فیفا ورلڈ کپ 2026 دے میچز شدید گرمی پاروں متاثر ہوون دا خدشہ
ماحولیات تے تحقیق کرن والے ادارے ‘ورلڈ ویدر ایٹریبیوشن’ دی نویں رپورٹ دے مطابق، امریکہ، کینیڈا تے میکسیکو وچ ہون والے ورلڈ کپ دے دوران تقریباً چوتھائی (25%) میچ اجیہے حالات وچ کھیلے جان دا امکان اے جتھے درجہ حرارت کھلاڑیوں تے تماشائیاں لئی خطرناک حد تک ودھ سکدا اے۔
رپورٹ وچ دسیا گیا اے کہ 104 میچاں دے ایس وڈے ٹورنامنٹ وچ گھٹو گھٹ پنج میچ اجیہے موسم وچ ہون دا ڈر اے جتھے میچ نوں اگے پاؤن (ملتوی کرن) دی سفارش کیتی جا سکدی اے۔
ماہرین نے ایس بارے ‘ویٹ بلب گلوب ٹیمپریچر’ (WBGT) انڈیکس دی مدد نال اندازہ لایا اے، جیہڑا ایہہ ویکھدا اے کہ انسانی جسم گرمی وچ اپنے آپ نوں کس حد تک ٹھنڈا رکھ سکدا اے۔
‘فیف پرو’ دے میڈیکل ڈائریکٹر ونسنٹ گوٹبارگ نے آکھیا کہ جے WBGT درجہ حرارت 26 ڈگری سینٹی گریڈ توں ودھ جاوے تاں خاص حفاظتی انتظام ضروری ہو جاندے نیں، جدکہ 28 ڈگری توں اوپر میچ نوں روکن دی سفارش کیتی جاندی اے۔
فیفا نے جواب وچ آکھیا اے کہ کھلاڑیوں تے تماشائیاں دے بچاؤ لئی کولنگ سسٹم، ہائیڈریشن بریکس (پانی پین دا وقفہ) تے طبی سہولتاں سمیت وکھو وکھرے منصوبے تیار کر لئے گئے نیں-
ماہرین دا مننا اے کہ سخت گرمی پاروں کھیل دا انداز وی متاثر ہوئے گا تے ٹیماں زیادہ دھیان نال حکمت عملی اپناؤن گئیاں۔
رپورٹ دے مطابق میامی، نیویارک، فلاڈیلفیا تے کنساس سٹی ورگے شہراں وچ گرمی دا خطرہ سب توں زیادہ ہوئے گا، جدکہ فائنل میچ دے دوران بھی خطرناک حد تک درجہ حرارت ودھن دا امکان جتایا گیا اے۔
