حکومتی جبر دا شکار ایف ایم ریڈیو
لکھت:اے ڈی شاہد
ایہہ ریڈیو نوں ای اعزاز حاصل اے کہ جس نے 14 اگست 1947 نوں رات 12 وجے اک آزاد ملک پاکستان دے قیام دی خوشخبری پوری پاکستانی قوم نوں سنائی۔ ریڈیو ایس ویلے واحد نشریاتی ادارہ سی جس توں ایہہ اعلان ہویا کہ ’’یہ ریڈیو پاکستان ہے آپ نوں آزادی مبارک ہو ‘‘۔ کئی ورھیاں توں آزادی دی تحریک وچ جدوجہد کرن والے پرجوش مسلماناں نے جدوں مصطفی ہمدانی دی اواز وچ ایہہ خبر سنی تے سجدہ شکر ادا کرن لگے کیوں جے آزادی توں وڈی نعمت کوئی ہو ای نہیں سکدی ایس توں علاوہ 6 ستمبر 1965 دی جنگ وچ وی سویر دے ویلے فیلڈ مارشل جنرل محمد ایوب خان نے ریڈیو پاکستان دے ذریعے قوم نوں ہندوستانی حملے توں آگاہ کیتا تے مدد منگی۔ ایہہ ریڈیو ای سی جس اُتے 1965 تے 1971 دی جنگ وچ قومی ترانے نشر ہوندے رہے جیہڑے ساڈے فوجی جواناں دے جوش و جذبے وچ وادھا کر کے ایہناں دے لہو نوں گرماندے رہے۔ایس ویلے وطن عزیز وچ سرکاری ریڈیو دے علاوہ پرائیویٹ سیکٹر وچ ایف ایم ریڈیو دا جال نکے وڈے شہراں وچ ودھ چکیا اے۔ فرانس، امریکہ، روس، جرمنی، اٹلی، برطانیہ تے ایہناں جہے دیگر یورپی ملکاں وچ کوئی وی سرکاری پیغام ہن وی ریڈیو توں نشر ہونا ضروری اے کیوں جے ایہہ سستا ترین ذریعہ ابلاغ اے۔ جس دی افادیت نال کسے صورت انکار نہیں کیتا جا سکدا۔ حکومت پاکستان ایس سستے ذریعہ ابلاغ دی ترقی لئی کم کردی پر افسوس کہ انج نہیں ہو سکیا۔ ریڈیو پاکستان دے مختلف اسٹیشنز اُتے 4400 مستقل آسامیاں نیں جنہاں وچوں ہن صرف 2400 ملازم کم کر رہے نیں۔ 20 اکتوبر 2020 نوں 749 نکے ملازماں نوں فارغ کر دتا گیا جس نال کئی خاندان فاقیاں دی نوبت نال دو چار ہو گئے نیں ایس توں علاوہ اج کل پاکستان دی حکومت ملک وچ میڈیا دے سب توں غریب بھائی ایف ایم ریڈیو چینلاں دے پچھلے ٹیکس دی لاٹھی لے کے پئی ہوئی اے۔ پاکستان وچ تقریباً 200 ایف ایم چینل نیں۔ پرائیویٹ شعبے وچ ایہناں وچ غالباً ادھیاں نوں آخری نوٹس جاری کر دتا گیا اے کہ حکومت دے خزانے وچ اپنا حصہ پائو نہیں تے تہاڈا گانا، وجانا بند تے دفتراں دی میز کرسیاں وی نیلام کر دتیاں جان گیاں۔
ایہناں کمزور تے معصوم ایف ایم چینلاں دے کول ویلے دی حکومت کول ایس بے رحم فیصلے دے خلاف سوائے رون دھون یا منت سماجت دے ہور کوئی طاقتور فورم نہیں ایسے وجہ نال ایس فیصلے اُتے نظر ثانی نہیں کیتی جا رہی ۔ پر میرا خیال اے کہ ایف ایم چینلز نے لوکاں نوں گھر بیٹھے، گڈی چلاندے تے دکانداری کردے مفت تفریح اپڑان وچ آپس وچ گل بات کرن دا اک زبردست ذریعہ فراہم کیتا ہویا اے۔ کراچی وچ بیٹھے نیں تے ڈائل گھمائو تے اردو انگریزی دے نال نال، پشتو، براہوی، گجراتی، سندھی جس زبان وچ چاہو گل بات سنو۔گانے دی فرمائش کرو تے جے زیادہ فارغ او تے فون گھما کے گل بات وچ شامل ہو جائو۔ حالات حاضرہ دا رونا روئیے، لطیفہ سنیئے یا ایہہ سنا دیئے کہ اج گھر وچ کیہ پکیا اے۔کراچی توں کل کے پشاور تیکر جائو، ہر ضلعے وچ ایس دی مقامی بولی وچ گلاں تے اشتہار سنو، مقامی فنکاراں دے گانے سنو، ایف ایم سٹیشناں نے ہر نکے شہر وچ اک کمیونٹی ہال دا کم کیتا اے، نچلے تے متوسط طبقیاں نوں اپنے اظہار دا اک پلیٹ فارم دتا اے تے نوجوان صدا کاراں تے صحافیاں لئی اک ٹریننگ گرائونڈ وی اے۔ اج کل پاکستان دے پرائیویٹ ٹی وی چینلاں دے کئی مشہور اینکرز تے چیتے رپورٹراں نے اپنے کریئر دا آغاز ایف ایم چینلاں نال ای کیتا سی۔
