چودھری احمد مختار دے انتقال اتے بلاول بھٹو زرداری دا اظہار تعزیت

کراچی (بیورو رپورٹ) پاکستان پیپلز پارٹی دے چیئرمین بلاول بھٹو زرداری نے پچھلے وزیراعظم شہید محترمہ بے نظیر بھٹو دے قریبی ساتھی تے پچھلے وفاقی وزیر دفاع احمد مختار دے انتقال اتے شدید افسوس دا اظہار کردیاں ہویاں آکھیا اے کہ پاکستان پیپلز پارٹی دے کارکنان اپنے اک مخلص تے پارٹی دے نال وفادار رہنما توں محروم ہوگئے نیں۔ اوہناں نے آکھیا اے کہ چودھری مختار پاکستان پیپلز پارٹی دی سیاست کردیاں ہویاں ہمیشہ ثابت قدم رہے اوہ اک تجربہ کار سیاستدان سن جہناں دے انتقال اتے پوری پارٹی انتہائی غم زدہ اے۔ بلاول بھٹو ہوراں نے مزیدآکھیا اے کہ مرحوم تجربے کار تے پارٹی دا سرمایہ سن۔ دوجے پاسے پیپلزپارٹی وسطی پنجاب دے صدر قمر زمان کائرہ ، جنرل سیکرٹری چودھری منطور احمد تے پنجاب اسمبلی وچ پارلیمانی لیڈر سید حسن مرتضیٰ نے وی چودھری احمد مختار دے انتقال اتے تعزیت دا اظہار کردیاں ہویاں آٰکھیا اے کہ چودھری احمدمختار دا انتقال ناقابل تلافی نقصان اے ایہناں دی سیاسی خدمات نوں ہمیشہ لئی یاد رکھیا جاوے گا۔