دوائیاں دیاں قیمتاں وچ وادھے اُتے بزرگ دی فریاد

تحریر: اکرم عامر سرگودھاا

اللہ تعالیٰ دا فرمان اے کہ نبی پاک صلی اللہ علیہ وآلہ وسلم تے انبیاء کرام توں بعد دنیا وچ انسانی رشتیاں وچ سب توں افضل درجہ والدین دا اے، اللہ تے رسول ؐ دی اطاعت دے بعد اولاد نوں ماں باپ دی اطاعت تے فرمانبرداری دا حکم دتا گیا اے تے ایہناں دی خدمت گزاری، ایہناں نال نرم تے شفیق رویہ روا رکھنا اولاد اُتے لازم قرار دتا گیا اے، ماں دی اہمیت ایس لئی زیادہ اے کہ اوہ اللہ رب العزت دے بعد انسان دی تخلیق دا ذریعہ اے تے گرمی ہوئے یا سردی، بیمار ہوئے یا تندرست اولاد دی پرورش لئی تکلیف تے مشقت زیادہ ماں ای برداشت کردی اے ایہو وجہ اے کہ پیغمبر عظیم حضرت محمد صلی اللہ علیہ وآلہ وسلم دی حدیث مبارک اے کہ ’’جنت ماں کے قدموں تلے ہے‘‘ پر باپ دا رتبہ وی کسے مقام اُتے گھٹ نہیں رکھیا گیا، ماں باپ دے نال بہتر سلوک ایہناں دا بڑھاپے وچ سہارا بننا ایہناں نوں عزت و تکریم دینا، ایہناں دے نال نرم رویہ اپنانا تے ایہناں دے سخت لہجہ نوں برداشت کرن دا وی اولاد لئی حکم اے تے ایہہ کہ والدین اولاد توں سخت رویہ رکھن تے وی اولاد اُتے والدین دی فرمانبرداری لازم قرار دتی گئی اے۔ اولاد اُتے لازم اے کہ اوہ اللہ تعالیٰ تے نبی پاک ؐ دی اطاعت وانگوں والدین دے ہر حکم دی تعمیل کرن تے ایہناں نال ہمیشہ محبت تے خلوص نال پیش آن۔ والدین دی رائے نوں اپنی رائے اُتے ترجیح دین، یعنی والدین دی رائے نوں اپنی رائے توں بہتر و اعلیٰ سمجھ کے ایہنوں تسلیم کرن، خاص طور تے جدوں والدین بڑھاپے وچ اپڑ جان تے ایہناں دی ضروریات، جذبات، احساسات دا خیال رکھنا وی اولاد لئی ضروری قرار دتا گیا اے۔
زمانے دی گردش تے ترقی نے بوہت کجھ بدل کے رکھ دتا اے، ایشیائی و مغربی ملکاں وچ والدین دا احترام ختم ہو کے رہ گیا اے، یورپ وچ تے اولاد اپنے بڈھے والدین دا سہارا بننا ضروری نہیں سمجھدی تے یورپ وچ جویں خواتین و افراد بڑھاپے ول آندے نیں تے ایہناں دی اولاد ایہناں نوں سرکاری ’’اولڈ ایج ہومز‘‘ وچ چھڈ آندی اے، یورپی نوجوان اولڈ ایج ہوم وچ مقیم اپنے والدین نوں ملنا وی بوجھ سمجھدے نیں ایسے طرح یورپ وچ بزرگاں دی اکثریت عمر دا آخری حصہ اپنی اولاد نال دورران (بزرگاں) لئی بنائے جان والے سرکاری سنٹرز وچ لنگھاندے نیں۔ یورپی ملکاں دی نسبت ایشیائی ملکاں خاص طور تے اسلامی ملکاں وچ بزرگاں دی قدر و قیمت قدرے ماضی وانگوں قائم اے ایہناں ملکاں وچ بزرگاں نوں اپنے توں دور اولڈ ایج ہومز وچ رکھن دی شرح نسبتاً گھٹ اے تاں ایہناں ملکاں وچ ہن وی انج دے سنگدل تے سفاک لوک موجود نیں جیہڑے جوانی وچ پیر رکھدے ای اپنے بڈھے والدین جنہاں نے ایہناں نوں طرح طرح دیاں مشتقاں تے اذیتاں نال پالیا ہوندا اے نوں اولڈ ایج ہومز وچ چھڈ آندے نیں۔
ایہہ گل ٹھیک اے کہ ہر امیر تے غریب دے گھر وچ کوئی نہ کوئی کسے نہ کسے طرح دی بیماری وچ مبتلا اے تے دل خراش و المناک گل اے ماہ رواں وچ پاکستان وچ دوائیاں دیاں قیمتاں وچ 25 توں 264 فیصد تیکر وادھا ویکھن وچ آیا اے۔ سرمایہ دار طبقے نوں تے دوائیاں دیاں قیمتاں وچ وادھے نال کوئی فرق نہیں پیا پر ایس نال دو ویلے دی روٹی توں تنگ مزدور تے محنت کش طبقہ دوائیاں جنہاں دی پہنچ توں پہلے ای دور سن دی کمر ٹٹ کے رہ گئی اے غریب تے متوسط طبقہ علاج معالجہ لئی سرکاری ہسپتالاں ول جاندا اے پر سندھ بلوچستان پنجاب کے پی کے دے سرکاری ہسپتالاں وچ دوائیاں تے طبی سہولتاں دا پہلے ای فقدان اے ایس طرح غریب طبقہ دی اکثریت علاج معالجہ نہ ہو پان پاروں گھراں وچ ای سسک سسک کے دم توڑ دیندی اے۔ ایسے تناظر وچ سوشل میڈیا اُتے اج کل اک دل دہلا دین والی پوسٹ گردش کر رہی اے ، جیہڑی اک بزرگ دی اے، جس دی تحریر کجھ انج اے۔
