پاکستان طبی کانفرنس شعبہ جراحت دے پربندھ ہیٹھ

طب تے جراہت دی اہمیت دے موضع اُتے سیمینار

رپورٹ ۔پروفیسر حکیم سید عمران فیاض

پاکستان طبی کانفرنس شعبہ جراحت دے زیر اہتمام طب و جراحت دی ضرورت و اہمیت دے موضوع اُتے اک روزہ سیمینار دا انعقاد ہویا۔ ایس تقریب دی صدارت صدر پاکستان طبی کانفرنس پنجاب پروفیسر حکیم حافظ محمد یونس نے کیتی جد کہ صوبائی وزیر ایکسائز ، ٹیکسیشن اینڈ نارکوٹکس جناب حافظ ممتاز احمد مہمان خصوصی سن۔ دیگر مہمانان گرامی وچ جنرل سیکرٹری پاکستان طبی کانفرنس پنجاب سالار طب پروفیسر حکیم محمد احمد سلیمی، ڈاکٹر و حکیم مفتی محمد یوسف، اسسٹنٹ کمشنر سمندری جناب فیصل سلطان ، ڈی ایس پی /ایس ڈی پی او جناب جمشید ناصر چشتی ، حکیم شاہد محمود ناز ، حکیم اختیار احمد نوید ، حکیم محمد جاوید بیگ ، حکیم شہزاد جاوید ، حکیم زبیر احمد روپڑی ، حکیم مفتی محمد یوسف ، حکیم محمد اسماعیل ، حکیم تصور محمدی ، حکیم ارشاد احمد ، ڈاکٹر نذیر احمد تابش ، ڈاکٹر سکندر حیات زاہد ، حکیم نصیر احمد ناصر ، حکیم جمیل عارف جانی ، حکیم حسنین تے قرب و جوار نال تعلق رکھن والے اطباء دی وڈی تعداد نے شرکت کیتی۔

صوبائی وزیر حافظ ممتاز نے اپنے خطاب وچ پروگرام آرگنائزرز نوں مبارکباد دیندے ہوئے کہیا کہ طب اک مقدس شعبہ اے، ایہہ سستا آسان تے بہترین طریقہ علاج اے، حکومت ایس دی ہر ممکن سرپرستی کرے گی، اوہناں نے مزید کہیا کہ اطباء دے مسائل نوں حل کرن لئی ترجیح بنیاداں اُتے اقدامات کیتے جان گے۔ سالار طب پروفیسر حکیم محمد احمد سلیمی نے حکومتی عمایدین دے ساہمنے طب دا مقدمہ پیش کردے ہوئے درج ذیل مطالبات پیش کیتے۔ اوہناں نے کہیا کہ پاکستان طبی کانفرنس شعبہ جراحت دا ایہہ اجتماع حکومت پنجاب دے ذمے داران توں درج ذیل مطالبات منظور کرن دی سفارش کردا اے۔امید اے کہ ساڈے مطالبات اُتے ہمدردانہ غور فرمایا جائے گا۔ اطباء کرام اپنے ہر دلعزیز راہنما جناب حافظ ممتاز وزیر ایکسائز اینڈ ٹیکسیشن اینڈ نارکوٹکس کنٹرول دی موجودگی وچ اپنے مطالبات پیش کر رہے نیں۔ پورے پنجاب دے اطباء تے عوام وچ ایس توں وڈا مثبت پیغام جائے گا کہ عوام دے نمائندے ایہناں دے مسائل سنن لئی ایہناں دے وچکار موجود نیں۔
٭ اطباءدی سرکاری ملازمتاں اُتے لگی پابندی نوں ختم کیتا جائے تے خالی آسامیاں نوں پُر کرن لئی عملی اقدامات کیتے جان۔ مزید برآں شعبہ یونانی دی وکھریاں ڈسپنسریاں دا قیام عمل وچ لیایا جائے۔ دیہی مراکز صحت ، اوقاف دے مراکز صحت تے ضلعی حکومتاں دے صحت دے مراکز وچ اطباء نوں تعینات کیتا جائے۔
٭ پورے ملک وچ طب یونانی دے وکھرے سرکاری شفاخانے قائم کیتے جان۔
٭ نیشنل کونسل فار طب دے رجسٹرڈ اطباء نوں ناجائز ہراساں تے پریشان نہ کیتا جائے۔
٭ محکمہ ہیلتھ دے اہلکاران DHO,DDHO نوں اطباء دے مطب وغیرہ نوں چیک کرن دی اجازت ہر گز نہ دتی جائے کیوں جے ایہہ درست کم کر رہے ہوندے تے پنجاب ہیلتھ کیئر کمیشن دے قیام دی لوڑ ای پیش نہ آندی۔ رشوت، ناجائز ہراسانی تے بلاوجہ تنگ کرن دے سینکڑے کیس ساہمنے آ چکے نیں جیہڑے بذات خود حکومت دی بدنامی دا باعث بن دے نیں ۔ تاں پنجاب ہیلتھ کیئر کمیشن دے عملے دے علاوہ اطباء دے کلینکس مطباں نوں کوئی ہور اہلکار چیک نہ کرے۔

٭ پنجاب ہیلتھ کئیر کمیشن دی انسپیکشن، اینٹی کوائیکری تے متعلقہ شعبہ جات وچ اطباء دا تقرر کیتا جائے۔
٭ نیشنل کونسل فار طب دی طرفوں وضع کردہ دائرہ کار دے مطابق اطباء جراحاں نوں پریکٹس کرن دی اجازت ہونی چاہیدی اے تے ایس سلسلے وچ ایہناں نوں بلاجواز تنگ نہ کیتا جائے۔
٭ قدری جڑی بوٹیاں دی کاشت اُتے درخت دے حوالے نال باقاعدہ کوئی نظام وضع کیتا جائے کیوں جے ہر ورھے کوئی نظام نہ ہون دی وجہ نال قدرتی جڑی بوٹیاں نہ صرف ضائع ہو جاندیاں نیں بلکے اسیں کروڑاں ڈالر دا زرمبادلہ کمان توں وی محروم رہنے آں۔ ایس دے برعکس ملک وچ ای پیدا ہون والی جڑی بوٹیاں سانوں چین، ایران، انڈیا، نیپال تے دیگر ملکاں توں درآمد کرنیاں پیندیاں نیں جس اُتے ملک دا کثیر زرمبادلہ خرچ ہوندا اے۔

٭ سرکاری سطح اُتے صوبے دے صدر مقام تے ڈویژنل سطح اُتے گھٹ توں گھٹ اک اک یونانی طبیہ کالجز دا قیام عمل وچ لیایا جائے۔

تے سارے سرکاری یونیورسٹیاں وچ شعبہ ایسٹرن میڈیسن دے ڈیپارٹمنٹ قائم کیتے جان۔ خوش آئند گل ایہہ وے کہ ملک وچ ایس ویلے ایسٹرن میڈیسن دے گریجوایٹس، ایم فل تے پ ی ایچ ڈی دے حامل بندے میسر نیں جنہاں دی صلاحیتاں توں فائدہ چُک کے اسیں اپنے ملکی مسئلہ صحت نوں حل کرن ول وڈی مثبت پیش رفت کر سکنے آں۔ اوہناں نے کہیا کہ امید اے کہ ساڈی درخواست اُتے عمل درآمد لئی حافظ ممتاز صاحب محترم اپنی بھرپور کوشش کرن گے۔ ایس موقعے اُتے دیگر مقررین نے وی اظہار خیال کیتا۔ پروگرام وچ بوہت وڈی تعداد وچ اطباء کرام نے شرکت کیتی۔