ڈاکٹر فردوس اعوان دی واپسی

لكهت:محمد آصف بھلی

ڈاکٹر فردوس اعوان نوں تقریباً 7 مہینے فارغ رہن دے بعد ہن پنجاب حکومت وچ اوہ ای ذمے داری دتی گئی اے جیہڑی 7 مہینے پہلاں وفاقی حکومت وچ ایہناں دے کول سی۔ ڈاکٹر صاحبہ ایس تنزل اُتے وی بوہت خوش نیں کیوں جے پچھلے 7 مہینے ایہناں دے اقتدار توں دوری اُتے انتہائی کرب وچ لنگھے نیں۔ کسے اخبار وچ یا ٹی وی چینل وچ ایہناں دی کوئی تصویر یا خبر نہیں ویکھی گئی۔ کتھے ہر دن ٹی وی اُتے جلوہ افروز ہونا تے کتھے ایہہ عالم کہ ڈاکٹر فردوس اعوان دا ناں اخبارات تے ٹی وی توں مکمل طور اُتے غائب ہو جانا اک سیاست دان لئی انج ای اے کہ جویں مچھی جدوں پانی وچ نہ ہووے تے اوہ انتہائی پریشان تے بے قرار ہو کے تڑپن لگدی اے۔ اللہ تعالیٰ نے ڈاکٹر فردوس اعوان دی دن تے رات دیاں دعاواں قبول کر لیاں نیں تے ہن ایہناں نوں پنجاب حکومت دی ترجمانی دا فریضہ دے دتا گیا اے۔فردوس عاشق اعوان دا اج مختلف اخبارا وچ ایہہ بیان شائع ہویا اے کہ وزیراعظم عمران خان نے مینوں پنجاب حکومت دی ترجمانی دی ذمے داری دتی اے۔ یعنی ایہہ فیصلہ وزیراعلیٰ پنجاب عثمان بزدار دا نہیں بلکہ عمران خان نے فردوس اعوان نوں وزیراعلیٰ پنجاب دی معاون خصوصی برائے اطلاعات مقرر کیتا اے۔ فردوس اعوان دے ایس دھماکہ خیز بیان دا مطلب ایہہ اے کہ پنجاب وچ وی عثمان بزدار دا کوئی فیصلہ اپنا نہیں ہوندا بلکہ سب فیصلے تے سب احکامات عمران خان ای دے ہوندے نیں۔ ہن سوال پیدا ہوندا اے کہ جس فردوس اعوان دا وزیراعظم عمران خان آپ تجربہ کر چکے نیں کہ اوہ وزیراعظم دی معاون خصوصی برائے اطلاعات و نشریات چنگی کارکردگی دا مظاہرہ نہیں کر پا رہیاں سن جے وزیراعظم فردوس اعوان دی صلاحیت، قابلیت تے کارکردگی توں مطمئن ہوندے تے فردوس اعوان نوں فارغ ای کیوں کیتا جاندا۔ فیر ڈاکٹر فردوس اعوان نوں معاون خصوصی دے منصب توں فارغ وی کجھ ایس انداز وچ کیتا گیا سی کہ حکومتی ایواناں توں ایہناں دی رخصتی دا منظر ویکھ کے ہر کسے نوں غالب دا ایہہ شعر یاد آ گیا سی۔
نکلنا خُلد سے آدم کا سنتے آئے ہیں لیکن
بہت بے آبرو ہو کے ترے کوچے سے ہم نکلے
وزیراعظم عمران خان نے اپنے پرنسپل سیکرٹری دے ذریعے معاون خصوصی دے عہدے توں استعفیٰ دین دا پیغام ڈاکٹر فردوس نوں دتا۔ ڈاکٹر فردوس صاحبہ ایس پیغام وچ لُکے ہوئے وزیراعظم دے غصے نوں نہ سمجھ پائو فیر حکومت نوں ایہہ ناخوشگوار فریضہ خود ای ادا کرنا پیا کہ فردوس اعوان نوں فارغ کر دتا گیا۔ فردوس اعوان توں پہلے فیاض الحسن چوہان پنجاب دے وزیر اطلاعات سن۔ ایہناں نوں دوجی وار وزارت اطلاعات دے منصب توں فارغ کیتا گیا اے۔ میری دعا اے کہ میرے شہر سیالکوٹ نال تعلق رکھن والی ڈاکٹر فردوس نال انج دا سلوک نہ کیتا جائے کہ ایہناں نوں وی دو وار معاون خصوصی عہدے دے عہدے توں فارغ ہونا پئے۔ وفاق توں ایہناں نوں صوبے وچ گھل دتا گیا اے۔ صوبہ پنجاب توں فارغ ہون دے بعد تے فیر سیالکوٹ ای باقی رہ جاندا اے پر سیالکوٹ دے عوام نے وی فردوس اعوان نال کوئی چنگا سلوک نہیں کیتا کہ فردوس اعوان دو وار قومی اسمبلی دے الیکشن وچ شکست نال دو چار ہو چکیاں  نیں۔ یعنی سیالکوٹ دے عوام ایہناں نوں پہلے ای فارغ کر چکے نیں جے وفاقی حکومت وانگوں  پنجاب  حکومت نے وی فردوس اعوان نوں فارغ کر دتا تے ایہہ مناسب نہیں ہوئے گا۔ اسیں عثمان بزدار دی خدمت وچ ایہہ التماس کراں گے کہ اوہ اپنی بے اختیار وزارت اعلیٰ وانگوں ڈاکٹر فردوس نوں وی اپنے لئے اک ، نعمت سمجھو تے ایس نعمت توں جلدی محروم ہون دا نہ سوچن نہیں تے مومن خاں مومن دے اک شعر جہی صورتحال ہو جائے گی۔
