ریڈیو پاکستان دے برطرف ملازمین تے ڈی چوک

تحریر: اکرم عامر سرگودھا

سینیٹ دا 4 نومبر نوں ریڈیو پاکستان دے کڈے گئے ملازمین دے حوالے نال ہون والا اجلاس کرونا پاروں ملتوی ہو گیا، تے کہیا جا رہیا اے کہ ہن ایہہ اجلاس 11 نومبر نوں ہون جا رہیا اے، جس وچ ریڈیو پاکستان دے کڈے گئے 1020 ملازماں دی بحالی دا معاملہ زیر غور لیایا جائے گا۔ راوی کہندا اے کہ شاید ایہہ اجلاس 11 نومبر نوں وی نہ ہو پائے کیوں جے ایہہ اجلاس ریڈیو پاکستان وچ موجود بھاری تنخواہواں لین والے مافیا دے دبائو اُتے موخر کیتا گیا اے تے جے اجلاس ہو پایا تے ریڈیو پاکستان وچ موجود مافیا نے ایس بابت منصوبہ بندی کر لئی اے، سینیٹ اجلاس نوں باور کرایا جائے گا کہ ریڈیو پاکستان سوا ارب روپئے دے خسارے وچ چل رہیا اے، ایس لئی ایہناں ملازماں نوں رکھن نال ادارہ اُتے مزید بوجھ ودھے گا، جے ریڈیو دا مافیا سینیٹ وچ ایہہ نہ کہے تے ریڈیو دے ان کنٹریکٹ ملازم جنہاں دیاں تنخواہواں 25 ہزار توں گھٹ نیں تے اوہ 10 توں 20 ورھے توں ریڈیو وچ کم کر رہے نیں نوں کڈنا غیر قانونی قرار پاندا اے؟ تے ایہناں نکے ملازماں نوں کڈن والے مافیا دا ایہہ اک غلط قدم اے تے ایہناں نوں کڈن والیاں دی اپنی نوکریاں دا اُتے لگ جاندیاں نیں۔ بقول راوی ریڈیو پاکستان دے خسارے دے اصل حقائق ایہہ نیں کہ پنشن دی مد وچ 86 کروڑ 24 لکھ روپئے سالانہ، تنخواہواں تے الائونسز دی مد وچ دو کروڑ 20 لکھ روپئے سالانہ، ٹی وی پروگرام دی تیاری دی مد وچ دو کروڑ 50 لکھ 10 ہزار روپئے، ٹی وی اسٹیشنز نوں چلان دی مد وچ5 کروڑ 41 لکھ روپئے، مینجمنٹ دے اخراجات 1 کروڑ 20 لکھ روپئے سالانہ نیں، انج 94 کروڑ 27 لکھ روپئے ریڈیو پاکستان دے کل سالانہ اخراجات نیں جنہاں وچوں 86 کروڑ 24 لکھ روپئے سالانہ ریڈیو پاکستان دے ریٹائرڈ پنشنرز نوں دتے جاندے نیں، واضح رہوے کہ پنشنر نوں دتی جان والی رقم وفاقی ادارہ نے ادا کرنی ہوندی اے۔ کیوں جے ہر ملازم دی تنخواہ وچوں کٹوتی ہون والی رقم بعد وچ پنشن تے ماہانہ اعزازیہ (پنشن) دی صورت وچ دتی جاندی اے۔ پنشن دی رقم نوں کوئی وی محکمہ اپنے اخراجات دی مدت وچ ظاہر نہیں کردا کیوں جے پنشنرز نوں کیتی پنشن دی ادائیگی وفاقی یا صوبائی حکومت نے کرنی ہوندی اے۔
حالیہ دناں وچ خسارہ نوں بنیاد بنا کے 20 اکتوبر 2020 تیکر پورے ملک دے 32ریڈیو اسٹیشنز توں کڈے گئے 1020 ملازم جنہاں وچ خواتین وی شامل نیں تے ایہناں دے خاندان اپنے حق تے ملازمت اُتے بحالی لئی ڈی چوک اسلام آباد وچ ہر دن دھرنا دیندے تے اضتجاج کردے ہوئے ارباب اختیار نال اپنے مطالبات منظور کروان لئی جدوجہد کر رہے نیں، ڈی چوک اوہ تھاں اے جتھے آئے دن احتجاج کردے ہوئے ارباب اختیار توں اپنے مطالبات منظور کروان لئی جدوجہد کر رہے نیں۔
