“صدر تے وزیراعظم ولوں دہشت گرداں دے خلاف کامیاب کارروائی اُتے فورسز نوں خراجِ تحسین”
صدرِ مملکت آصف علی زرداری تے وزیراعظم محمد شہباز شریف نے ضلع بارکھان دے علاقے نوشم وچ “فتنہ ہندوستان” دے دہشت گرداں دے خلاف کامیاب کارروائی اُتے سکیورٹی فورسز نوں شاباش دتی اے۔
صدر آصف علی زرداری نے کارروائی دے دوران شہید ہون والے میجر توصیف احمد بھٹی تے اوہناں دے ساتھیاں نوں سلام پیش کردے ہوئے آکھیا جے شہدا نے وطن دی امن تے سلامتی لئی وڈیاں قربانیاں دتیاں نیں۔ اوہناں دا کہنا سی کہ قوم اپنے بہادر شہدا تے غازیاں نوں ہمیشہ یاد رکھے گی۔ صدر نے شہدا دے درجیاں دی بلندی تے گھر والیاں لئی صبر دی دعا کیتی تے عزم دہرایا کہ دشمن دے ناپاک ارادیاں نوں ہر حال وچ مٹی وچ ملایا جائے گا۔
دوجے پاسے، وزیراعظم شہباز شریف نے وی بارکھان آپریشن وچ فتنہ الہندوستان دے 7 دہشت گرداں نوں ہلاک کرن اُتے فوج دے افسراں تے جواناں دی تعریف کیتی۔ وزیراعظم نے میجر توصیف احمد بھٹی، نائیک فدا حسین، سپاہی ذاکر حسین، سپاہی سہیل احمد تے سپاہی محمد ایاز دی شہادت اُتے اوہناں نوں خراجِ تحسین پیش کیتا۔
وزیراعظم نے آکھیا جے وطن دے ایہناں ہیریاں نے دیس دی حفاظت کردے ہوئے وفاداری دی وڈی مثال قائم کیتی اے۔ اوہناں دا کہنا سی کہ پاکستانی قوم اپنے شہدا دی قربانی نوں کدی نہیں بھلائے گی تے پوری قوم اپنی بہادر فوج دے موڈھے نال موڈھا جوڑ کے کھڑی اے۔