ٹی وی چینل شاید سیاست ویچدے تے کردے ہون، ایف ایم چینل دا تے مطلب ای اے اینٹرٹینمنٹ تے مقامی ایف ایم اینٹر ٹینمنٹ چوں کے مقامی اے ایس لئی عوام تے حکومت دونواں دے مزاج نوں سمجھدے نیں۔ نماز دے ویلے اذان لا دیندے نیں، جمعے نوں قوالیاں، ربیع الاول وچ نعتاں نال سما بنھ دیندے نیں، محرم وچ مرثیے چلوا دیندے نیں۔ سویر دے ویلے ہلکی پھلکی گپ ، خبراں تے رات دیر گئے ذرا رومانی ہو جاندے نیں تے غزلاں وغیرہ لا کے بے خواب سامعین دے رومانی قصے سن دے نیں۔ تابع دار اینے کہ جے حکومت کہے کہ انڈی گانے بند کر دیو تے فوراً بند، حکومت کہے کہ ڈیم دے اشتہار چلائو تے ثاقب نثار دے جان دے کئی مہینے بعد وی اشتہار چلاندے رہندے نیں۔ جے آرڈرآئے کہ کسے غریب ملکی اخباری ادارے دی خبر نہیں چلانی تے کہندے نیں کہ بالکل نہیں چلانی ہمیشہ جی حضوری نال ای کم لیندے نیں۔ ایف ایم سٹیشناں توں زیادہ موثر تے ہومیو پیتھک میڈیا کسے حکومت نوں نہیں مل سکدا پر خدا جانے حکومت دے کن کس نے بھرے نیں کہ جنہاں شرطاں اُتے 10 ورھے پہلے لائسنس ملے سن ہن ایہناں توں 25 گنا زیادہ پیسہ منگ رہی اے تے ایہہ وی کہہ رہی اے کہ ہنے دیو نہیں تے ایہناں نوں بند کرو تے گھراں وچ بیٹھو۔ لمحہ فکریہ اے کہ اوہ کرونا دی وجہ نال برباد معیشت وچ کھان گے کیہ، کمان گے کیہ تے حکومت دے ہرجانے کنج بھرن گے۔
اگرچے ایہناں ایف ایم سٹیشناں نوں ملن والے زیادہ تر اشتہار مقامی ہوندے نیں جنہاں دی بوہت گھٹ قیمت ہوندی اے۔ بیوٹی پارلر، بیکریاں، کاراں دے شوروم، بلکہ کجھ وار تے خاندان وچ ہون والی کسے موت دا اشتہار وی دو ڈھائی ہزار دے کے مقامی ایف ایم ریڈیو اُتے چل جاندا اے۔
غریب دا غریب دے نال کاروبار بننا کسے وی معیشت دی ریڑھ دی ہڈی ہوندا اے پر حکومت کہندی اے کہ ہن ایہہ نہیں چلے گا۔
شاید حکومت نوں ایہناں سٹیشناں دے ناں سن کے لگدا ہوئے کہ ایہہ وڈی بلاواں نیں، ایہناں نوں نتھ پائی جائے پر ایہناں ایف ایم ریڈیو دے سٹوڈیوز وچ کیتی ہوئی گلاں نال یا چلائے گئے گانیاں نال اج تیکر نہ کوئی حکومت گئی اے نہ آئی اے۔ ریڈیو اواز نیٹ ورک پاکستان دا سب توں وڈا ایف ایم ریڈیو نیٹ ورک اے ہر نکے وڈے شہر وچ سستی ترین تے معیاری تفریح فراہم کر رہیا اے ہزاراں لوک ایس نیٹ ورک نال جڑے نیں پر کوئی نہیں جان دا کہ آخر وچ سب ملازماں دیاں تنخواہواں دین دے بعد مالک نوں صرف گانے وجدے نیں جیہڑے اوہ سفر دے دوران سن کے خوش ہو جاندے نیں کہ ایہہ میرے ریڈیو اُتے چل رہیا اے۔ اسلام آباد وچ اک پاور ایف ایم نامی سٹیشن اے اسلام آباد دی پاور پالیٹکس وچ ایس دے کردار دے بارے وچ کدی سنیا، نہ ای کسے نے شکایت لائی اے۔
چار وڈے شہراں وچ اک مست ایف ایم اے، ہلکی پھلکی مستی دے علاوہ سن کے کدی نہیں لگیا کہ ریاست نال بغاوت کر دیو، اپنا کراچی، توں پہلے وی کراچی اپنا ای سی۔ ہاٹ ایف ایم نے پاکستان نوں نہ زیادہ ٹھنڈا کیتا اے نہ گرم، بس ساڈی بور دوپہراں نوں تھوڑا خوشگوار بنایا اے۔ ایف ایم دا پورا کاروبار صرف گانیاں اُتے چلدا اے یا گل بات اُتے۔ ایف ایم والیاں نوں گلاں کرن دا وی بوہت شوق ہوندا اے۔ جے حکومت نے ایہہ ہزاراں اوازاں زبردستی آف ایئر کر دتیاں تے ایہہ زباناں فیر وی بند نہ ہون گیاں تے فیر ایہہ اوازاں جو کجھ کہن گیاں اوہ ناقابل اشاعت ہوئے گا۔ انج دے حالات وچ ویلے دی حکومت نوں اپنے فیصلے اُتے نظر ثانی کرنی چاہیدی اے۔ اک کروڑ نوکریاں دین دے منشور اُتے آن والی حکومت نوں مہنگائی تے بے روز گاری دی چکی وچ پسی ہوئی عوام توں روزگار نہیں کھونے چاہیدے۔
کب تلک آئین کی آڑ میں ہم یونہی
ٹیکس کی توپ تلے آیسے ہی دبے جائیں گے
ضرورتیں کب تک دیکھیں گی تماشا اپنا
بازار کب تک مہنگائی کے سجے جائیں گے
قہر بن کے حکم اترتا ہے ایوانوں سے
دل کو اب خوف لگا رہتا ہے انسانوں سے





