تو کہاں جائے گی، کچھ اپنا ٹھکانہ کرلے
ہم تو کل خوابِِ عدم میں شبِ ہجراں ہوں گے
ڈاکٹر فردوس اعوان دا ایہہ بیان مینوں چنگا لگا اے کہ عثمان بزدار نے حکومتی وسائل دا رخ پسماندہ علاقیاں ول موڑ دتا اے۔ سیالکوٹ دے بارے وچ عثمان بزدار دی معلومات شاید ایہہ نیں کہ سیالکوٹ اک پسماندہ علاقہ نہیں۔ ایس لئی پچھلے دو ورھے توں سیالکوٹ نوں پنجاب حکومت نے نظرانداز کر رکھیا اے۔ سیالکوٹ شہر ول آن والی ہر سڑک ٹوٹ پھوٹ دا شکار ہو چکی اے۔ جس پنڈ وچ ڈاکٹر فردوس آپ رہندیاں  نیں جے ایس پنڈ توں کینٹ بائی پاس (مدثر شہید روڈ) توں لنگھ کے سیالکوٹ آنا ہوئے تے سڑک دا ایہہ حال اے کہ ایہہ علاقہ محکمہ آثار قدیمہ دے حوالے کر دینا چاہیدا اے۔کیوں جے اوتھے کدی سڑک سی ہن اوتھے صرف گڑھے تے کھڑے نیں۔ سیالکوٹ توں پسرور جان والی سڑک وی ڈونگھے گڑھیاں وچ تبدیل ہو چکی اے فیر المیہ ایہہ اے کہ سڑک تعمیر کرن والے ٹھےکیدار تے سرکاری محکمے اینے بدعنوان نیں کہ سڑک بن دی بعد وچ اے ٹٹ پہلے جاندی اے۔ سیالکوٹ وچ اک ای گورنمنٹ اقبال لائبریری اے۔ ایس لائبریری ول شمال دو سال توں مسمار ہو کے زمین بوس ہو چکی اے۔ ایس دیوار لئی محکمہ ایجوکیشن دے کول فنڈز نہیں ۔ میں اک سرکاری سکول وچ گیا اوتھے سکول دی سربراہ نے مینوں دسیا کہ سانوں اپنے سکول دے حوالے نال ضرورتاں دی خاطر فنڈز نہیں ملدے تے شہریاں توں عطیات منگنا پیندے نیں سیالکوٹ وچ تحریک انصاف دا اک راہنما عثمان ڈار ای نظر آندا اے جس دے دل وچ سیالکوٹ دی تعمیر و ترقی دا درد اے پر اوہ اپنے ذاتی وسائل تے سیالکوٹ دے مخیر حضرات دے تعاون نال صحت، تعلیم تے پولیس دے شعبیاں وچ اصلاحِ احوال لئی کم کر رہیا اے۔ پر سڑکاں، تعلیمی اداریاں تے صحت دے شعبے وچ وی حکومت دی ذمے داری اے کہ اوہ فنڈز مہیا کرے تے فیر ایہہ فنڈز دیانت داری نال وی استعمال ہون۔
ڈاکٹر فردوس دی وی ایہہ ذمے داری اے کہ اوہ عثمان بزدار نوں ایس صورتحال توں آگاہ کرن کہ سیالکوٹ نوں وی پسماندہ علاقہ سمجھیا جائے تے جس قدر وی عثمان بزدار بااختیار نیں اوہ حکومتی وسائل دا رُخ سیالکوٹ ول موڑن۔ عثمان بزدار جے وزیراعلیٰ نیں تے اوہ صرف جنوبی پنجاب دے وزیراعلیٰ نہیں سنٹر ل پنجاب دی ذمے داری ایہناں اُتے اے جس طرح ڈاکٹر فردوس اعوان دی بے روزگاری دا مسئلہ وزیراعظم عمران خان نے حل کر دتا اے۔ ہن کجھ توجہ سیالکوٹ دی پسماندگی دور کرن اُتے دتی جائے۔ ساڈا المیہ ایہہ اے کہ ساڈے سیاست دان شخصی جماعتاں دے آمرانہ مزاج رکھن والی اپنی اعلیٰ قیادت دے ساہمنے اپنے ذاتی مسائل دے حل لئی تے سجدے توں وی گریز نہیں کردے پر عوام دے مسائل و معاملات اُتے اوہ گھٹ ای توجہ دیندے نیں ۔ جدوں حکومت دی عوامی خدمات دے حوالے نال کارکردگی صفر ہوئے گی تے فیر ڈاکٹر فردوس اعوان معاون خصوصی دے طور تے حکومت دے کیہڑے کارنامے گنوان گیاں۔ پنجاب دے جنہاں وی شہراں، علاقیاں تے پنڈاں وچ پسماندگی نے اپنے ڈیرے جمائے ہوئے نیں جے حکومت نوں اوہ نظر نہیں آندی تے فیر حکومت نوں انھا ای سمجھیا جائے گا۔ حکمران جے اپنی بصارت توں کم لین تے کجھ بصیرت توں وی مدد منگ لین تے شاید ساڈے کجھ دکھاں دا مداوا ہو جائے۔