موسمیاتی تبدیلیاں دا مقابلہ کرن لئی کلائمیٹ آبزرویٹری دا منصوبہ اہم سنگِ میل اے: مریم نواز
منصوبہ ہوا دے معیار، پانی، مٹی تے موسم دی ریئل ٹائم نگرانی دا منفرد مرکز ہووے گا: ایکس اُتے اظہارِ تشکر
پنجاب وچ جرائم دی شرح 70 فیصد گھٹنا خوش آئند اے: وزیراعلیٰ، ٹریفک قوانین اُتے عملدرآمد دی اپیل
لاہور
وزیراعلیٰ مریم نواز نے اپنے ایکس پیغام وچ لاہور وچ زیرِ تعمیر پنجاب کلائمیٹ آبزرویٹری منصوبے اُتے اظہارِ تشکر کیتا اے۔ پنجاب کلائمیٹ آبزرویٹری پاکستان دا اپنی نوعیت دا پہلا منصوبہ اے۔
وزیراعلیٰ مریم نواز نے آکھیا کہ ایس منصوبے نوں اک جدید سہولت دے طور اُتے تیار کیتا جا رہیا اے۔ پنجاب کلائمیٹ آبزرویٹری موسمیاتی تبدیلیاں دا مقابلہ کرن والے پنجاب تے پاکستان دے وژن نوں حقیقت وچ بدلّن دی جانب اک اہم سنگِ میل اے۔
لاہور وچ قائم کیتی جا رہی پنجاب کلائمیٹ آبزرویٹری مصنوعی ذہانت (AI) اُتے مبنی موسمیاتی انٹیلی جنس سسٹم نال لیس ہووے گی۔ ایس منصوبے دے ذریعے موسم بارے پیشگوئی کرنا ممکن ہووے گا۔
مریم نواز نے آکھیا کہ پنجاب کلائمیٹ آبزرویٹری ہوا دے معیار، پانی، مٹی تے موسم دی ریئل ٹائم نگرانی دا اک منفرد مرکز ہووے گی۔
ایس منصوبے وچ ماحولیاتی ڈیٹا تے تحقیقی لیبارٹریاں دے ذریعے نوجوان موسمیاتی سائنسدانوں لئی سکھن دے ودھیرے موقعے پیدا ہون گے۔ عالمی سائنسی تعاون تے بین الاقوامی شراکت داری نوں وی اک چھت تھلے اکٹھا کیتا جائے گا۔
پنجاب کلائمیٹ آبزرویٹری وچ جدید ترین سہولتاں دے ذریعے ابتدائی انتباہی نظام تے سیلاب دی پیشگوئی ممکن ہو سکے گی۔
ایس منصوبے دے ذریعے موسمیاتی تیاری، آفات توں بحالی، آبی تحفظ، پائیدار وسائل دے انتظام، موسمیاتی تبدیلیاں دے مطابق زراعت تے جنگلاں دے تحفظ لئی وی اقدامات کیتے جا سکن گے۔
مریم نواز نے آکھیا کہ اپنے ماحول، اپنی کمیونٹیز تے آون والیاں نسلاں دی حفاظت ساڈا عزم اے۔
پنجاب وچ جرائم دی شرح وچ 70 فیصد کمی خوش آئند اے: مریم نواز
وزیراعلیٰ مریم نواز نے منظم جرائم دی روک تھام تے انہاں دے خلاف جدوجہد دے عالمی دن اُتے اپنے پیغام وچ آکھیا کہ منظم جرائم معاشرے دے امن، استحکام تے ترقی لئی سنگین خطرہ نیں۔
منظم جرائم دی روک تھام لئی ہر سطح اُتے مشترکہ اقدامات ضروری نیں۔ انسانی سمگلنگ، منشیات تے غیر قانونی سرگرمیاں دا خاتمہ وقت دی اہم ضرورت اے۔
وزیراعلیٰ نے آکھیا کہ جرائم توں پاک معاشرے دے قیام لئی قانون نافذ کرن والے اداریاں نوں ہور مؤثر تے فعال کردار ادا کرنا پئے گا۔
قانون دی بالادستی، عوام دے تحفظ تے جرائم دے خاتمے لئی اجتماعی کوششاں ضروری نیں۔ پُرامن، محفوظ تے جرائم توں پاک معاشرے دی تشکیل حکومت دیاں اولین ترجیحات وچ شامل اے۔
مریم نواز نے آکھیا کہ پنجاب وچ جرائم دی مجموعی شرح وچ تقریباً 70 فیصد تک کمی دا رجحان خوش آئند اے۔
سڑک حادثات دے متاثرین نوں خراجِ عقیدت، ٹریفک قوانین اُتے عملدرآمد دی اپیل
وزیراعلیٰ مریم نواز نے سڑک حادثات دے متاثرین دی یاد دے عالمی دن اُتے اپنے پیغام وچ حادثات وچ جاں بحق ہون والے افراد نوں خراجِ عقیدت پیش کیتا۔
اُنہاں آکھیا کہ سڑک حادثات وچ اپنے پیاریاں نوں گواون والے خاندانواں دے دکھ وچ برابر دے شریک آں تے زخمی افراد دی جلد صحت یابی لئی دعاگو آں۔
مریم نواز نے آکھیا کہ انسانی جاناں دے تحفظ لئی ٹریفک قوانین اُتے عملدرآمد انتہائی ضروری اے۔ تیز رفتاری، لاپرواہی تے ٹریفک قوانین دی خلاف ورزی قیمتی انسانی جاناں دے ضیاع دا سبب بندی اے۔
محفوظ سفر لئی ٹریفک قوانین دی پابندی ہر شہری دی ذمہ داری اے۔ ہیلمٹ تے سیٹ بیلٹ دا استعمال حادثات وچ جانی نقصان گھٹاؤن لئی اہم کردار ادا کردا اے۔





















