24 گھنٹیاں وچ ملک دے وکھو وکھ ضلعیاں وچ موسم بارے الرٹ جاری
اگلے 12 توں 24 گھنٹیاں دے دوران پنجاب دے بالائی علاقیاں سمیت گلگت بلتستان، آزاد کشمیر تے خیبر پختونخوا دے بالائی علاقیاں وچ مینہ (بارش) پین دا امکان اے۔
اسلام آباد سمیت پنجاب دے شہراں بشمول مری، راولپنڈی، اٹک، چکوال، جہلم، گجرات، گوجرانوالہ، حافظ آباد، سیالکوٹ تے منڈی بہاؤالدین وچ مینہ متوقع اے۔
خیبرپختونخوا دے وکھو وکھ ضلعیاں بشمول چترال، دیر، سوات، کالام، منگورہ، مالاکنڈ، بٹگرام، مانسہرہ، ایبٹ آباد، ہری پور، مردان، نوشہرہ، پشاور، چارسدہ، کوہاٹ، کرک، بنوں تے ڈیرہ اسماعیل خان وچ مینہ پین دا امکان اے۔
بلوچستان دے شہراں کوئٹہ، ژوب، زیارت، قلعہ سیف اللہ، قلعہ عبداللہ، چمن، پشین تے سبی وچ مینہ دی پیش گوئی کیتی گئی اے، ایسے طرح گلگت بلتستان تے آزاد کشمیر دے علاقیاں سکردو، ہنزہ، نگر، غزر، دیامر، گلگت، گھانچے، استور، خرمنگ، شگر، مظفرآباد، باغ، راولاکوٹ، حویلی، پونچھ تے وادی نیلم وچ وی مینہ پے سکدا اے۔
این ای او سی نے خبردار کیتا اے کہ مینہ دے نال وکھو وکھ علاقیاں وچ گرج چمک تے تیز ہواواں دے نال گڑے (ژالہ باری) پین دا وی امکان اے، تیز ہواواں، آسمانی بجلی تے گڑے کمزور تعمیرات، رکھاں (درختاں)، کھڑیاں فصلاں تے بجلی دیاں لائناں نوں نقصان پہنچا سکدے نیں۔
این ڈی ایم اے نے انتباہ جاری کیتا اے کہ مینہ پاروں سڑکاں اُتے پھسلن ہو سکدی اے تے ٹریفک دی روانی متاثر ہون دا خطرہ اے، شہری غیر ضروری سفر توں گریز کرن، گڈی احتیاط نال چلان تے موسمی ہدایات اُتے عمل کرن، تیز ہوا تے طوفان دے دوران رکھاں، کمزور تعمیرات تے تنصیبات توں دور رہن۔
دوجے پاسے سیاحاں تے مسافراں توں اپیل اے کہ شمالی علاقیاں دا سفر کرن توں پہلے موسم تے سڑکاں دی صورتِ حال ضرور چیک کرن، عوام این ڈی ایم اے دی آفیشل ایپ ’پاک این ڈی ایم اے ڈیزاسٹر الرٹ‘ توں ویلے سِر معلومات حاصل کرن۔
مزید برآں این ڈی ایم اے نے سارے صوبائی تے ضلعی اداریاں نوں ممکنہ موسمی صورتِ حال نال نمٹن لئی الرٹ رہن دی ہدایت کر دتی اے۔
