“کراچی وچ عاطف اسلم دے کنسرٹ وچ ہنگامہ آرائی، پروگرام وچکار ای روکنا پے گیا”
کراچی دے ڈی ایچ اے سپورٹس کلب وچ عاطف اسلم دے کنسرٹ دے دوران اس ویلے بدمزگی پیدا ہوئی جدوں اک خاتون مداح سکیورٹی توڑ کے اسٹیج تے چڑھ گئیاں تے گلوکار نال سیلفیاں بنان لگ پئیاں۔ سوشل میڈیا تے وائرل ویڈیو وچ ویکھیا جا سکدا اے کہ عاطف اسلم گانا گا رہے سن جدوں ایہ خاتون اسٹیج تے پہنچ گئیاں۔ عاطف اسلم نے شروع وچ بڑے پیار نال اوہناں نال تصویر کھنچوائی۔
پر گل اس ویلے خراب ہوئی جدوں تصویر بنوان دے بعد وی خاتون اسٹیج توں تھلے نہ اتریاں بلکہ بار بار سیلفیاں لین دی کوشش کردی رہیاں۔ انتظامیہ دے اشاریاں دے باوجود اوہ عاطف اسلم دے نیڑے جاندی رہیاں۔ آخر کار سکیورٹی والیاں نے مداخلت کر کے خاتون نوں اسٹیج توں تھلے اتارا، جس توں بعد کنسرٹ دوبارہ شروع ہویا۔ لوکاں نے سوشل میڈیا تے فنکاراں دی سکیورٹی لئی سخت انتظامات دا مطالبہ کیتا اے۔
