کورونا وباء، سندھ وچ کاروباری مراکز تے بازار شام 6وجے بند کرن دا حکم

کراچی( پنجابی میڈیا گروپ) کورونا دی دوجی لہر شدت اختیار کرن لگی۔ صوبے بھر وچ اج توں کاروبار 6وجے تک بند کرن دے احکامات جاری کر دتے گئے، کاروبار دے اوقات کار صبح 6وجے توں شام 6وجے تک ہون گے۔ محکمہ داخلہ سندھ دے مطابق سارے تجارتی مراکز جمعہ تے اتوار نوں مکمل بند رہن گے، جمعہ تے اتوار صرف اشیاء ضروریہ دی دکاناں کھلن گیاں۔ محکمہ داخلہ ولوں نویں پابندیاں 31جنوری 2021تک لاگو رہن گیاں۔ نوٹیفکیشن دے مطابق سارے سرکاری، نجی دفتراں، پبلک مقامات تے ماسک پاؤنا لازمی قرار، جرمانہ وی ہووے گا، سرکاری تے نجی دفتراں وچ 50فیصد گھٹ سٹاف رکھیا جائے، بند تھاواں تے شادی دی تقریبات تے پابندی جد کہ صرف کھلے مقامات تے شادی ہووے گی، شادی وچ 200پروہنیاں دی اجازت ہووے گی، تقریب 9وجے ختم کرنی ہووے گی۔ محکمہ داخلہ سندھ نے شادی وچ بوفے سروس تے وی پابندی لاگو کر دتی۔ حکم نامے وچ آکھیا گیا کہ کھانا پیک ڈبیاں وچ پروہنیاں وچ تقسیم کرن دی اجازت ہووے گی، مزاراں، انڈور، سینما، تھیٹر، جم بند رہن گے، ریسٹورنٹس دے اندر کھان تے پابندی، کھلے مقام تے رات 10وجے تک ڈائننگ دی اجازت ہووے گی، ٹیک آوے تے ہوم ڈیلیوری وی رات 10وجے تک ہووے گی۔