’’ غضب کیا تیرے وعدے پر اعتبار کیا‘‘

لكهت:صفدر رانا

اسیں پچھلے دناں وچ اپنے دکھ درد دا مداوا کرن دے دعویدار نوں منتخب کیتا کہ اسیں جیہڑے مظلوم تے غریب عوام تبدیلی دی امید لا کے یقین کر بیٹھے سانوں کیہ پتا سی کہ ایہہ تبدیلی ساڈی اولاداں دی قیمت اُتے منحصر اے جناں محترم تہاڈی زبان اقدس توں سنیا سی کہ بجلی مہنگی اے اسیں بل کیوں دیئے تسیں بل ساڑے سن پر بجلی تے پہلے توں کدھرے زیادہ مہنگی ہو گئی اے۔ پٹرول جیہڑا تہاڈے بقول جدوں تسیں اپوزیشن وچ سی کہندے سن 45 روپئے لیٹر ملنا چاہیدا اے ہن تہاڈی اپنی حکومت وچ 100 روپئے توں ودھ اُتے فروخت ہو رہیا اے۔ تسیں کہیا سی کہ بھیک نہیں منگا گا پر تسیں مختصر مدت وچ ریکارڈ قرضہ لے لیا۔ چینی دوگنی قیمت اُتے مل رہی اے آٹا دوگنی قیمت اُتے مشکل نال مل رہیا اے۔پہلے تہانوں نوں عوام دے غم وچ نیند نہیں آندی سی ہن عوام نوں تہاڈے نظر کرم پاروں نیند نہیں آندی۔فیکٹریاں لگن گیاں جیہڑی بند ہون دے در پے نیں۔ میڈیا آزاد ہوئے گا پر مختلف قد غناں دا ساہمنا کر رہیا اے ہر وڈا پیسہ واپس لیاواں گے جنہا پیسہ ہن تیکر واپس آ چکیا اے۔ 50 لکھ گھر بنان سن جیہڑے دو ورھے دی مدت وچ 20 لکھ گھر بن دے نیں کسے اک نوں وی گھر نہیں ملیا بلکے بوہت سوںنوں بے گھر ہونا پیا۔ اک کروڑ نوکریاں دیناں سن پہلے ریڈیو پاکستان تے ہن اسٹیل مل دے ملازم فارغ کر دتے ایسے طرح بے روز گاری ودھدی جا رہی اے۔ ریاست مدینہ بناواں گا ہن چینی ماڈل دی گل ہو رہی اے دوائیاں دی بے گناہ ودھدیاں قیمتاں صحت دے ودھدی سہولتاں ثابت ہو رہیاں نیں۔کشمیر آزاد کرواواں گے پر اوتھے جرم و استبداد عروج اُتے اے۔ آزاد لوکا ں نوں لے کے حکومت نہیں بناواں گا پر آزاد ارکان اک پاسے اپنے تے غیر منتخب اراکین نوں نوازیا اے ایم کیو ایم نوں دہشت گرد کہیا ہن تہاڈی حلیف اے ۔ق لیگ نوں پنجاب دا ڈاکو کہیا ہن ایہناں دے بغیر پنجاب دی حکمرانی ممکن نہیں شیخ صاحب نوں چپڑاسی وی نہ رکھن دا کہیا ہن ملک دی ریلوے ایہناں دے سپرد اے، وزیراعظم ہائوس تے گورنر ہائوسز یونیورسٹیاں بنن دی منتظر نیں۔ بابر اعوان نوں چور کہیاتسیں کہ اوہ تہاڈے وکیل نیں پہلے حکمران ٹیکس سن ہن بقول تہاڈے عوام ٹیکس چور نیں بیرونی دوریاں اُتے جہاز چارٹر نہیں ہون گے ہن تہانوں اوہ وی یاد نہیں تسیں کہندے سی دھرنے مسائل دا واحد حل نیں ہن دھرنے تے جلوساں دی سیاست ملکی ترقی لئی زہر قاتل اے تسیں یہودی امیدوار نوں سپورٹ کیتا جد کہ صادق خان مسلمان امیدوار نوں تہاڈی مخالفت دا ساہمنا کرنا پیا تہاڈے تعریف کردہ بندے افتخار محمد چوہدری، پرویز مشرف، فخر الدین جی ابراہیم بعد وچ تہاڈی تنقیدی نشتر دا ساہمنا کر رہے نیں ہور تے ہور تہاڈے کزن محترم طاہر القادری اج وی ماڈل ٹائون حادثے لئی انصاف دی امید لائے بیٹھے نیں پنجاب دی تے لہور دی میٹرو تہاڈے اعتراضات دی زد وچ رہی کہ کرپشن ہوئی جیہڑی اج وی چل رہی اے پر پشاور دی میٹرو حادثات تے کثیر لاگت دے باوجود کرپشن فری کوئی انکوائری نہیں کدی بنی گالا کائونٹی دی کمائی توں خریدا کدی جمائما نے گفٹ کیتا کدی علیم خان اُتے الزامات کدی وزیر پنجاب پولیس وچ اصلاحات لیان لئی کے پی کے توں پولیس افسر لیایا گیا فیر پنج آئی جیز بدلے جان دے بعد وی جرائم بے قابو ہاں، بہنوئی دا پلاٹ واگزار کران وچ کامیاب رہے ہن وی آزاد ارکان ملا کے گلگت بلتستان وچ حکومت بنان وچ کامیاب ہوئی پر ایہناں سب وعدیاں نوں یاد کران دا مقصد غریب عوام دی زندگی سہل بنان دی طرفوں توجہ مبذول کرانا اے تسیں جس نوں مرضی پھڑن یا چھڈن کسے نوں NRO دین یا نہ دین اُتے غریب عوام لئی کھان پین والیاں شیواں آٹا گھی چینی سبزیات سستی فرما دین تے عوام دا بھلا ہوئے گا غریب بھُک توں اکتا کے جرائم ول راغب نہ ہوئے کیوں جے بھکھ انسان نوں جرم کرن اُتے مجبور کردی اے اپنے کیتے ہوئے وعدے غریباں دی حد تیکر تے پورے فرما دین تہاڈی حکومت دا ادھا دورانیہ ختم ہو چکیا پر وعدے تے ’’جوں کے توں‘‘ نیں ہن قوم مزید وعدیاں دی تکمیل لئی انتظار دی متحمل نہیں ہو سکدی۔ وعدے نہیں عمل چاہیدا اے نہیں تے غریب تے بچارے ایہہ کہن وچ حق بجانب اے۔