اداریاں نوں نشانہ بنان دا خطرناک کھیڈ !

تحریر:شاہد ندیم احمد

پاکستان وچ سیاست دا رحجان خطرناک بن دا جا رہیا اے، حکومت تے اپوزیشن دونویں ای سیاست و حکمرانی دے مزے لٹن دے نال اپنے مفاد دے حصول لئی سرگرداں نیں جد کہ عوام مہنگائی تے بیروزگاری دی چکی وچ پس رہے نیں، نوبت ایہہ آ گئی اے کہ غریب تے غریب سفید پوش لوکاں لئی وی اپنا بھرم رکھنا مشکل ہو گیا اے۔ حکومت تے اپوزیشن دا کم عوامی مسائل اُتے بحث کرنا تے ایہناں دے مسائل دا حل لبھنا اے، پر دونویں ای ایہناں اہم نکات توں یکسر نہ صرف غافل نظر آندے نیں، بلکہ اپنی الزام تراشی دی سیاست وچ اداریاں نوں گھسٹ کے متنازع بنان وچ کوشاں نیں۔ حیرت دی گل اے کہ ایہہ کم ملک مخالف بیرونی طاقتاں کردیاں نیں، ایس لئی منظم پروپیگنڈہ مہم چلاندی اے تے اندرون ملک توں وطن دشمن عناصر نوں خرید کے اپنے نال ملاندی اے۔ پر ایتھے تے اپنے ای وطن عزیز دے اہم سیاستدان ایس کم وچ لگے ہوئے نیں، ایہہ کہڑی سیاست تے ایس وچ ملک و قوم دی کیہڑی بھلائی لُکی اے ایہہ واضح طور اُتے اداریاں نوں کمزور کرن تے ملک وچ انتشار ودھان دی کوشش نظر آندی اے جیہڑا نہایت خطرناک عمل اے۔
ایہہ امر واضح اے کہ آئینی طور اُتے مسلح فوجاں دا کردار جغرافیائی سرحداں دی حفاظت کرنا تے حکومت دی طرفوں طالب کیتے جان اُتے مدد فراہم کرنا اے تاں روایتی طور اُتے پاکستان وچ مسلح فوجاں سیاسی بحراناں وچ توازن برقرار رکھن دا کردار ادا کردیاں رہیاں نیں۔ ہر دور اقتدار وچ سیاسی قائدین دا وطیرہ رہیا اے کہ ملکی استحکام دے ناں اُتے عسکری قیادت نال مل کے مدد دی دہائی دیندے رہے، خاص طور تے جدوں جنرل پرویز مشرف نے معاملے اپنے ہتھ وچ لئے تے مٹھائیاں ونڈن والیاں وچ اپوزیشن دے سار ے بندے شامل سن، اج اوہ ای سیاسی قائدین آئینی حدود وچ رہن تے سیاست وچ مداخلت نہ کرن دیاں گلاں کر رہے نیں، اک پاسے سیاست نال مداخلت توں روکیا جاندا اے تے دوجے پاسے اپنی ساری ناکامیاں نوں قومی اداریاں دے کھاتے وچ پان دی کوشش کیتی جاندی اے، ایہہ تاثر ودھان والے خاہ حکومتی وزیر یا اپوزیشن رہنما ہون، دونویں ای ریاست تے ریاستی اداریاں دے خیر خواہ نہیں۔ ففتھ جنریشن ہائبر ڈوار وچ اداریاں تے عوام دے وچکار خلیج تے غلط فہمیاں پیدا کرن دی کوششاں کیتیاں جاندیاں نیں، ایس ویلے ملک وچ ایسے اُتے کم ہو رہیا اے، ایہہ صرف اپوزیشن ولوں نہیں بلکہ حکومتی وزراء وی ایسے تاثر نوں تقویت دے رہے نیں۔
