وزیراعظم نے زیادتی دے مجرماں نوں نامزد کرن دے قنون دی منظوری دے دتی
اسلام آباد(پنجابی میڈیا گروپ) وزیراعظم عمران خان نے جنسی زیادتی دے مجرماں نوں نامزد کرن دے قنون دی اصولی منظوری دے دتی۔ وزیراعظم دی زیر صدارت وفاقی کابینہ دا اجلاس ہویا جہدے وچ قنونی ٹیم ولوں مجوزہ ریپ آرڈیننس دا مسودہ پیش کیتا گیا۔ قنونی ٹیم نے آرڈیننس تے روشنی پاندیاں آکھیا خواتین پولیسنگ، فاسٹ ٹریک مقدمات تے گواہواں دا تحفظ مجوزہ قنون دا بنیادی حصہ ہووے گا، متاثرہ خواتین یا بچے بلا خوف و خطر اپنی شکایتاں درج کرا سکن گے، متاثرہ خواتین تے بالاں دی شناخت دے تحفظ دا خاص خیال رکھیا جائے گا۔ بریفنگ دے بعد وفاقی کابینہ نے مجرماں دی سخت سزاواں تے مشتمل سفارشات دی اصولی منظوری دے دتی پر ایس قنون وچ سزائے موت نوں شامل نہیں کیتا گیا۔ وزیراعظم عمران خان نے زیادتی دے مجرماں لئی کیسٹریشن (نامرد بنان) دا قنون لیان دی وی اصولی منظوری دیندیاں آکھیا اسیں اپنے معاشرے نوں محفوظ ماحول دینا اے، ایہ سنگین نوعیت دا معاملہ اے جہدی قنون سازی وچ کسے قسم دی تاخیر نہیں کراں گے، عوام دے تحفظ لئی واضح تے شفاف انداز وچ قنون سازی ہووے گی، یقینی بنایا جائے گا کہ سخت توں سخت قنون دا اطلاق ہووے۔ بعض وفاقی وزیراں نے زیادتی دے مجرماں نوں پھانسی دی سزا دین نوں نویں قنون دا حصہ بنان دا مطالبہ کیتا۔ وسیلیاں موجب واقی وزیر فیصل واوڈا، اعظم سواتی تے نور الحق قادری نے وی پھانسی دی حمایت کیتی۔ وزیراعظم عمران خان نے رائے دتی ابتدائی طور تے کیسٹریشن دے قنون ول جانا ہووے گا۔
