سلمان خان نے فلم ’’کالا ہرن‘‘ نوں ریلیز ہون توں روکن لئی قانونی نوٹس گھل دتا اے

بالی ووڈ دے سپر سٹار سلمان خان دی قانونی ٹیم نے اک نویں فلم ”کالا ہرن: دی بیٹل فار لیگیسی“ دے میکرز (بناؤن والیاں) نوں قانونی نوٹس گھل (بھجوا) کے ایہدی ریلیز روکن دا مطالبہ کر دتا اے۔

بھارتی میڈیا دیاں خبراں دے مطابق ایہ فلم مبینہ طور تے کالے ہرن دے اوس مشہور کیس تے بنی اے جیہدا سامنا سلمان خان ورھیاں (برسوں) توں کچہریاں (عدالتوں) وچ کر رہے نیں۔ سلمان خان دے وکلا ولوں گھلے گئے ایس نوٹس وچ منگ کیتی گئی اے کہ فلم دی پبلسٹی (تشہیر) تے ریلیز نوں ترت (فوری طور پر) روک دتا جائے تے ہن تیکر سامنے آؤن والے سارے پوسٹرز تے اشتہاری مواد نوں ہٹا دتا جائے۔ نوٹس وچ ایہ چتاؤنی (انتباہ) وی دتی گئی اے کہ جے ایہناں گلاں تے عمل نہ کیتا گیا تے سخت قانونی کارروائی کیتی جائے گی۔ دوجے پاسے فلم دے پروڈیوسر امیت جانی ایس قانونی نوٹس تے بڑے تپ گئے (برہم نظر آتے) نیں تے اوہناں نے ایہنوں سچ دباؤن دی اک کوشش آکھیا اے۔

یاد رہے کہ امیت جانی ایس توں پہلے وی رپھڑ والے (متنازع) موضوعات تے فلماں پروڈیوس کر چکے نیں۔ اوہناں دی اک پرانی پروڈکشن اک مشہور درزی دے قتل دے واقعے تے مبنی سی۔ امیت جانی نے ایس سارے معاملے تے اپنا ردعمل دیندیاں الزام لایا اے کہ اوہناں نوں تے اوہناں دی ٹیم نوں دباؤ وچ لیاؤن دی کوشش کیتی جا رہی اے۔ ایس نوٹس دا مقصد ایہ اے کہ سلمان خان دی شہرت تے تکڑے پن (طاقت) نوں ورت کے لوکاں تے رعب پایا جائے تاکہ اوہ پچھے ہٹ جاون۔ فلم بناؤن والیاں دا دعویٰ اے کہ ایہ کہانی سچی زندگی دی قانونی لڑائیاں تے ایکشن نال بھرے واقعے توں متاثر ہو کے لکھی گئی اے جیہنوں انٹرنیشنل معیار دے مطابق فلمایا جا رہا اے۔

بھاویں (اگرچہ) فلم دے ڈائریکٹر بھارت سنگھ تے پروڈیوسر امیت جانی نے کُھل کے ایہ نہیں آکھیا کہ ایہ پورے دی پوری سلمان خان دی زندگی تے بنی اے، پر فلم دا ناں تے پچھوکاڑ (پس منظر) ایسے پاسے ای اشارہ کردے نیں۔ ایس رپھڑ (تنازع) دے باوجود میکرز نے ہالے جیہا ای فلم دا پہلا پوسٹر وی جاری کیتا اے جیہدے وچ اک لُکیا چھپیا (پراسرار) کردار نظر آ رہا اے تے اعلان کیتا گیا اے کہ فلم دا ٹیزر 20 جون نوں پیش کیتا جائے گا۔ ابھی تک سلمان خان یا اوہناں دی ٹیم نے امیت جانی دے الزاماں تے کوئی عوامی جواب نہیں دتا، پر ایس قانونی جھگڑے نے فلم دی ریلیز تے سوالیہ نشان لا دتا اے۔