“چین دی پکی پیڈھی حمایت، خطے وچ امن لئی کافی اگے ودھ چکے آں: وزیراعظم”
وزیراعظم محمد شہباز شریف نے اکھیا اے کہ اسیں چینی صدر شی جن پنگ دے 4 نکاتی امن ایجنڈے دی پوری تائید کردے آں تے امن کوشیشاں دی لگاتار حمایت کرن تے اوہناں دے شکر گزار آں۔
وزیراعظم شہباز شریف چین دے عظیم عوامی ہال (گریٹ ہال آف دی پیپل) وچ وفد نال رل کے پہنچے جتھے چین دے وزیراعظم لی چیانگ نے اوہناں دا بھروواں (پرتپاک) استقبال کیتا، گرمجوشی نال ہتھ ملایا گیا، خیرسگالی دے جذبات دا اظہار کیتا گیا، قومی ترانے وجائے گئے تے مسلح افواج دے چاق و چوبند دستیاں نے گارڈ آف آنر پیش کیتا۔
ایس موقعے تے پاکستان تے چین دے وزرائے اعظم نے اپنے اپنے وفود دا تعارف کروایا۔
وزیراعظم شہباز شریف نے چینی ہم منصب نال وفد سمیت ملاقات دے موقعے تے اکھیا، “چین دے دورے دی پرتپاک دعوت دین تے تساڈا بے حد مشکور واں، تساڈے عظیم ملک دا دورہ کرنا میرے لئی ہمیشہ بہت وڈی خوشی دا باعث ہوندا اے، جدیوں وی چین آؤندے آں، سانوں نویں تعمیرات تے عظیم ترقی دیکھن نوں ملدی اے۔”
اوہناں اکھیا، “چین دے بھرا لوکاں نال صوبہ شانشی دی کوئلے دی کان وچ دھماکے تے افسوس (تعزیت) دا اظہار کردا واں، دھماکے پاروں قیمتی جاناں ضائع ہوئیاں تے کئی لوک زخمی ہوئے، اسیں متاثرہ ٹبراں (خاندانوں) نال پوری یکجہتی دا اظہار کردے آں۔”
اوہناں ہور اکھیا کہ اسیں ایس ویلے تاریخ دے اک بڑے اہم موڑ تے کھلوتے آں، پاکستان تے چین اپنے شاندار بیتے (ماضی)، دوستی تے سفارتی تعلقات دا 75واں سال منا رہے نیں، پاکستان تے چین دی دوستی دی نینھ (بنیاد) ساڈے بانی رہنماواں نے رکھی سی۔
وزیراعظم نے چینی ہم منصب نوں دسیا کہ فیلڈ مارشل نے ایرانی تے امریکی قیادت وچکار رابطیاں وچ اہم کردار نبھایا، نائب وزیراعظم نے وی ایران تے خلیجی ملکاں وچ اپنے ہم منصباں نال رابطے کیتے، دعا گو آں کہ امن ہمیشہ لئی بحال ہو جائے۔
اوہناں اکھیا کہ اسیں دو پاسی تعلقات نوں ہور اگے ودھاؤن دے سفر تے ٹُر رہے آں، اج دنیا بڑے نازک دور توں لنگھ رہی اے، خلیجی خطے وچ وی بحران موجود اے، پاکستان نے امریکا تے ایران وچکار صلح صفائی (ثالثی) وچ مخلصانہ کردار ادا کیتا، فیلڈ مارشل سید عاصم منیر ہنے تہران توں واپس آئے نیں، فیلڈ مارشل ایس اہم دورے نوں چھڈنا نہیں چاہندے سن، اوہ رات بھر سفر وچ رہے تے ایس ملاقات وچ شامل ہوئے۔
