پیپلزپارٹی دے سینئر رہنما قمر زمان کائرہ کورونا دا شکار
اسلام آباد: پیپلزپارٹی دے سینئر رہنما تے گلگت دی انتخابی مہم وچ سرگرم عمل قمر زمان کائرہ وی کورونا وائرس دا شکار ہو گئے۔ ملک بھر وچ جاری کورونا دی دوجی لہر نے اک وار فیر عوام سنے سیاستداناں نوں وی اپنی گرفت وچ لے رکھیا اے تے ایس وار پیپلزپارٹی دے سینئر رہنما تے پارٹی دے پنجاب دے صدر قمر زمان کائرہ کورونا وائرس دا شکار ہو گئے نیں۔ قمر زمان کائرہ گلگت بلتستان انتخابی مہم وچ مصروف عمل سن تے بھرپور طریقے نال انتخابی مہم چلا رہے سن، پر کجھ دناں توں اوہ گلے وچ سوزش تے نزلہ زکام محسو س کر رہے سن، اوہناں نے احتیاطی طور تے کورونا دا ٹیسٹ کرایا سی تے پچھلی رات اوہناں دا کورونا ٹیسٹ مثبت آ یا سی۔ خاندانی ذرائع دا کہنا اے قمر زمان کائرہ ٹیسٹ مثبت آن تے گلگت توں اسلام آباد اپڑ گئے نیں تے اوہناں نے اسلام آباد وچ اپنے آپ نوں 15دن لئی قرنطینہ کر لیا اے۔