بے شک پاکستانی فوجاں دفاع وطن دے تقاضے نبھان تے کسے وی بیرونی جارحیت دا منہ توڑ جواب دین دی اہلیت و صلاحیت رکھدیاں نیں تے ملک دی سلامتی کمزور کرن دی دشمن دی ہر سازش اپنی پیشہ وارانہ صلاحیتاں دے بل بوتے اُتے ناکام بنا رہیاں نیں تاں بدقسمتی نال ملک وچ جاری سیاسی محاذ آرائی تے ملکی سلامتی و قومی مفاد دے تقاضیاں دے برعکس پاکستانی فوجاں نوں وی سیاست وچ گھسیٹن توں گریز نہیں کیتا جا رہیا جد کہ آرمی چیف جنرل قمر جاوید باجوہ قومی سیاسی قیادتاں نوں باور کرا چکے نیں کہ پاکستانی فوجاں نوں سیاست وچ ملوث کرن توں گریز کیتا جائے تے اپنے انتظامی سیاسی معاملات متعلقہ فورماں اُتے آپ طے کیتے جان۔ ایس دے باوجود خاص طور تے اپوزیشن قائدین بلیم گیم دی سیاست وچ فوج نوں نشانہ بنان توں وی گریز نہیں کر رہے نیں جد کہ محاذ آرائی دی ایس فضا توں تاک وچ بیٹھے ساڈے مکار دشمن بھارت نوں خوشیاں منان تے پاکستان دی سلامتی دے خلاف مزید سازشاں پروان چڑھان دا نادر موقع مل رہیا اے۔
ایس حقیقت توں انکار نہیں کیتا جا سکدا کہ بھارت دا پاکستان مخالف پراپیگنڈے وچ ایدھن فراہم کرن دا کم پاکستانی اپوزیشن کر رہی اے، سابق سپیکر قومی اسمبلی سردار ایاز صادق دے بھارتی جنگی قیدی ابھی نندن دے حوالے نال قومی اسمبلی وچ دتے گئے حقائق دے منافی تے ناشائستہ بیان نال بھارت نوں عسا کے پاکستان نوں متنازعہ بنان دا نادر موقع ہتھ آیا اے۔سردار ایاز صادق اپنے بیان اُتے شرم سار ہون تے قوم توں معافی منگن دی بجائے وضاحتاں پیش کردے ہوئے مزید راز افشاں کرن دیاں دھمکیاں دے رہے نیں، مسلم لیگ ن دے رہنما خرم دستگیر دا وی کہنا اے کہ ایاز صادق دے معاملے دی تہہ تیکر نہ جائو نہیں تے ایس توں بھیانک انکشاف کرن گے۔ عوام آئے دن ریاستی قومی سلامتی دے اداریاں نوں دتی جان والی دھمکیاں توں تنگ آ چکے نیں، اپوزیشن رہنما ہن جو کرنا اے، اوہ کر لوئو، آخر اسیں وی تے ویکھیے کہ قومی رازاں دی حفاظت دے بارہا کیتے گئے عہد نوں توڑ کے تسیں کنہا ڈگو گے۔
ایہہ امر باعث شرم اے کہ سیاست دان اک دوجے توں دست و گریبان سن ، پر ہن اپنے ملکی سلامتی دے در تے ہو گئے نیں، اک مفاد پرست سیاسی تولہ اپنے لیڈراں نوں خوش کرن لئی پاکستان دی سالمیت دے خلاف بول رہیا اے، قومی اداریاں دی قیادت دی ڈھیل ملک مخالف قوتاں دی حوصلہ افزائی دا باعث بنن لگی اے، ملکی سلامتی دے اداریاں نوں چاہیدا اے کہ ملک دشمن عناصر کوئی وی ہون، ذرا برابر ڈھیل نہ دین، خاص طور تے ایہناں لوکاں دی طناباں سختی نال کسنیاں چاہیدا اے جیہڑے آئے دن پاکستان دے خلاف ملک توں باہر بہہ کے دشنام طرازی کر رہے نیں۔ ملک دی سیاسی قیادت اداریاں نوں نشانہ بنان دے خطرناک کھیڈ نال سیاست وچ کدی اگے نہیں ودھ سکن گے۔
ایس لئی ملکی سیاسی قیادت نوں ایہہ گل پلے بنھ لینی چاہیدی اے کہ ایہ ملک تے ایس دے ادارے نیں تے ایہناں دی سیاست وی اے، جے ایہہ ملک نہیں ہوئے گا تے فیر ایہہ سیاست وی نہیں رہے گی تے نہ ای اوہ موجاں ہون گیاں جس دے سب عادی ہو چکے نیں۔