’دیسی بلنگ‘: دبئی وچ بھارتی ارب پتی دی پاکستانی نژاد بیوی، جِنہاں نوں شوہر دے ہور عورتاں نال پارٹیواں وچ جان اُتے کوئی اعتراض نئیں
“جدوں توں میں اپنے شوہر ستیش دے نال آں، ہر سویرے اُناں دے پَیراں دی مالش کردی آں۔ اوہ اک شہزادے وانگ سُتے ہوئیاں اُٹھدے نیں۔ ہندو ہون دے ناتے اوہ ایہہ مننے نیں کہ جے بیوی ہر سویرے اپنے شوہر دے پَیر چھُوے تے گھر وچ لکشمی آندی اے۔”
ایہہ منظر نیٹ فلکس دے نئے ریئلٹی شو ’دیسی بلنگ‘ دے شروع وچ ہی ویکھن والیاں دے سامنے آندا اے، جتھے دبئی وچ رہن والے بھارتی ارب پتی کاروباری شخصیت ستیش سنپال اپنی بیوی تابندہ دے ہتھاں نال پَیراں دی مالش دا لطف لے رہے ہُندے نیں۔
ایہہ اوہ ابتدائی منظر اے جیہڑا ویکھن والیاں دی توجہ اس شو ول کھچدا اے۔ ’دیسی بلنگ‘ ناں دا ایہہ ریئلٹی شو دبئی وچ رہن والے مالدار بھارتی شہریاں دیاں پُرتعیش زندگیاں، رشتیاں، کاروبار، پارٹیواں، سیاست تے پیچیدگیاں نوں اُجاگر کردا اے۔
اس شو دے کرداراں وچ ٹی وی سٹار تیجسوی پرکاش، کرن کندرا، جَبَل پور نال تعلق رکھن والے ستیش سنپال تے اُناں دی اہلیہ تابندہ وی شامل نیں۔
تابندہ اک پاکستانی نژاد برطانوی خاتون نیں، جنہاں دیاں کئی پہچاناں نیں۔ کُجھ لوک اُناں نوں اک مالدار کاروباری شخصیت دی بیوی دے طور تے ویکھدے نیں، جدکہ ہور لوک اُناں نوں اک کامیاب کاروباری خاتون سمجھدے نیں۔