’’پتر توں پیسے منگن توں شرم آندی اے، وزیراعظم صاحب دوائیاں سستیاں کر دیو‘‘۔ سوشل میڈیا دا استعمال کرن والے ہر نرم دل تے ذی شعور بندے نے ایس پوسٹ نوں اپنی فیس بک اُتے لا رکھیا اے۔ دیگر سوشل میڈیا اُتے وی وائرل نظر آن والی بزرگ دی ایہہ تحریر اصل وچ ہر گھر دے اندر لُکے ہوئے حقائق نیں، موجودہ حالات وچ غریب توں غریب بندا وی اپنی عزت نفس مجروح ہون دے ڈر توں دل تڑپا دین والا کڑوا سچ بولن توں قاصر اے۔ ایہہ وی سچ اے کہ نوجوان نسل دی اکثریت اپنے عمر رسیدہ والدین دی اوہ خدمت نہیں کر پا رہی جس دا اولاد لئی اللہ پاک نے حکم دے رکھیا اے۔
پاکستان وچ وی ہزاراں بزرگ، خواتین وافراد اولڈ ایج ہومز وچ زندگی لنگھا رہے نیں جنہاں وچ اکثریت دی اولاداں حیات نیں تے کئی انج دے بزرگ خواتین و افراد وی موجود نیں جنہاں دی اولاداں معاشرے وچ نمایاں مقام رکھدیاں نیں پر اوہناں نے اپنے والدین نوں اپنے اُتے بوجھ سمجھدے ہوئے ایہناں نوں سرکاری اولڈ ایج ہومز وچ منتقل کر دتا اے جد کہ کئی انج دی ناخلف اولاداں وی نیں جنہاں نے اپنے والدین نوں اولڈ ایج ہومز وچ داخل کروا کے معاشرے وچ ایہہ تاثر دے رکھیا اے کہ ایہناں دے والدین دارفانی توں رخصت ہو چکے نیں۔ عید یا خوشی دے کسے تہوار اُتے ٹی وی چینلز ایہناں اولڈ ایج ہومز اُتے پروگرام نشر کردے نیں۔ ایہہ پروگرام ویکھ کے ایہناں اولڈ ایج ہومز وچ رہن والے بزرگاں دے تاثرات و انکشافات دل دہلا کے رکھ دیندے نیں پر ایس دے باوجود نوجوان نسل اُتے ایس دا کوئی اثر نہیں ہونداایہناں نوں اولڈ ایج ہومز وچ چھڈ کے جاندے نیں، کیوں جے ایہناں دی انسانی حس مر چکی ہوندی اے تے اوہ بظاہر تے انسان حقیقت وچ حیوان ہو چکے نیں ایہہ سب اخلاقی پستی اخلاقی گراوٹ دا نتیجہ اے ایس دی وڈی وجہ تعلیمی اداریاں تے مدرسیاں وچ اخلاقیات دی باقاعدہ تعلیم دا نہ ہونا اے۔ ایسے لئی اوہ اپنے والدین توں چھٹکارا پان لئی ایہناں نوں اولڈ ایج ہومز وچ چھڈ آندے نیں۔ ایہو نہیں نکے وڈے شہراں دی عام سڑکاں، گلی محلیاں دے فٹ پاتھاں تے دکاناں دے باہر رات دے ویلے ویکھیے تے اوتھے وی اکثر بزرگ خواتین و افراد بے یارومددگار پئے ہوندے نیں جیہڑے کسے دے بھرا، پیو، ماں، بھین یا پتر ہوندے نیں پر معاشرے دا کوئی بندا ایہناں نوں اپنان لئی تیار نہیں ہوندا، تے انج دے بندیاں دی اکثریت دی موت ایسے حالت وچ سڑکاں ، چوراہواں اُتے واقع ہو جاندی اے تے ایہناں نوں لاوارث قرار دے کے دفن کر دتا جاندا اے۔ گل کتھوں کتھے نکل گئی گل ہو رہی سی بزرگ دی ایس پوسٹ دی جس وچ کہیا گیا اے کہ ’’پتر توں پیسے منگدے شرم آندی اے، وزیر اعظم صاحب دوائیاں سستیاں کر دیو ‘‘ ایہہ پوسٹ معاشرے لئی اک سبق اے جنہوں پڑھ کے سانوں عبرت تے نصیحت حاصل کرنی چاہیدی اے تے اپنے والدین دی اطاعت و فرمانبرداری وچ کوئی کثر نہیں چھڈنی چاہیدی، تاں جے ایہناں نوں بڑھاپے وچ بڑھاپے دا احساس نہ ہوئے پر انج کدوں ہوئے گا؟ انج اودوں ہوئے گا جدوں اسیں سارے مل کے اپنے معاشرے وچ وسن والے بزرگاں دا احترام کرنا سکھ لاں گے تے ایہناں نوں ایہناں دا حق دیاں گے تے نہ کسے اولڈ ایج ہوم دی لوڑ رہوے گی تے نہ کسے سڑک، چوراہے یا فٹ پاتھ اُتے کوئی بزرگ خواتین و مرد بے یارومددگار، پیا ملے گا تے نہ ای کوئی اپنے بڈھے والدین نوں اولڈ ایج ہوم وچ چھڈ کے آئے گا تے فیر نہ کسے بزرگ نوں انج دی تحریر لکھن دی زحمت ہوئے گی تے نہ ای کسے بزرگ دی لاش چوک چوراہے توں ملے گی؟