ڈی چوک اوہ تھاں اے جتھے آئے دن احتجاج ہوندا رہندا اے کدی ایس چوک وچ اپوزیشن پڑائو دیندی اے، کدی کلرک رہنما ایس چوک وچ ڈیرہ لائے وکھائی دیندے نیں تے کدی استاد تے کدی لیڈی ہیلتھ ورکرز حتیٰ کہ سارے مکاتب فکر دے احتجاج دا گڑھ اسلام آباد دا ایہہ ڈی چوک ہوندا اے۔ پاکستان تحریک انصاف دے سربراہ عمران خان نے 126 دن دا تاریخی دھرنا وی ایسے چوک وچ دتا سی، ریڈیو پاکستان دے کڈے گئے ملازم وی 17 دن توں ڈی چوک وچ احتجاج کر رہے نیں، احتجاج دے دوران اک برخاست ملازم زندگی توں ہتھ دھو چکیا اے، چولہے ٹھنڈے ہون دے صدمے پاروں کئی ملازمین دل دے عارضے وچ مبتلا ہو چکے نیں۔ پر حکومت دے کسے ذمے دار نے ریڈیو پاکستان دے ایہناں ملازماں دی بحالی دے معاملے نوں سنجیدہ نہیں لیا کیوں جے ایہہ معاملہ ان کنٹریکٹ ملازماں دا اے جیہڑی انتہائی گھٹ تنخواہ اُتے کم کر رہے سن، ساڈے ملک دا ایہہ المیہ اے کہ کسے شہر یا علاقے وچ کوئی غیر معمولی واقعہ ہو جائے تے ایس صوبے دا وزیراعلیٰ تے وزیراعلیٰ ایس واقعے دا نوٹس لے لیندے نیں تے معاملا میڈیا وچ ہائی لائیٹ ہو جائے تے ملک دی معزز عدالت عظمیٰ وی ایس واقعے دا سوموٹو ایکشن لے لیندی اے تے فیر بیورو کریسی دی پھرتیاں ویکھن والی ہوندیاں نیں پر ایتھے ریڈیو پاکستان دے 1020 ملازماں نوں بیک جنبش قلم فارغ کر کے ایہناں دا معاشی قتل کر دتا گیا، ایہناں دے گھراں دے چولہے ٹھنڈے ہو گئے، بچے سکولاں توں کڈ دتے گئے، برطرف ملازم دوائیاں تیکر توں محروم ہو گئے کیوں جے ایہناں نوں چار مہینے دے بقایا جات تیکر ادا نہ ہوئے جس بنا اُتے ریڈیو پاکستان دے نوکریاں توں کڈے گئے متاثرہ نکے ملازم ڈی چوک وچ دھرنا دتے ہوئے نیں پر ایس اُتے نہ تے وزیراعظم دا کوئی رد عمل آیا تے نہ ای کسے عدالت دے جج نوں سوموٹو لین دی ہمت ہوئی، آخر انج کیوں اے کیہ ریڈیو پاکستان دے کڈے گئے ایہہ ملازم پاکستانی شہری نہیں۔ جنہاں دے مسلسل احتجاج اُتے اج تیکر حکومت دے کسے ارباب اختیار نے احتجاجی مظاہرین دی دلجوئی تیکر نہیں کیتی، حکومت دے ذمے داراں نے ریڈیو پاکستان دے ایہناں کڈے گئے ملازماں دے معاملے نوں سنجیدہ نہیں لیا تے ریڈیو پاکستان دے معاملیاں دی انکوائری لئی کوئی شفاف کمیٹی تشکیل دتی گئی، ذرائع کہندے نیں کہ جے وزیراعظم عمران خان یا وفاقی وزیر اطلاعات شبلی فراز ریڈیو پاکستان دے معاملے اُتے کمیٹی تشکیل دے کے شفاف انکوائری کران تے درجناں دی تعداد وچ سیاسی ادوار وچ بھرتی کیتے جان والے وڈے عہدیاں اُتے لکھاں روپئے تنخواہواں حاصل کرن والیاں دیاں نوکریاں خطے وچ پئے جان گیاں؟ جنہاں نوں صرف سیاستداناں نے مختلف ادوار وچ نوازن لئی ریڈیو پاکستان وچ لکھاں روپئے معاوضہ اُتے بھرتی کروایا پر اوہ ریڈیو دی حرف ابجد توں وی واقف نہیں، جے ایہناں غیر ضروری طور اُتے ریڈیو پاکستان دے مختلف اسٹیشناں وچ وڑے بیٹھے وڈے مگر مچھاں دی سکروٹنی کر کے ایہناں دی تھاں ایہناں معمولی تنخواہ والے ملازم جیہڑے کہ ریڈیو پاکستان وچ ریڑھ دی ہڈی دی حیثیت رکھدے نیں نوں ایڈجسٹ کر دتا جائے تاں وی معاملہ حل ہو سکدا اے۔پر انج کدوں ہوئے گا؟ انج اودوں ہوئے گا جدوں وزیراعظم پاکستان خان، وفاقی وزیر اطلاعات و نشریات شبلی فراز ریڈیو پاکستان دے معاملے نوں شفاف بنان لئی آپ دلچسپی لین گے نہیں تے جے ایہو صورتحال رہی تے ریڈیو پاکستان جیہڑا کہ اک تاریخ ساز ادارہ اے دی کشتی ڈبدی نظر آ رہی اے؟