وفاقی کابینہ نے کورونا ویکسین دی خریداری دی منظوری دے دتی
اسلام آباد( پنجابی میڈیا گروپ) وفاقی کابینہ نے کورونا وائرس توں بچن لئی ویکسین دی خریداری دی منظوری دے دتی۔وزیراعظم دی زیرصدارت وفاقی کابینہ دا اجلاس ہوئیا جس وچ کورونا وائرس دی ویکسین دی خریداری دی منظوری دے دتی گئی تے ایس کم لئی15کروڑ ڈالر رکھ لتے گئے ۔وفاقی کابینہ نے نیشنل انسٹیٹوٹ آف ہیلتھ دے ایگزیکٹو ڈائریکٹر دی مدت ملازمت وچ توسیع تے نجی ایئرلائن ایئر سیال دے لائسنس دی وی منظوری دے دتی۔کابینہ نے پاکستان اسٹیل ملز دے ملازماں نوں گولڈ ہینڈ شیک دین سمیت مختلف اداریاں دی نجکاری دی وی منظوری دتی۔ اجلاس وچ ایم کیو ایم نے ہاؤس بلڈنگ فنانس کارپوریشن دی نجکاری دی مخالفت کیتی۔وفاقی وزیر امین الحق نے آکھیا کہ ہاؤس بلڈنگ فنانس کارپوریشن اک منافع بخش ادارہ اے جو حکومت دے منشور دے مطابق لوکاں نوں سہولت فراہم کررہیا اے۔
