کرونا اُتے سیاست دی بجائے عوام نوں بچایا جائے !

لكهت:شاہد ندیم احمد

اک پاسے کرونا وبا دی دوجی لہر نے پوری دنیا نوں اپنی لپیٹ وچ لے رکھیا اے تے دوجے پاسے پورے ملک وچ حکومت تے اپوزیشن دی جنگ وچ مسلسل شدت آندی جا رہی اے۔ پاکس تان ڈیمو کریٹک موومنٹ یکے بعد دیگرے ملک دے مختلف شہراں وچ جلسے منعقد کر رہیا اے۔بلکہ جماعت اسلامی نے وی عوامی اجتماعات دی شکل وچ حکومتی پالیسیاں دے خلاف مہم شروع کر دتی اے۔ مقامی انتظامیہ ولوں اجازت نہ ملن دے باوجود پشاور وچ پی ڈی ایم نے جلسے دا پنڈال لایا، جد کہ جماعت اسلامی نے وی سوات وچ طے شدہ پروگرام دے مطابق احتجاجی ریلی کڈی، حکومت کرونا دی دوجی لہر دی شدت دے پیش نظر اجتماع توں روک رہی اے پر اپوزیشن اپنے احتجاجی جلسے نہ روکن اُتے بضد اے، ایس اُتے وزیراعظم عمران خان دا موقف اے کہ پی ڈی ایم ای پہلے سخت لاک ڈائون چاہندی سی تے ، ہن اپنے مفاد لئی عوام دی صحت دے نال لاپروائی نال سیاسی کھیڈ، کھیڈ رہے نیں۔ اصل وچ پی ڈی ایم قیادت عوام دوست نہیں، ایہناں دینیڑے عوام صرف اقتدار دی گڈی دے فیول نیں، عوام نوں جلسیاں وچ لیا کے خطرے وچ پان والے اپنی بھین دی منگنی اُتے مہماناں دا کرونا ٹیسٹ کرا رہے نیں تے میاں نواز شریف نے اپنے شیر جوان لندن وچ رکھے ہوئے نیں جد کہ عوام دے شیر جواناں نوں احتجاجی جلسیاں وچ لیا کے کرونا وائرس دی دلدل وچ واڑیا جا رہیا اے۔
ایس وچ شک نہیں کہ ایس ویلے پاکستان ای نہیں ساری دنیا کرونا دی نویں لہر دی زد وچ اے۔ کرونا وائرس دے دوران دیگر سرگرمیاں وانگوں پوری دنیا دی سیاسی قیادت عوام نال آن لائن رابطیاں نوںرواج دیندے نظر آندے نیں پر ساڈے کول پی ڈی ایم قیادت دا کہنا اے کہ ناجائز حکمران بذات خود کرونا نیں، عوام کرونا دی آڑ وچ ووٹ چوری کرن والیاں نوں آرام نال نہیں بیٹھن دین گے۔ حکومت نے این آر او منگیا سی، پی ڈی ایم نے مسترد کر دتا، پہلے کووڈ 18 ختم کراں گے، فیر کووڈ 19 نال نمبڑاں گے، حکومتی کرونا بچ گیا تے لوک مر جان گے، ایس موقعے اُتے وفاقی وزیر سائنس و ٹیکنالوجی فواد چوہدری وی پچھے نہیں رہے، ایہناں دا کہنا اے کہ لوکاں دیاں زندگیاں نال کھیڈنا کوئی مذاق نہیں، پہلے تحریک لبیک نے لہور وچ کرونا بمب بنان وچ کوئی کسر نہیں چھڈی تے ہن پی ڈی ایم پشاور دے بعد ملتان توں لہور تیکر حشر برپا کرن گے۔ اپوزیشن دے قول فعل دے تذاد ویکھو کہ بختاور بھٹو ازرداری دی منگنی دی تقریب وچ شرکت کرن والیاں لئی کرونا ٹیسٹ منفی ہونا لازمی قرار دتا گیا اے جد کہ احتجاجی جلسیاں دے انعقاد اُتے اصرار کر کے عوام دیاں جاناں نوں بیدریغ خطرے وچ پایا جا رہیا اے۔
