بین الصوبائی وزرائے تعلیم کانفرنس: ملک بھر دے تعلیمی ادارے کھلے رکھن دا فیصلہ
لہور(پنجابی میڈیا گروپ)کورونا وبا وچ تیزی دے باجود ملک بھر دے سارے تعلیمی ادارے کھلے رہن گے۔ بین الصوبائی وزرائے تعلیم کانفرنس نے فیصلہ دے دتا۔
وفاقی وزیر تعلیم تے پیشہ وارانہ تربیت شفقت محمود دی زیر صدارت بین الصوبائی وزرائے تعلیم دی ورچوئل کانفرنس ہوئی۔ چاراں صوبیاں، گلگت بلتستان تے آزاد کشمیر دے تعلیم دے وزیراں نے ویڈیو لنک دے ذریعے رلت کی۔ رلت کرن والیاں نوں وزارت صحت ولوں ملک بھر وچ کورونا وبا دی دُجی لہر تے تعلیمی اداریاں وچ ساہمنے آن والے کیساں اُتے بریفنگ دتی گئی۔بین الصوبائی وزرائے تعلیم اتفاق کیتا کہ فی الحال تعلیمی ادارے کھلے رہین گے لیکن صورتحال نوں مسلسل مانیٹر کیتا جائے گا، تعلیمی ادارے بالخصوص سکولاں وچ ایس او پیز اُتے سختی نال عملدرآمد یقینی بنایا جائے گا۔
