جی سی یو لہور وچ یومِ اقبال دی تقریب
رپورٹ: پروفیسر محمد عمر
علامہ اقبال سٹیمپ سوسایٹی تے لائیبریری سوسائیٹی گورنمنٹ کالج یونیورسٹی لاہور دے اکٹھ نال ۹ نومبر نو ں علامہ اقبال دے جنم دھاڑ اتے اک شاندار نمائیش دا انتظام کیتا گیا ، جیویں کہ گورنمنٹ کالج یونیورسٹی دیاں اپنیاں شاندار راویتاں نیں ایس روایت نوں اگے ٹوردیاں ہوئیاں دنیا وچ علامہ اقبال دے سبھ توں وڈے ذخیرہ ٹکٹ ، کرنسی نوٹ ، میڈلز ،پوسٹ مارکس ، اقبال میموریل فنڈ ،تے جاوید اقبال ہوراں دے دستخط نال رکھیاں ہوئیاں یادگار اں دی نمائیش کیتی گئی ۔افتتاح وائیس چانسلر جناب ڈاکٹر اصغر زیدی ہوراں کیتا ۔ایس موقع تے انتطامی تے تعلیمی ہیڈ وی نال ای سن تے ،وائیس چانسلر صاحب نے پڑھیاراں نوں خطاب کرکے چیتاونی دتے پئی طالب علم جوان کامیابی تے ترقی دیاں منزلاں تائیں اپڑن لئی علامہ اقبال دے نقش قدم تے چلن ۔ ایس موقع تے چیف لائبریرین محمد نعیم صاحب نے میاں ساجد علی صاحب دے کم تے ادم دی تعریف کیتی تے اونہاں دا گورنمنٹ کالج یونیورسٹی وچ نمایش لان تے شکریہ ادا کیتا تے وائیس چانسلر صاحب ہوراں میاں ساجد علی نوں اک سووینیئر پیش کیتا تے ایس کم نوں جاری رکھن تے ہور اگے لیجان واسطے حوصلہ افزائی کیتی ۔ تقریب توں بعد طالب علماں ، استاداں تے ہر مکتبہ فکر دے لوکاں ایس نمائیش تو اپنے علم چے وادھا کیتا
میاں ساجد علی اپنے ایس شوق وچ آپ ای ایس دے کرتا دھرتا نیں تے اوہ ایس کم نوں اپنی مدد آپ دے تحت دن رات دی انتھک محنت تے جذبہ نال اگے ٹوردے پئیے نیں اونھاں ایس خواہش دا اظہار کیتا جے اوہ اقبال میوزیم قایم کرنا چاہدے نیں تانجے اونہاں دیاں شیواں آن والیاں نسلاں تیکر اپڑن تے محفوظ وی ہو جان تے ایس تے اوہ کم تے کوشش کر رہے نیں ۔ میاں ساجد علی اقبالیات وچ ایم فل مکمل کر چکے نیں تے اج کل علامہاقبال اوپن یونیورسٹی وچ پی ایچ ڈی دے طالب علم دی حیثیت نال ڈاخلہ وی لے چکے نیں ، میاں ساجد علی کول جہڑیاں علامہ اقبال دیاں شیواں موجود نیں اوہ سبھ کسے ہور دے کول نئیں ہین۔ یادگاری سکے ، تے یادگاری ڈاک ٹکٹ ، خط تے اونہاں دے لفافے ۔ تے علامہ اقبال دے ناں نال قائیم پوسٹ آفس دیاں مہراں لگے لفافے جویں کہ محلاں کشمیریاں سالکوٹ دا ڈاکخانہ تے علامہ اقبال روڈ تے علامہ اقبال ٹاون دا ڈاکخانے دیاں مہرہ لگے لفافے جہڑے ڈاک وچ استمال وی ہوے نیں شامل نیں ۔ انج ای گورنمنٹ کالج لاہور جہڑہ علامہ محمد اقبال دی مادر علمی تے پاکستان دی پرانی تے وڈی علمی درسگاہ اے ایس دے اک سو پنجھی ورھے انی سو انناوے چے منائیے گئے تے ایس موقع تے محکمہ ڈاک نے جی سی دے مونو گراموالا یادگار ی ٹکٹ وی شایع کیتا سی تے اوس دا لفافہ وی ایس چے شامل ہے ساجد علی دیاں تن کتاباں ہن ، میاں ساجد علی دیاں ٹکٹاں دی البم کتابی صورت وچ وی چھپ کے سامنے آگئی اے ۔ میاں ساجد علی اپنی ذات وچ اک ادارہ نیں تے اپنے ایس کم پاروں دنیا وچ اپنی وکھری تے اکلی پچھان رکھدے نیں اللہ سوہنا اونہاں دا اقبال میوزیم والا سفنہ وی چھیتی پورا کرے ۔
