پنجابی دے حقاں لئی تریخی ریلی۔۔۔ پنجاب مخالفاں دی نندیا کیتی گئی، پُتلے ساڑے گئے

ریلی وچ پنجابی زبان نوں نصاب دا لازمی حصہ بنائون دے نال نال فیاض الحسن چوہان نوں اسمبلیوں کڈھن دی وی منگ کیتی گئی

رپورٹ: علی عمران چٹھہ

پنجابیت دے خلاف نفرت اآمیز بیان اُتے سابق صوبائی وزیر اطلاعات فیاض الحسن چوہان دے خلاف لہور پریس کلب توں لے کے پنجاب اسمبلی تیکر احتجاجی ریلی شرکا دی فیاض الحسن چوہان دے خلاف زبردست نعرے بازی پنجاب دشمنی قرار۔ پنجابی پرچار، پنجاب نیشنل پارٹی پاکستان تے دوجی درجناں پنجابی تنظیماں سنے وکلاء، اساتذہ، کالجاں تے یونیورسٹیاں دے طلباء دے نال نال وڈی تعداد وچ پنجابی شعرا ادیباں تے پنجابی سیوکاں نے احتجاجی ریلی وچ شرکت کیتی۔

مظاہرین دا مطالبہ سی کہ پہلی جماعت توں پنجابی نوں نصاب وچ شامل کیتا جائے باقی تنے صوبیاں وچ اوتھے دی قومی زباناں پڑھائیاں جا رہیاں نیں صرف پنجابی وچ پنجابی نہ پڑھا کے بارہ کروڑ پنجاب واسیاں توں ایہناں دی زبان دا حق کھویا جا رہیا اے۔

پاکستان دے اکو مستند قومی پنجابی اخبار روزنامہ بھلیکھا تے پنجابی صحافت دے روح رواں مدثر اقبال چیئر مین پنجابی میڈیا گروپ نے مظاہرین نال اپنے خطاب وچ کہیا کہ پنجاب دی دھرتی بابا بلھے شاہ، وارث شاہ، شاہ فرید ، بابا گرونانک جہے درویشاں تے صوفیاں دی پاک دھرتی اے جتھے بھگت سنگھ، رائے احمد نواز کھرل، مہاراجہ رنجیت سنگھ جہے مہان بہادراں نے جنم لیا ایسے دھرتی اُتے مایا ناز نوبل انعام یافتہ سائنسدان ڈاکٹر عبدالسلام نے وی جنم لیا بدقسمتی نال ایہناں عظیم ہستیاں دے نال نال سابق وزیر اطلاعات فیاض الحسن چوہان جہے نکمے نکھٹو نالائق تے نااہل بندے نے وی ایسے دھرتی اُتے جنم لیا علم دانش تاریخ ادب تے ثقافت نال ایہناں دا دور دا وی واسطہ نہیں رہیا اک انج دا بندا جیہڑا وزارت دی کرسی اُتے قبضہ جمائے رکھن لئی اپنی دھرتی تے ماں بولی نوں وی بُرے لقباں نال نواز دا اے۔

اوہناں نے مزید کہیا کہ فیاض الحسن چوہان نے جتھے پنجاب واسیاں توں لعن و طعن کروائی اوتھے پوری دنیا وچ وسن والے پنجابی وی ایہناں دی تذلیل تے مذمت کردے نظر آندے نیں۔ مدثر اقبال بٹ دا کہنا سی کہ وزیراعظم پاکستان ایس حوالے نال خصوصی نوٹس لین۔

اوہناں نے ایس گل اُتے زور دتا کہ پنجاب حکومت پنجابی اخباراں دا متعین کیتا گیا 5 فیصد کوٹہ پنجابی نوں لازمی قرار دتا جائے تاں جے پنجابی جرنلزم نوں وی فروغ ملے۔ احتجاجی مظاہرے نال خطاب کردے ہوئے ریلی دے چیف آرگنائزر تے پنجابی پرچار و پنجابی نیشنل پارٹی دے صدر احمد رضا وٹو نے واضح کیتا کہ پنجاب دے اندر پنجابی پڑھائے جان دا اسلامی جمہوریہ پاکستان دا آئین وی حق دیندا اے۔ یونیسکو دی قرار داداں وی مادری زبان وچ پڑھان اُتے زور دیندیاں نیں۔

