کورونا وباء وچ دینی مدرسے بند نہیں کراں گے، وفاق المدارس دا اعلان

پشاور(پنجابی میڈیا گروپ)وفاق المدارس العربیہ پاکستان دے مرکزی سیکرٹری جنرل مولانا قاری حنیف جالندھری نے اعلان کیتا اے کورونا وباء وچ دینی مدرسے بند نہیں کراں گے، مولانا قاری محمد حنیف جالندھری نے جامعہ زبیریہ پشاور دا دورہ کیتا تے مدرسے دے طالب علماں نال ملاقات کیتی۔ مولانا قاری حنیف جالندھری نے اتحاد تنظیمات مدارس دے دوجے مرکزی قائدین دے نال پریس کانفرنس کردیاں آکھیا جامعہ زبیریہ تے حملہ سارے مدرسیاں تے حملہ اے تے ایہ اک ملی سانحہ اے ، وزیراعظم عمران خان نوں خود ایتھے آنا چاہیدا سی، حکومتی رویے دی بھرپور مذمت کرنے آں۔ وفاق المدارس العربیہ پاکستان دے مرکزی جنرل سیکرٹری دا کہنا سی اسیں اسلام دے پہرے دار آں تے سرکار نوں چاہیدا اے کہ مدرسیاں نوں مضبوط کرے، دینی مدرسیاں دے کردار نوں محفوظ رکھن لئی اپنی جدوجہد جاری رکھاں گے، ایس سانحے دے پس پردہ کرداراں نوں گرفتار کیتا جائے، بیرونی سازش کہن دا حکومتی بیان ناکافی اے تے اقدامات دی لوڑ اے۔