سپریم کورٹ نے میر شکیل الرحمن نوں رہا کر دتا

اسلام آباد (بیورورپورٹ)سپریم کورٹ نے 35 برس پہلاں خرید کیتی گئی اراضی کیس وچ نو ماہ توںقید جنگ گروپ دے مالک میر شکیل الرحمن نوں دس کروڑ دے مچلکیاں، پاسپورٹ جمع کروان تے اراضی معاملے وچ واجب الادا رقم ادا کرن دی عوض رہا کرن دا حکم جاری کردتا اے۔ درخواست ضمانت دی سماعت جسٹس مشیر عالم دی سربراہی وچ تن رکنی بینچ نے کیتی۔ دوران سماعت میر شکیل الرحمن دے وکیل خواجہ حارث دی جگہ ایڈووکیٹ امجد پرویز نے پیش ہو کے دسیا کہ خواجہ حارث طبیعت دی ناسازی دی وجہ توں پیش نہیں ہو سکے۔ اس موقع تے دلائل دتے کہ میر شکیل الرحمن دی طبیعت ٹھیک نہیں اے۔ ایہناں 12مارچ نوں گرفتار کیتا گیا۔ ایہناں دی گرفتاری نکوائری سٹیج اتے عمل و چ لے آئی گئی۔ بارہ مارچ نوں ای وارنٹ گرفتاری وی جاری ہوئے۔ نیب نے معاملے وچ چار لوکائی دے خلاف ریفرنس دائر کیتا جہناں وچ پچھلے وزیر اعلیٰ میاں محمد نواز شریف وی شامل نیں،درخواست گزار دے علاوہ کسی اک نوں وی گرفتار نہیں کیتا گیا، جسٹس قاضی امین نے سوال چکیا کہ ایہہ اراضی درخواست گزار نے کدوں لئی ،کیہ نیب نے قومی خزانے نوں نقصان دا کوئی سوال چکیا اے۔ جہدے اتے وکیل امجد پرویز نے دسیا کہ 05-22-1986نوںمیر شکیل الرحمان نوں ایس اراضی دی پاور آف اٹارنی ملی،ڈی جی ایل ڈی اے نے میر شکیل الرحمان نوں خط لکھیا،ایس پورے معاملے وچ قومی خزانے دا اک دھیلے دا نقصان نہیں میرشکیل الرحمن نوں کنال کنال دے 54پلاٹ ملے نیں۔ بعدازاں عدالت عظمیٰ نے دس کروڑ دے ملچکیاں ،پاسپورٹ جمع کروان تے اراضی معااملے وچ واجب الادا رقم ادا کرنے دے عوض رہا کرن دا حکم جاری کردیاں ہویاں درخواست ضمانت نمٹا دتی اے۔