کورونا لہر، سینیٹ تے قومی اسمبلی دے اجلاس نہ بلان دا فیصلہ

اسلام آباد: پارلیمانی کمیٹی برائے کورونا نے وباء دی دوجی لہر دی وجہ توں سینیٹ تے قومی اسمبلی دے اجلاس نہ بلان دا فیصلہ کیتا اے۔ سپیکر اسد قیصر دی زیر صدارت پارلیمانی کمیٹی برائے کورونا دا اجلاس ہویا جہدے وچ اسد عمر، بابر اعوان، علی خان تے دوجے ارکان شریک ہوئے جد کہ اپوزیشن دا کوئی وی نمائندہ شریک نہ ہویا۔ کمیٹی نے مشاورت دے بعد سینیٹ تے قومی اسمبلی دے اجلاس نہ بلان دا فیسلہ کیتا اے۔ سپیکر قومی اسمبلی اسد قیصر نے اظہار خیال کردیاں آکھیا اپوزیشن جماعتاں نوں کورونا بارے پارلیمانی کمیٹی اجلاس وچ رلت کرنی چاہیدی سی، سانوں کورونا صورتحال نوں مدنظر رکھ کے متفقہ فیصلے کرنے چاہیدے نیں، میں اپوزیشن نال آپ رابطہ کیتا تے اجلاس وچ رلت دی دعوت دتی سی۔ ہن اپوزیشن دے انکار دی وجہ اوہ خود دس سکدے نیں، کجھ فیصلے قومی اہمیت دے ہوندے نیں جہناں تے سیاست نہیں ہونی چاہیدی۔ این سی او سی حکام ولوں اجلاس نوں کورونا بارے بریفنگ دیندیاں آکھیا گیا کہ کورونا دی دوجی لہر وچ شدت آ گئی اے، عوام نوں ایس او پیز تے عمل کرنا چاہیدا اے تے کورونا توں بچن لئی احتیاطی تدابیر اختیار کیتی جانی چاہیدی اے۔