضافے دا فیصلہ کیتا اے، جس لئی نواں آرڈیننس جاری کرن دی تیاری کیتی جا رہی اے۔
حکومتی ذرائع دے مطابق وزیراعظم شہباز شریف نے ایمرجنسی دی صورتحال وچ گورنر نوں حاصل اختیارات بارے مجوزہ آرڈیننس صدرِ مملکت آصف علی زرداری نوں بھجوا دتا اے۔
امکان اے کہ وزیراعظم دی ایڈوائس اُتے صدرِ مملکت جلد ایس آرڈیننس دا اجرا کر دین گے۔
مجوزہ قانونی اقدام دے تحت ایمرجنسی دے نفاذ دوران گورنر نوں پہلے نالوں ودھ اختیارات حاصل ہون گے۔ ایس دے علاوہ خیبر پختونخوا دے 12 خصوصی ضلعیاں دے حوالے نال وی گورنر فیصل کریم کنڈی دے انتظامی اختیارات وچ اضافہ کیتا جائے گا۔
مجوزہ آرڈیننس دے اجرا دے معاملے دے باعث قومی اسمبلی دا اجلاس دوبارہ شیڈول کر دتا گیا اے، کیوں جو قومی اسمبلی دا اجلاس طلب کیتے جان توں بعد آرڈیننس جاری نہیں کیتا جا سکدا۔





