سپریم کورٹ آف پاکستان تے ہائی کورٹ پنجابی پڑھائے جان دا فیصلہ سنا چکے نیں۔ اج ہزاراں بندے وی ایہو مطالبہ کر رہے نیں تے پنجاب سرکار نوں پنجابی دے پڑھان وچ مسئلہ کیہ اے۔ اوہناں نے فیاض الحسن چوہان نوں پنجاب دشمن قرار دیندے ہوئے کہیا کہ ایہناں نوں اپنے لفظاں اُتے شرمندہ ہونا چاہیدا اے۔ انسانی حقوق دی علمبردار تے مشہور سماج سیوک دیپ سعیدہ ایس گل اُتے زور دتا کہ پنجاب حکومت پنجابی نوں نہ پڑھا کے بنیادی انسانی حقوق دی خلاف ورزی کر رہی اے۔گورنمنٹ دیال سنگھ کالج لہور دے ریٹائرڈ پرنسپل پروفیسر طارق جٹالہ نے مظاہرین نال خطاب کردے ہوئے کہیا کہ جدوں تیکر پنجابی نوں پڑھایا نہیں جاندا اودوں تیکر پنجاب دا ثقافتی ورثہ نہ صرف تباہ ہوندا رہوے گا بلکہ ایس دی تاریخ نال وی کھلواڑ ہوندا رہوے گا تے فیاض الحسن چوہان جہے پنجابی ادب تے ثقافت توں ناواقف لوک پنجابی زبان تے پنجاب اُتے تنقید کردے رہن گے ۔ ریلی وچ خصوصی طور اُتے انگلیڈ توں آئی گمی ٹی وی دی چیئر مین شگفتہ گمی نے اپنے خطاب وچ کہیا کہ پنجابی کلام دی پوری دنیا وچ دھوم مچی ہوئی اے گورے بلھے شاہ دے کلام اُتے دھمالاں پاندے نیں اوہناں نے ریلی دے موقف دی حمایت وچ ایس امر نوں اجاگر کیتا کہ پنجاب نوں بلھے شاہ تے دوجے پنجاب صوفیا دا کلام پڑھا کے ایہناں دا انسان دوست روپ دنیا دے ساہمنے لیایا جائے ۔ اوہناں نے ریلی وچ فیاض الحسن چوہان دی پنجابی زبان دے بارے وچ دتے گئے بیان دی سخت مذمت کردے ہوئے کہیا کہ جے فیاض الحسن چوہان انگلینڈ وچ ہوندے تے ایہناں نوں پارلیمنٹ دی سیٹ توں محروم کر دتا جاندا۔

پنجابی اخبار روزنامہ لوکائی دے ایڈیٹر انچیف جمیل پال نے کہیا کہ فیاض الحسن چوہان دے بیان اُتے حزب اختلاف تے اقتدار دے پنجاب اراکین پارلیمنٹ دی خاموشی افسوسناک اے۔ ایہناں نوں یاد رکھنا چاہیدا اے کہ وطن عزیز وانگوں ماں بولی پنجابی دی ترویج و فروغ نال محبت تے ایس دے دشمناں توں نفرت ایہناں دا فرض اے۔ مشہور پنجابی شاعر بابا نجمی نے حاضرین نوں اپنی شاعری نال گرمایا
جیہڑے آکھن وچ پنجابی وسعت نہیں تہذیب نہیں ،
پڑھ کے ویکھن وارث بلھا با ہو لال پنجابی دا
ایس موقعے اُتے نوجوان پنجابی شاعر آصف عارف چشنی نے وی اپنا کلام سنایا
پچھنے پچھنے آں اسیں ایہہ حکومتاں نوں خیر اے؟
مادری زبان نال ای کیوں ایڈا ویر اے
تسیں وی پنجابی او پنجابی نال پیار کرو،
پرائمری توں بی۔اے تیک لازمی قرار کرو
لہور دے علمی و ادبی تے ثقافتی محفلاں دی جان مشہور پنجابی شاعر افضل ساحر نے کہیا کہ پنجاب دا لٹریسی ریٹ ایس ویلے تیکر بہتر نہیں ہو سکدا جدوں تیکر پنجاب دے بالاں نوں بنیادی تعلیم پنجابی وچ نہیں دتی جاندی پاکستان پنجابی ادبی بورڈ جنرل سیکرٹری نے ایس گل اُتے زور دتا کہ پنجابی لیٹریچر نوں جدوں تیکر سوسائٹی وچ عام نہیں کیتا جاندا اودوں تیکر ایہہ معاشرہ روشن خیال نہیں ہو سکدا۔ انجمن ارائیاں دے مرکزی چیئر مین ڈاکٹر ناصر جمیل نے کہیا کہ ہر پنجابی دی دلی خواہش اے کہ آپ نوں اوہ عزت ملے جیہڑی سندھ وچ سندھی بلوچستان بلوچی نوں حاصل اے۔ شہزاد عمار نے کہیا جدوں تیکر ریاست عوام نوں ایہناں دی زبان دا حق نہیں دیندی اودوں تیکر ریاست اپنے وجود دے نال نہ صرف بے ایمانی کر رہی اے بلکہ پنجاب دی ترقی نوں وی حیلے بہانیاں توں روک رہی اے۔ پنجاب نیشنل پارٹی پاکستان دے ترجمان میاں آصف تے مشہور سوشل ایکٹوسٹ کاشف حسین نے کہیا کہ پنجابی دے نفاذ تیکر ساڈی ایہہ جدوجہد جاری رہوے گی ۔ ریلی نال پروفیسر سادات علی ثاقب ،شہزاد جوئیہ ، ڈاکٹر ظہیروٹو، ڈاکٹر فیصل جبا ،سید آصف شہکار، پروفیسر دلشاد مثانہ کسانہ، نظام الدین ،رانا عبدالمجید، کامریڈ عرفان، سروش عزیز،پروا مسعود ،بابر جالندھری ،اقرا پریت ،اجنکم گل وسیم جٹالہ،محمد علی،فیصل علی،عاصم شا ہ تے ملک عا دل نے وی خطاب کیتا تے مطالبہ کیتا کہ پنجابی نوں لازمی پڑھایا جائے تے سارے شرکا نے فیاض الحسن چوہان دی شدید مذمت وی کیتی۔