ایہہ امر افسوسناک اے کہ پی ڈی ایم وچ شامل جماعتاں کرونا ودھائو دے خدشات نوں سیاسی کھیڈ دی حیثیت وچ ویکھ رہیاں نیں۔ پیپلز پارٹی، مسلم لیگ ن تے جمعیت علمائے اسلام خاص طور تے عوام نوں باور کروان دی کوشش کر رہیاں نیں کہ حکومت کرونا دی آڑ وچ پی ڈی ایم دے جلسیاں نوں روکنا چاہندی اے۔ پی ڈی ایم نے جتھے وی جلسہ کیتا، اوتھے دی ضلعی انتظامیہ منتظمین نوں یاد دہانی کرواندی رہی کہ ملک وچ کرونا دی دوجی لہر شدت پھڑ رہی اے، ایسے لئی جلسے دا پروگرام منسوخ کر دتا جائے، پر اپوزیشن نے انتظامی افسراں دی اپیل نوں سنجیدگی نال نہ لے کے ثابت کیتا اے کہ ایہنوں غریب مفلس بندیاں دی ذرہ پرواہ نہیں، انج لگدا اے کہ کرونا وائرس دی پروا کیتے بغیر اپوزیشن ہر صورت حکومت نوں ٹف ٹائم دین اُتے تلی ہوئی اے۔ اپوزیشن نوں اعتماد اے کہ جو کجھ کر رہی اے، ایس دے نتیجے وچ حکومت ختم ہو جائے گی جد کہ حکومت دے کاتمے لئی کوئی آئینی یا قانونی راہ موجود نہیں، پارلیمنٹ دے ذریعے عدم اعتماد کر کے ای حکومت نوں فارغ کیتا جا سکدا اے پر ایس آپشن اُتے اپوزیشن وچ اتفاق رائے موجود اے نہ ای ایس اُتے کم ہو رہیا اے۔ ایس ودھدی ہوئی کشیدگی تے محاذ آرائی نال حکومت تے نہیں جائے گی البتہ ملک و عوام نوں نقصان ضرور ہوئے گا۔
حکومت کرونا دی نویں مہلک لہر دے بارے وچ جو وی موقف تے حفاظتی تدبیر اختیار کر رہی اے ایس نال اختلاف نہیں کیتا جا سکدا پر اپوزیشن دی طرفوں عدم تعاون دی سچائی پرکھن دی لوڑ اے، کیہ حکومت نے واقعی شائستگی تے سنجیدگی دے نال پی ڈی ایم قیادت نال مذاکرات یا ملاقات دا ڈول پا کے کرونا دی نویں لہر دے انسداد دی کوئی اک وی کوشش کیتی اے؟ حکومتی وزیر کرونا دی بنیاد اُتے پی ڈی ایم نوں مطعون تے مسلسل کر رہے نیں پر پی ڈی ایم نال مصافحہ یا معافقہ کرن دی کوئی سنجیدہ کوشش بروئے کار نہیں آ سکی ، جے وزیراعظم اپوزیشن دے نال مل بیٹھن اُتے تیار نہیں تے فیر پی ڈی ایم قیادت نال تعاون دی توقع کنج کیتی جا سکدی اے۔ حکومت تے اپوزیشن دونواں نوں آئینی حداں وچ اپنے اختلاف حل کرن لئی جلدی توں جلدی افہام و تفہیم دا راہ اختیار کرنا چاہیدا اے، گرینڈ قومی ڈائیلاگ ای موجودہ صورت حال توں نکلن دی واحد تدبیر اے۔ پی ڈی ایم دے مرتب کردہ میثاق پاکستان نے مکالمے لئی واضح بنیاد فراہم کر دتی اے پر اج سیاسی اختلافات جس طرح ذاتی دشمنی وچ بدل چکے نیں، ایس بنیاد اُتے مفاہمت دے رستے اُتے آنا مشکل اے، تاں ملکی مفاد دا تقاضا اے کہ مقتدر اداریاں دی اعلیٰ قیادت پیش رفت کردے ہوئے اختلافات دا حل سڑکاں دے بجائے مذاکرات دی میز اُتے ممکن بنائیے، ایس ویلے سیاست دی بجائے عوام نوں کرونا توں بچانا سب توں زیادہ اہم اے۔ حکومت تے اپوزیشن دا فرض اے کہ عوامی زندگیاں دے تحفظ لئی اپنی ذمے داریاں پوری کریے، سیاست لئی ساری زندگی پئی اے، ایہہ بعد وچ وی ہوندی رہوے گی۔