اپوزیشن دے جلسیاں توں کورونا تیزی نال پھیل رہیا اے: اسد عمر

اسلام آباد: وفاقی وزیر منصوبہ بندی تے نیشنل کمانڈ اینڈ آپریشن سنٹر (این سی او سی) دے سربراہ اسد عمر آکھیا اے اپوزیشن دے جلسیاں توں کورونا تیزی نال پھیل رہیا اے۔ سپیکر اسد قیصر دی زیر صدارت پارلیمانی کمیٹی برائے کورونا دا اجلاس ہویا جہدے وچ اپوزیشن دا کوئی وی نمائندہ شریک نہ ہویا۔ کمیٹی نے مشاورت دے بعد سینیٹ تے قومی اسمبلی دے اجلاس نہ بلان دا فیصلہ کیتا اے۔ اجلاس نال اظہار خیال کردیاں اسد عمر آکھیا اپوزیشن دے جلسیاں توں کورونا تیزی نال پھیل رہیا اے تے اپوزیشن عوام دی زندگیاں نال کھیڈ رہی اے، قومی قیادت نوں اپنے طرز عمل نوں بدلنا ہووے گا، سانوں لوکاں نوں سمجھنا اے ایس او پیز تے عملدرآمد کرنا اے، کیوں جے دوجی لہر بہت خطرناک اے تے وڈی تعداد وچ لوک ہسپتالاں وچ جا رہے نیں جہدے نال روزگار وی متاثر ہون دا خدشہ اے۔ اجلاس مگروں وفاقی وزیر اطلاعات شبلی فراز نے میڈیا بریفنگ وچ آکھیا پی ڈی ایم قومی مجرم اے جہڑی عوام نوں خطرے وچ سُٹ رہی اے، اوہناں دے خلاف قنونی ایکشن ہونا چاہیدا اے۔