گلوبل صمود فلوٹیلا دے سنگیاں اُتے بدترین اسرائیلی تشدد دا انکشاف زنانیاں نال جنسی زیادتی دیاں خبراں وی سامنے آ گئیاں
اسرائیلی جیل ‘خوف تے دہشت دا گڑھ’: ترکیہ اپڑن والے فلوٹیلا سنگیاں تے وحشیانہ ظلم دا انکشاف؛ لتاں باہواں بھن دتیاں، زنانیاں نال جنسی بدسلوکی، سعد ایدھی سمیت 400 توں ودھ بندے ڈی پورٹ
غزہ جان والے “گلوبل صمود فلوٹیلا” دے استنبول پہنچن والے کارکناں چوں بوہتے سنگیاں دی حالت بہت ای ماڑی سی جدوں اوہ ترکیہ پہنچے۔ پردیسی میڈیا مطابق، اسرائیلی ظلم تے مار کٹائی پاروں فلوٹیلا دے بندیاں دے پنڈے (جسم) نیلے ہو چکے سن، کئی بندے پیروں چلن جوگے نہیں سن جنہاں نوں وہیل چیئرز تے لیایا گیا، تے چوکھے بندیاں نوں علاج لئی فوراً ہسپتال لے جایا گیا۔ آسٹریلیا دی فلم ساز تے فلوٹیلا سنگت جولیٹ لامونٹ نے دَسیا کہ کئی لوکاں دیاں پسلیاں ٹٹیاں ہوئیاں نیں، جدکہ زنانیاں (خواتین) نال جنسی بدسلوکی دے واقعے وی ہوئے تے قیدیاں نوں اندھے واہ (نامعلوم) دوائیاں دے انجکشن وی لائے گئے۔
اٹلی دے صحافی الیساندرو مانتووانی نے اسرائیل دے قید خانے نوں خوف تے دہشت دی تھاں دَسدیاں آکھیا کہ جیل چ وڑدیاں ہی کٹنا مارنا شروع کر دتا گیا تے پین لئی پانی تے کھان لئی روٹی وی ناپ تول کے (محدود) دتی گئی۔ کم کار سنبھالن والیاں (منتظمین) مطابق فلوٹیلا دے 15 سنگیاں نال زیادتی سمیت جنسی بدسلوکی دے واقعے ہوئے، کئی لوکاں نوں ربڑ دیاں گولیاں ماریاں گئیں تے کئی ارکان دیاں ہڈیاں ٹٹیاں ہوئیاں نیں۔ چیتے رہے کہ ایس سمندری قافلے وچ پاکستان دے سعد ایدھی سمیت 400 توں ودھ بندیاں نوں اسرائیلی فوج نے غیر قانونی قید کیتا سی، جنہاں نوں کل ترکیہ ڈی پورٹ کر دتا گیا۔
