فرحان سعید دا مرداں بارے بیان سوشل میڈیا تے نویں بحث چھڑ گئی
پاکستانی گلوکار تے اداکار فرحان سعید نے رشتیاں، مرداں دے رویّاں تے سوانیاں (خواتین) دی خودمختاری بارے اپنے خیالات دا اظہار کردے ہوئے اک ایسا بیان دتا اے جس نے سوشل میڈیا تے نویں بحث چھیڑ دتی اے۔
حال ای وچ اپنی آؤن والی فلم دی تشہیر دے سلسلے وچ اک شو وچ شرکت دے دوران فرحان سعید نے اداکارہ مامیا شاہ جعفر نال گل بات کردے ہوئے مرداں دے عمومی رویّے تے تبصرہ کیتا۔ گفتگو دے دوران جڈوں مامیا نے آکھیا کہ اکثر منڈے جھوٹھے وعدیاں تے دھوکے نال رشتیاں نوں نقصان پہنچاؤندے نیں، تاں فرحان سعید نے بے ساختہ انداز وچ آکھیا کہ صرف چند نہیں بلکہ زیادہ تر مرد فراڈ ہوندے نیں۔
اداکار نے سوانیاں نوں مشورہ دتا کہ وہ کسے وی رشتے وچ سب توں پہلے اپنی عزتِ نفس، خوشی تے اپنی ذات نوں ترجیح دین۔ اوہناں دے مطابق سوانیاں نوں اپنی پچھان تے ذہنی سکون قربان کر کے کسے وی تعلق نوں بچان دی کوشش نہیں کرنی چاہیدی۔ فرحان سعید دا کہنا سی کہ اکثر سوانیاں ایہہ سمجھدیاں نیں کہ اوہ اپنی محبت یا قربانی نال کسے مرد دی شخصیت بدل سکدیاں نیں، پر حقیقت وچ ایسا بہت گھٹ ہوندا اے۔ اوہناں آکھیا کہ سوانیاں نوں “کسے نوں بچان” والے رویّے توں باہر نکلنا ہووے گا کیونکہ ایس سوچ وچ سب توں ودھ نقصان خود سوانیاں نوں ای اٹھانا پیندا اے۔
اوہناں ایہہ وی واضح کیتا کہ بھاویں کج مرد وی تعلقات وچ چالاک سوانیاں پاروں متاثر ہوندے نیں، پر عام طور تے سوانیاں ای زیادہ جذباتی نقصان اٹھاؤندیاں نیں۔
فرحان سعید دے ایس دوٹوک بیان نے مداحاں وچ وکھو وکھ آرا نوں جنم دتا اے، جتھے کج صارفین نے اوہناں دی گل نال اتفاق کیتا اتے کج نے ایہنوں سخت عمومی رائے قرار دتا۔ پر اوہناں دا ایہہ بیان رشتیاں وچ خود اعتمادی، حدود تے خود احترام دے موضوع نوں اک واری پھر نمایاں کرن وچ کامیاب رہا اے۔
