ڈینیل پرل قتل کیس، ملزمان دی رہائی دا فیصلہ معطل کرن دی استدعا رد
اسلام آباد: سپریم کورٹ نے امریکی صحافی ڈینیل پرل قتل کیس دے ملزمان دی رہائی دا فیصلہ معطل کرن دی استدعا رد کر دتی۔ پاکستان وچ قتل ہون والے امریکی صحافی ڈینیل پرل دے والدین تے سندھ سرکار دی اپیل تے سپریم کورٹ وچ سماعت ہوئی۔ مقتول دے والدین دے وکیل ولوں تحریری عرضی جمع کرائی گئی کہ اوہ بعض ضروری وجہ پاروں عدالت پیش نہیں ہو سکدے ایس لئی سماعت ملتوی کر دتی جائے، جہنوں عدالت نے منظور کر لیا۔ دوران سماعت ملزمان دے وکیل نے موقف اپنایا کہ ڈینیل پرل قتل کیس دے ملزمان 19سال توں جیل وچ نیں، سندھ ہائی کورٹ نے 2اپریل نوں ڈینیل پرل قتل کیس دا فیصلہ سنایا، ملزمان سندھ ہائی کورٹ دے فیصلے دے باوجود غیر قنونی حراست وچ نیں۔ سندھ سرکار دے وکیل نے ڈینیل پرل قتل کیس دے ملزمان دی رہائی دا فیصلہ معطل کرن دی استدعا کردیاں آکھیا جے فیصلہ معطل نہ ہویا تے سندھ سرکار نوں مشکل ہووے گی جہدے تے جسٹس مشیر عالم نے ریمارکس دتے اینے عرصے توں اپیل زیر التوا نیں، پہلے کجھ نہیں ہویا تے ہن وی کجھ نہیں ہووے گا۔
