وکلاء حملے وچ پی آئی سی نوں نقصان، ضلعی انتظامیہ نے ابتدائی رپورٹ جاری کر دتی

لہور: ضلعی انتظامیہ نے پنجاب انسٹی ٹیوٹ آف کارڈیالوجی وچ نقصان دی ابتدائی رپورٹ جاری کر دتی اے۔ پی آئی سی حملے وچ تقریباً 7کروڑ روپے دا نقصان ہویا۔ رپورٹ وچ آکھیا گیا اے وکیلاں دے حملے وچ 10کارڈیک مانیٹرز، 4ایکو مشین، 3وینٹی لیٹرز تے 15ٹیلیفون توڑے گئے۔

ہسپتال دے داخلی تے خارجی بوہیاں تے 2واک تھرو گیٹاں نوں نقصان اپڑیا۔ ایہدے علاوہ چار بوہیاں تے 6باریاں دے شیشے توڑے گئے۔

ایمرجنسی وچ انفارمیشن کاؤنٹرز، باریاں تے کمپیوٹراں نوں نقصان اپڑایا گیا۔ وکیلاں نے شیشے دے بوہیاں تے 6پودیاں نوں نقصان اپڑایا۔

وکیلاں دے حملے وچ جیلانی بلاک دے داخلی بوہے تے سسٹر کیبن نوں نقصان اپڑیا۔

ایہدے علاوہ 16گڈیاں دے شیشے توڑے گئے تے 2گڈیاں مکمل تباہ کیتیاں گئیاں۔

اودھر ڈاکٹراں نے پی آئی سی بچاؤ تحریک مہم دا اعلان کردیاں آکھیا اے جمعہ نوں پنجاب انسٹی ٹیوٹ آف کارڈیالوجی وچ جاں بحق ہون والیاں لئی مشعل بالیاں جان گیاں۔

ڈاکٹر ذیشان ولوں جاری بیان وچ آکھیا گیا اے عام شہری وکلا گردی نال جاں بحق بندیاں لئی پی آئی سی وچ جمع ہون گے تے ریلی کڈھی جاوے گی۔ اوہناں دا کہنا سی جمعے نوں ای پی آئی سی دی ایمرجنسی کھولن دا فیصلہ کیتا جاوے گا۔